སྐད་འཇོག་ས།

གླིང་གེ་སར་དྲ་བ་འདི་གཉེར་བའི་དམིགས་ཡུལ་ནི། བོད་ཀྱི་མི་སྣ་དཔའ་བོ་གླིང་རྗེ་གེ་སར་ནི་བོད་ཀྱི་ལོ་རྒྱུས་སྟེང་དངོས་སུ་བྱུང་བའི་དོན་གནས་ཀྱི་མི་སྣ་ཞིག་ཡིན་ན་ཡང་། དུས་ཀྱི་གནས་བབ་ཀྱིས་མི་སྣ་འདི་ལ་ངག་ཏུ་བརྒྱུད་པའི་དོན་དངོས་ལོ་རྒྱུས་ཐན་ཐུན་ལ་གཞི་བཅོལ་བའི་ཡིག་ཐོག་གི་ལོ་རྒྱུས་ཐད་ནས་ལྷ་སྒྲུང་ལྟ་བུར་ཆགས་ཏེ་ས་ཁྱབ་རྡོ་ཁྱབ་ཏུ་གྱུར་བ་དང་གཅིགགླིང་གེ་སར་གྱི་མི་རབས་ཕྱི་མ་དག་གིས་རང་རིགས་ཀྱི་མེས་པོའི་དོན་དངོས་ལོ་རྒྱུས་ཀྱི་དཔྱད་གཞི་ལ་ཆེར་མ་དམིགས་པར། དཔའ་བོའི་བསྟོད་སྒྲུང་གི་ཁ་སྙན་ངག་གི་འཇིག་རྟེན་ཞིག་ཏུ་ཁྲིད་དེ་རྩོམ་པ་པོ་རང་རང་གིས་རྟོག་པ་འཆར་ཡན་གྱི་ལམ་ནས་བྲིས་པ་མང་སྟབས། བོད་ཀྱི་དཔའ་བོའི་ལོ་རྒྱུས་ལ་དོན་དངོས་དང་ཉེ་བའི་ལོ་རྒྱུས་དང་། དཔའ་བོའི་བསྟོད་སྒྲུང་གི་སྙན་ངག་གཉིས་ལས་ཕྱི་མ་ཁྱབ་ཆེ་བར་སོང་སྟེ། ད་ཆ་འཛམ་གླིང་གི་རྟོགས་བརྗོད་ཆེན་མོ་འདི་ལ་སྤྱིའི་ཆ་ནས་སྙན་གྲགས་དང་མཛད་འཕྲིན་རྒྱ་ཤིན་ཏུ་ཆེ་ན་ཡང་།ཞིབ་གསལ་གྱི་ཆ་ན་སྒྲུང་མཁན་སོ་སོའི་འབྲི་སྟངས་མི་འདྲ་བ་དང་།སྔ་ཕྱི་མི་མཐུན་པ་སོགས་ལོ་རྒྱུས་པ་སོ་སོའི་འདོད་པ་མི་མཐུན་ས་མང་པོ་ཞིག་གིས་བོད་ཀྱི་གླིང་གེ་སར་རིག་གཞུང་ལོ་རྒྱུས་ལ་ཞིབ་འཇུག་པ་རྣམ་པར་དཀའ་ངལ་ཆེ་བའི་གནས་བབ་ལ་ཁ་གཏད་དེ། གླིང་གེ་སར་རིག་གནས་ཀྱི་ཕྱོགས་ཡོངས་ཀྱི་དཔྱད་གཞིའི་མ་ལགས་འཐུས་སྒོ་ཇེ་ཚང་ལ་གཏོང་ཨེ་ཐུབ་སྙམ་ནས་གཉེར་བ་ཡིན་མོད། འོན་ཀྱང་དྲ་བ་འདི་གཉེར་བ་པོར་བོད་ཁུལ་ཡོངས་ཀྱི་གླིང་གེ་སར་དོན་དངོས་ལོ་རྒྱུས་དང་ཉེ་བའི་དཔྱད་གཞི་ལ་ཐོས་མཐོང་གི་རྒྱ་ཆུང་བས། གླིང་གེ་སར་རིག་གནས་ལ་སྤྲོ་སྣང་ལྡན་པའི་རྒྱ་ཆེའི་གྲོགས་པོ་དག་གིས་དྲ་བ་འདིའི་ས་བཅད་སོ་སོའི་ཁྱབ་ཁོངས་ལ་དཔྱད་གཞི་བསྡུ་རུབ་དང་། གླིང་གེ་སར་དཔྱད་རྩོམ། གླིང་གེ་སར་སྒྱུ་རྩལ་རི་མོ། གླིང་གེ་སར་དོན་དངོས་ལོ་རྒྱུས།གླིང་གེ་སར་དང་འབྲེལ་བའི་བོད་ཡུལ་སྟོད་སྨད་བར་གསུམ་གྱི་ཡུལ་སྲོལ། གླིང་གེ་སར་འཁྲབ་གཞུང་། གླིང་གེ་སར་ལོ་རྒྱུས་སམ་བསྟོད་སྒྲུང་གསར་རྙིང་དང་རྩོམ་པ་པོ་དང་འབྲེལ་ཡོད་མི་སྣ་ངོ་སྤྲོད་སོགས་མཁོ་སྤྲོད་གནང་སྦྱིན་གྱི་བཀའ་དྲིན་སྐྱོང་རྒྱུ། མདོར་ན་བོད་རང་གི་དཔའ་བོའི་ལོ་རྒྱུས་ལ་གཅེས་སྐྱོང་གི་འདུ་ཤེས་ལྡན་པའི་སྒོ་ནས་ཕྱོགས་ཡོངས་ལ་མཛུབ་སྟོན་རྒྱབ་སྐྱོར་གནང་རྒྱུ་བཀའ་དྲིན་ཆེ་ཞུ་བ་དང་། ནོར་འཁྲུལ་དང་རིག་གནས་ཀྱིས་མ་འཇོན་ས་ཡོད་ན་རྒྱ་ཆེའི་ཀློག་པ་པོ་རྣམ་པར་གུས་བཤགས་བྱེད་ངེས་ཡིན། དེ་དང་ལྷན་བོད་ཀྱི་མེས་པོ་གླིང་རྗེ་སར་སྐྱེས་བུའི་རྣམ་ཐར་ལོ་རྒྱུས་རིང་མོའི་མཛད་འཕྲིན་འཛམ་གླིང་རིག་གནས་བང་མཛོད་ཀྱི་སྙིང་བཅུད་འདོད་འབྱུང་གི་ཡིད་བཞིན་ནོར་བུ་ལྟ་བུར་འགྱུར་ཐུབ་པའི་སྨོན་འདུན་ཡང་ཡང་ཞུ་བ་ལགས་སོ། ། ཞོར་དུ་དྲ་བ་འདིའི་གཞི་གྲངས་མཛོད་དང་ལོ་རེའི་དྲྭ་གནས་དོ་དམ་གྱི་ཁྲལ་སོགས་ཀྱི་ཐད་ནས་རོགས་སྐྱོར་གནང་མཁན་སྤྲུལ་ཀློང་ཡངས་དང་མི་ཉག་པ་འཇམ་དབྱངས་འོད་ཟེར། ཇོ་ཁྲི་འཇམ་དབྱངས་བསྟན་པའི་རྒྱལ་མཚན།དྲེལ་དཀར་སྤྲུལ་སྐུ་བསོད་བློ་སོགས་སྔ་རྗེས་སུ་ཐུགས་ཁུར་རྒྱབ་སྐྱོར་གནང་མཁན་རྣམ་པར་བཀའ་དྲིན་ཞུ་བཞིན་ཡོད།                              ཅེས་བོད་རབ་བྱུང༡༧པའི་ལྕགས་མོ་ཡོས་ལོའི་ལོ་སར་ལ་གླིང་དྲྭ་འདིའི་གཙོ་བདག་སྨིན་དབུས་པོས་ཕུལ་བཀྲ་ཤིས་པར་གྱུར་ཅི

 

 

གླིང་གེ་སར་རྒྱལ་པོའི་སྒྲུང་རྙིང་ཕྱོགས་བསྡུས། པོད་ཆེན་༡༡༨ ཅན།

༢༠༡༩ལོའི་ཟླ་༨པའི་ཚེས་༡༣ ཉིན་ངེད་སི་ཁྲོན་བོད་ཡིག་དཔེ་རྙིང་བསྡུ་སྒྲིག་ཁང་གིས་བསྒྲིགས་ཤིང་།དཀར་མཛེས་ཁུལ་སྡེ་དགེ་རྫོང་གིས་གཙོ་བདག་དང་།སི་ཁྲོན་མི་རིགས་དཔེ་སྐྲུན་ཁང་གིས་བསྐྲུན་པའི་<<གླིང་རྗེ་གེ་སར་རྒྱལ་པོའི་སྒྲུང་རྙིང་ཕྱོགས་བསྡུས་རིན་བྲལ་ནོར་བུའི་ཕྲེང་བ།>>སྤུས་ལེགས་པོད་ཆེན་ ༡༡༨ ཀྱི་བདག་ཉིད་ཅན་གྱི་དཔེ་གསར་སྒོ་འབྱེད་མཛད་སྒོ། གླིང་ཡུལ་སྡེ་དགེ་རྫོང་ནས་རྟེན་འབྲེལ་ཕུན་སུམ་ཚོགས་པའི་ངང་བསྡུས།

 

 

རྒྱལ་ཡོངས་གེ་སར་བྱ་བའི་གཞུང་ལས་ཁང་གི་དབུ་གཙོས་སྒྲུང་རྙིང་པོད་ཕྲེང་ཆེན་མོ་ལེགས་གྲུབ་མཛད་སྒོར་གསུང་བཤད་ནང་བཞིན་པ། 

གླིང་རྗེ་གེ་སར་རྒྱལ་པོའི་སྒྲུང་རྙིང་ཕྱོགས་བསྡུས་རིན་བྲལ་

ནོར་བུའི་ཕྲེང་བ་ལེགས་གྲུབ་བྱུང་བ།

པདྨའི་ཐུགས་སྲས་རིགས་གསུམ་སེམས་དཔའི་གར། །

མི་རྗེ་དཔའ་བོ་ལྷ་ཡི་རྫུ་འཕྲུལ་ཅན། །

གླིང་རྗེ་གེ་སར་སྐྱེས་བུ་དོན་གྲུབ་ཅེས། །

སངས་རྒྱས་མི་གཟུགས་བྱོན་དེར་གུས་ཤིང་འདུད། །

 

དེ་ཡི་རྣམ་ཐར་རྟོགས་བརྗོད་ལྷ་ཡི་རྔ། །

འཛམ་གླིང་གོ་ལའི་གྱོན་ལ་ལྡིར་བའི་སྒྲའི། །

སྙིང་པོའི་སྒྲུང་མཛོད་ནོར་བུའི་ཕྲེང་བ་དེ། །

ལེགས་གྲུབ་སྒོ་འབྱེད་ལས་འདི་རྟེན་འབྲེལ་རྫས། །

དེ་ལ་འདིར་སི་ཁྲོན་ཞིང་ཆེན་བོད་ཡིག་དཔེ་རྙིང་བསྡུ་སྒྲིག་ཁང་གི་གླིང་གེ་སར་སྒྲུང་རྙིང་བྱ་བའི་ལས་སྒྲུབ་ཁང་དང་། སི་ཁྲོན་དཀར་མཛེས་ཁུལ་གླིང་ཡུལ་སྡེ་དགེ་རྫོང་སྲིད་གཞུང་གཉིས་ཀྱིས་མཉམ་བསྒྲུབས་ལས་གཞི། ད་ལྟ་འཛམ་གླིང་སྟེང་ཆེས་ཕུལ་དུ་བྱུང་བའི་བོད་ཀྱི་དཔའ་བོའི་ལོ་རྒྱུས་སྙན་རྩོམ་རིང་མོ་ཞེས།སྒྲུང་རིང་གཞན་གྱིས་བསྒྲུན་དུ་མེད་པ། གླིང་གེ་སར་གྱི་ལོ་རྒྱུས་སྙན་རྩོམ་རིང་མོའི་རྩ་བའི་དཔེ་མཛོད། དུས་རབས་རིམ་བྱུང་གི་འཕོ་འགྱུར་ཁྲོད། རྙིང་ཟད་རུལ་གསུམ་གྱི་ལམ་ཁ་བརྒྱུད་དེ་དུས་རབས་འདིར་སོན་པའི་གླིང་གེ་སར་སྒྲུང་ཆེས་རྙིང་ཤོས་དང་། ཆེས་དཔེ་དཀོན་རིགས་ཀྱི་དཔེ་མཛོད་དེ། ༼ གླིང་རྗེ་གེ་སར་རྒྱལ་པོའི་སྒྲུང་རྙིང་ཕྱོགས་བསྡུས་རིན་བྲལ་ནོར་བུའི་ཕྲེང་བ།༽ཅེས་པའི་དཔེ་ཚོགས་ཆེན་མོ། པོད་ཆེན་ ༡༡༨ ཀྱི་བདག་ཉིད་ཅན་འདིར།ཆེས་སྔ་བའི་ལག་བྲིས་མའི་བཤེར་དཔེ་དང་། ཤིང་པར་མའི་བསྐྱར་དཔེ་སོགས་མདོར་ན་པར་གཞི་དང་བྲིས་གཞི་མི་འདྲ་བའི་དཔེ་སྣ་ཉིས་བརྒྱ་ཙམ་གྱི་བཤེར་དཔེ་འདུས་ཡོད་པ་དང་། དེ་དག་གི་ཁྲོད་དུ་ད་སྔོན་རྒྱལ་ཡོངས་ཞིང་ལྗོངས་སོ་སོའི་གླིང་གེ་སར་བྱ་བའི་ལས་དོན་གཉེར་མཁན་དང་། ཞིབ་འཇུག་པ་སུས་ཀྱང་ལག་སོན་དང་། པར་བསྐྲུན་མ་མྱོང་བའི་སྒྲུང་དཔེ་རྙིང་བ་རྩ་ཆེན། དཔེར་ན། ཁམས་ནང་ཆེན་ནས་ལག་སོན་བྱུང་བའི་སྒྲུང་རྙིང་ཤིང་ཏ་ལའི་ལོ་མར་བྲིས་པའི་རྒྱ་རོང་ཡུང་རྫོང་དང་། ལྷོ་རོང་ནས་ལག་སོན་བྱུང་བའི་དཔེ་རྙིང་ལག་བྲིས་རྒྱ་གླིང་ཡིད་བཞིན་དབང་རྒྱལ།གཞན་ཨུ་ཁྲིའི་འབྲས་རྫོང་དང་། སྤུ་རི་ཤེལ་རྫོང་། འཛམ་བུའི་གསེར་རྫོང་།འདྲེ་གླིང་གཡུལ་འགྱེད། ཟི་མ་རྟ་རྫོང་། ཁ་ཆེའི་སྨན་རྫོང་ཆེན་མོ། རི་གླིང་གཡུལ་འགྱེད་ཆེན་མོ། མཐའ་རྫོང་ཆེན་མོ། ཐ་རམ་ནོར་བུའི་གཏེར་རྫོང་། བྲག་དཀར་སྤྲུལ་སྐུའི་བྲིས་དཔེ་ལས་བྱུང་བར་གསལ་བའི་དམྱལ་གླིང་འབྲུག་མོའི་མཐོང་སྣང་མ་ལྟ་བུས་མཚོན། དཔེ་སྣ་རྩ་ཆེན་ཁྱིམ་རྒྱུད་ཆོས་བདག་སོགས་ཀྱིས་བཀའ་རྒྱ་མ་ཁྲོལ་བའི་རིགས་རེ་འགའ་མ་གཏོགས། སྤྱི་ཚོགས་ཁྲོད་ཀྱི་ཀློག་པ་པོ་སྤྱིའི་མཐོང་ལམ་བརྒྱུད་མ་མྱོང་བའི་སྒྲུང་དཔེ་ལག་སོན་བྱུང་ཚད་འདིར་བཞུགས་སུ་གསོལ་ཡོད་པ་ཡིན་ལ། དཔེ་རྙིང་དེ་རིགས་ནི་བོད་མདོ་ཁམས་གཙོ་བོར་གྱུར་བའི་ས་ཕྱོགས་སོ་སོའི་རོང་འབྲོག་མང་ཚོགས་རྣམས་ཀྱིས་རང་རང་གི་མི་རབས་ནས་མི་རབས་བར་བརྒྱུད་པའི་ཕ་མེས་ཀྱི་ཤུལ་རྟེན་གནའ་རྫས་དང་། ཁྱིམ་གྱི་གཡང་རྟེན། དད་ཕྱག་གི་རྟེན་ཁྱད་འཕགས་ཡིན་པ་སོགས་རྩ་བའི་རིན་ཐང་ཆེན་པོ་མི་འདྲ་བ་དུ་མ་ལྡན་པ་ངོས་ཟིན་པའི་སྒོ་ནས། རིག་གནས་གསར་བརྗེ་ཞེས་པའི་དུས་རླུང་ནག་པོ་སོགས་ཀྱི་སྐབས་ཀྱང་། ལུས་དང་སྲོག་གིས་བསྲུངས་ཏེ་ཉར་ཚགས་བྱས་ཡོང་བ་ཁོ་ན་ཡིན་ཕྱིར། འདི་དག་དཔེ་རྙིང་བསྡུ་འཚོལ་བ་དག་གིས་དཔལ་འབྱོར་དང་དབང་ཆ་སོགས་ཀྱི་འགུག་ཤུགས་ལ་མ་ལྟོས་པར།མི་དང་མིའི་བར་གྱི་གྲོགས་འདང་མཛའ་བརྩེ་དང་། ཆོས་འབྲེལ་དད་མོས། བློས་ཐུབ་དང་ཡིད་ཆེས་ཁོ་ནའི་བྱེད་ཐབས་བརྒྱུད། སུས་ཀྱང་འགྲུབ་མི་ཐུབ་པའི་བྱ་བ་རླབས་ཆེན་ཞིག་མངོན་གྱུར་བྱུང་བའི་གྲུབ་འབྲས་ཡིན་པ་དང་།སྒྲུང་རྙིང་རྩ་དཔེ་ཆེན་མོ་འདི་དག་ལ། ད་ལྟའི་དཔེ་ཚོགས་གཞན་གང་གིས་ཀྱང་མི་འགྲན་པའི་རིན་ཐང་དང་ཁྱད་ཆོས་ཆེན་པོ་ལྡན་པ་ཡིན་པས། འདི་ལྟ་བུའི་འཛམ་གླིང་གི་ཕུག་ནོར་རྩ་ཆེན་ཞིག །གླིང་རྗེ་གེ་སར་སྐྱེས་བུ་སྐུ་འཁྲུངས་པའི་གནས་མཆོག་གླིང་ཡུལ་སྡེ་དགེ་རུ་བཞེངས་བསྐྲུན་ཐུབ་སོང་བ་ནི་ཆེས་དགའ་འོས་ཤིང་། ཆེས་སྤྲོ་སྣང་འབུམ་གྱིས་ཡིད་སེམས་གང་བ་ཞིག་རེད་ཨང་སྙམ་བཞིན་ངོ་སྤྲོད་མདོར་བསྡུས་ཙམ་བྱས་ན།

གཅིག།དཔེ་ཚོགས་འདིའི་ཁྲོད་དུ་དུས་རབས་བཅུ་དགུ་བ་ཡན་ཆོད་ཀྱི་བོད་ཀྱི་ཡུལ་ལུང་སོ་སོའི་ཡིག་མཁན་ཚོས་བྲིས་པའི་ཡིག་གཟུགས་སྣ་ཚོགས་འདུས་པར་མ་ཟད། འགའ་ཞིག་སྔ་རབས་ཀྱི་སྒྲུང་མཁན་དངོས་དང་། མཁས་གྲུབ་དམ་པ་མང་པོའི་ཕྱག་བྲིས་བྱིན་ཅན།སྐྱེས་ཆེན་མང་པོས་རབ་ཏུ་གནས་པའི་མེ་ཏོག་འཐོར་བ་ཡང་མང་དུ་བཞུགས་པ་དང་། ལྷག་པར་སྒྲུང་གཏེར་བ་སོ་སོའི་རང་ལུགས་ཀྱི་དབུ་ཁྱུད་དང་། མཁའ་འགྲོའི་བརྡ་ཡིག ། སྒྲུང་ཁག་འགའ་ཞིག་གི་ཁ་བྱང་དང་ཡང་བྱང་སོགས་ཆད་ལྷག་མེད་པར་རྩ་བའི་མ་ཕྱི་ཇི་བཞིན་བཞུགས་ཡོད་ཕྱིར།བྱིན་རླབས་ཀྱི་ཚན་ཁ་དང་། གནའ་དཔྱོད་རིག་དངོས་ཀྱི་རིན་ཐང་། ཐ་ན་ཡུལ་སྲོལ་མི་འདྲ་བའི་ཡིག་གཟུགས་སྣ་ཚོགས་ཕན་ཚུན་དཔྱད་བསྡུར་གྱི་རྒྱུ་ཆ་ཡན་ཆོད་གསོན་པོ་ཁོ་ན་རུ་བཞུགས་པ་ཡིན་པས།སྟོང་གསུམ་ནོར་གྱིས་བཀང་ཡང་ཁུག་པ་མེད་པའི་རིན་ཐང་ལྡན་པ་ཡིན་ཞེས་སྐད་གསེང་མཐོན་མོས་སྨྲ་ཆོག།

གཉིས། གླིང་སྒྲུང་ནི་བོད་ཀྱི་སྐད་བརྡ་རིག་པའི་གཏེར་མཛོད་གཅིག་པུ་ཡིན་པའི་ངོས་ནས་གཞལ་ན། དཔེ་ཚོགས་འདིར་བཞུགས་པའི་སྒྲུང་དཔེ་མང་ཆེ་བ། བོད་ཡུལ་སྟོད་སྨད་བར་གསུམ་གྱི་ཡུལ་ལུང་སོ་སོའི་ཡུལ་སྐད་དང་། ལུང་སྐད་དབང་བཙན་དུ་བྱས་ནས་བྲིས་པ་ཁོ་ན་ཡིན་པ་ལ་དག་བསྒྲིགས་དང་། བཅད་གཏུབ་ཀྱི་ལྷད་མ་ཕོག་པར་རང་སོར་དངོས་དཔེ་བསྐྱར་བཤུས་ཁོ་ནས་གྲུབ་པ་ཡིན་ཕྱིར། དུས་རབས་བཅུ་གཅིག་པ་ནས་ད་ལྟའི་བར་གྱི་མདོ་ཁམས་གཉིས་གཙོ་བོ་ཡིན་པའི་བོད་རོང་འབྲོང་གི་འཚོ་བའི་གྲུབ་ཚུལ་དང་གནས་སྟངས་ནས། ཡུལ་ལུང་སོ་སོའི་སྐད་བརྡའི་བར་ཁྱད་ལ་དབྱེ་ཞིབ་བྱེད་པར་དཔྱད་གཞིའི་སྐར་ཁུང་ལྟ་བུའི་རིན་ཐང་ལྡན་པ་ཡིན་ལ། དཔེར་ན། བོད་ཀྱི་སྐད་བརྡའི་འཕེལ་རིམ་ལ་ཞིབ་འཇུག་ཅིག་དགོས་ཚེ། ད་ཆ་འཛམ་བུ་གླིང་དུ་སྒྲུང་རྙིང་ཕྱོགས་བསྡུས་འདི་ལྟ་བུའི་དཔྱད་གཞིའི་རིན་ཐང་ལྡན་པ་ཞིག་གཞར་ཡང་རྙེད་དུ་མེད་པ་ཁ་ཚོད་རྦད་ཀྱིས་ཆོད་པ་ཡིན།

 

གསུམ། དུས་རབས་མང་པོའི་འཕོ་འགྱུར་དང། རིག་གནས་བར་རྒུད་ཀྱི་དབང་གིས། གླིང་གེ་སར་སྒྲུང་གི་རྩ་བའི་བྱུང་འཕེལ་བརྒྱུད་རིམ་ལ། དར་རྒུད་ཅི་འདྲ་བྱུང་ཡོད་མིན་ལ་ཕྱིར་ཞིབ་ཅིག་བྱེད་དགོས་པའི་དབང་དུ་བཏང་ན། འདིར་དུས་རབས་མི་འདྲ་བ་དུ་མའི་ནང་བྱུང་བའི་སྒྲུང་སྣ་མི་འདྲ་བ་དང་། སྒྲུང་དཔེ་གཅིག་ལ་བྲིས་གཞི་མི་འདྲ་བ། དེ་བཞིན་དུ་གླིང་སྒྲུང་སོ་སོའི་ནང་གི་མི་སྣ་དང་བྱ་དངོས་བར་གྱི་ཁྱད་པར་བསྡུར་བ་ལ། པར་གཞི་དང་བྲིས་གཞི་སྣ་མང་རང་བཞིན་ལྡན་པ། དེ་བཞིན་དུ་ཁ་བྱང་འདྲ་ཡང་གཞུང་དོན་མི་འདྲ་བ་དང་། གཞུང་དོན་ཕྱོགས་མཚུངས་ཡིན་པ་ལ་ཁ་བྱང་མི་འདྲ་བ་སོགས། དཔྱད་གཞི་སྣ་མང་གིས་གྲུབ་པའི་གླིང་སྒྲུང་རྙིང་པའི་དཔེ་ཚོགས་འདི་ལྟ་བུའི་རྩ་ཆེན་ཞིག། ད་ལྟ་འཛམ་བུ་གླིང་ན་མེད་པ་དངོས་མཐོང་ལག་ཟིན་ཡིན་པས། གླིང་སྒྲུང་གི་དུས་རབས་འདིར་སྐྱེས་པའི་རྒྱ་ཆེའི་དོན་གཉེར་ཅན་རྣམས་ལ་མཚོན་ན། ངོ་མ་ཡིད་བཞིན་ནོར་བུ་ལས་ཀྱང་ནོར་བུ་རྩ་ཆེན་དུ་གྲུབ་པའི་དཔེ་ཕྲེང་ཆེན་མོ་དེ་ཉིད། ཉེ་ལམ་སི་ཁྲོན་མི་རིགས་དཔེ་སྐྲུན་ཁང་ནས་བསྐྲུན་ཐུབ་སོང་བར་མ་ཟད། མི་ལོའི་ཉི་ཤུ་ཙམ་ལ་འཚོལ་བསྡུའི་ལས་ཀ་དངོས་སུ་གཉེར་མཁན་བདག་གི་རེ་བར། དཔེ་ཕྲེང་འདིའི་ཐོག་མའི་དཔེ་ཕུད་དང་། དཔེ་ཕྲེང་གི་བདག་དབང་སོགས་ཁམས་གླིང་ཚང་ཨ་ཕྱུག་ས་ཆ་སྟེ།གླིང་རྗེ་གེ་སར་རྒྱལ་པོ་སྐུ་འཁྲུངས་པའི་གནས་མཆོག་ཏུ་བཞུགས་ཐུབ་ན་སྙམ་པ་བཞིན། འབྲེལ་ཡོད་དབུ་ཁྲིད་མི་སྣ་དང་གྲོགས་བཟང་ཚོས་རྒྱབ་སྐྱོར་གྱི་བཀའ་དྲིན་འོག་ནས། གུས་པོའི་རེ་བ་ལྟར་དཔེ་ཕྲེང་ཆེན་མོའི་ཐོག་མའི་དཔེ་ཕུད་གླིང་ཡུལ་སྡེ་དགེ་རུ་གདན་དྲངས་ཏེ་བཞུགས་སུ་གསོལ་ཐུབ་ཡོད་པས་དགའ་བ་རབ་ཏུ་འཕེལ།

དཔེ་ཕུད་སྒོ་འབྱེད་སྐབས་གཙོ་སྒྲིག་པས་སྒྲུང་རྙིང་བསྡུ་བསྒྲིགས་བྱས་རིམ་་སོགས་ངོ་སྤྲོད་པའི་ཚུལ།

 

གླིང་རྗེ་གེ་སར་རྒྱལ་པོའི་སྒྲུང་རྙིང་ཕྱོགས་བསྡུས་རིན་བྲལ་ནོར་བུའི་ཕྲེང་བའི་དཔེ་ཕུད་སྒོ་འབྱེད་སྐབས་ཀྱི་ཚོགས་མི་ཡོངས་ཀྱི་མཉམ་པར།

དངོས་གྲུབ་འབྱུང་བའི་ནོར་བུ་འདི་ཉིད་ཡིན།།

ངོ་མཚར་འཕེལ་བའི་གཏམ་མཛོད་འདི་ཉིད་ཡིན།།

དུས་རྒུད་གསོ་བའི་རིམ་གྲོའང་འདི་ཉིད་ཡིན།།

ཀུན་ལ་ངོམ་རིན་ཡོད་པ་འདི་ཉིད་ཡིན།།

 

འདི་ནི་མདོ་ཁམས་གླིང་ཡུལ་ཆེན་པོའི་གཙོས།།

བསིལ་ལྡན་ལྗོངས་ཀྱི་ཡུལ་སྲོལ་གོམས་གཤིས་དང་།།

མི་གཤིས་ཆོས་སྲིད་ལོ་རྒྱུས་རབ་གསལ་བའི།།

རྟོགས་བརྗོད་ཡིག་ཚང་ཡིན་ནོ་དགའ་བར་གྱིས།།

 

འདི་ཉིད་གང་དུ་བཞུགས་པའི་ས་ཕྱོགས་སུ།།

སྡེ་བཞིའི་དཔལ་འཕེལ་རྫོགས་ལྡན་སྣང་བ་རྒྱས།།

དགེ་ལེགས་དོན་འགྲུབ་མི་མཐུན་གཡུལ་ལས་རྒྱལ།།

ཀུན་ཏུ་བཀྲ་ཤིས་ཕུན་སུམ་ཚོགས་པར་ཤོག།

ཅེས་གླིང་རྗེ་གེ་སར་སྐྱེས་བུའི་རྟོགས་བརྗོད་བསྡུ་སྒྲིག་གི་ལས་ལ་དབང་བའི་སྨོན་ལམ་ཅན། སྨིན་དབུས་ཨ་དཀར་མིང་དེས་ཕུལ། བཀྲ་ཤིས།

 

  

 

 

 

ཀློག་གྲངས།:[308]
གླིང་གེ་སར་རིག་གནས་དྲྭ་ཚིགས།
དྲ་ཚིགས་འདིའི་པར་དབང་ཡོད་ཚད་གླིང་གེ་སར་རིག་གནས་དྲྭ་བར་དབང་བས།
འདི་ནས་རྩོམ་ཡིག་དང་བརྙན་རིས་དག་དྲྭ་བདག་ལ་འབྲེལ་གཏུགས་མ་བྱས་པར་མི་བཀོལ་བར་ཞུ།
འབྲེལ་ཡོད་རྩོམ་ཡིག་སྐུར་གནས།   382740503@qq.com