སྐད་འཇོག་ས།

གླིང་གེ་སར་དྲ་བ་འདི་གཉེར་བའི་དམིགས་ཡུལ་ནི། བོད་ཀྱི་མི་སྣ་དཔའ་བོ་གླིང་རྗེ་གེ་སར་ནི་བོད་ཀྱི་ལོ་རྒྱུས་སྟེང་དངོས་སུ་བྱུང་བའི་དོན་གནས་ཀྱི་མི་སྣ་ཞིག་ཡིན་ན་ཡང་། དུས་ཀྱི་གནས་བབ་ཀྱིས་མི་སྣ་འདི་ལ་ངག་ཏུ་བརྒྱུད་པའི་དོན་དངོས་ལོ་རྒྱུས་ཐན་ཐུན་ལ་གཞི་བཅོལ་བའི་ཡིག་ཐོག་གི་ལོ་རྒྱུས་ཐད་ནས་ལྷ་སྒྲུང་ལྟ་བུར་ཆགས་ཏེ་ས་ཁྱབ་རྡོ་ཁྱབ་ཏུ་གྱུར་བ་དང་གཅིགགླིང་གེ་སར་གྱི་མི་རབས་ཕྱི་མ་དག་གིས་རང་རིགས་ཀྱི་མེས་པོའི་དོན་དངོས་ལོ་རྒྱུས་ཀྱི་དཔྱད་གཞི་ལ་ཆེར་མ་དམིགས་པར། དཔའ་བོའི་བསྟོད་སྒྲུང་གི་ཁ་སྙན་ངག་གི་འཇིག་རྟེན་ཞིག་ཏུ་ཁྲིད་དེ་རྩོམ་པ་པོ་རང་རང་གིས་རྟོག་པ་འཆར་ཡན་གྱི་ལམ་ནས་བྲིས་པ་མང་སྟབས། བོད་ཀྱི་དཔའ་བོའི་ལོ་རྒྱུས་ལ་དོན་དངོས་དང་ཉེ་བའི་ལོ་རྒྱུས་དང་། དཔའ་བོའི་བསྟོད་སྒྲུང་གི་སྙན་ངག་གཉིས་ལས་ཕྱི་མ་ཁྱབ་ཆེ་བར་སོང་སྟེ། ད་ཆ་འཛམ་གླིང་གི་རྟོགས་བརྗོད་ཆེན་མོ་འདི་ལ་སྤྱིའི་ཆ་ནས་སྙན་གྲགས་དང་མཛད་འཕྲིན་རྒྱ་ཤིན་ཏུ་ཆེ་ན་ཡང་།ཞིབ་གསལ་གྱི་ཆ་ན་སྒྲུང་མཁན་སོ་སོའི་འབྲི་སྟངས་མི་འདྲ་བ་དང་།སྔ་ཕྱི་མི་མཐུན་པ་སོགས་ལོ་རྒྱུས་པ་སོ་སོའི་འདོད་པ་མི་མཐུན་ས་མང་པོ་ཞིག་གིས་བོད་ཀྱི་གླིང་གེ་སར་རིག་གཞུང་ལོ་རྒྱུས་ལ་ཞིབ་འཇུག་པ་རྣམ་པར་དཀའ་ངལ་ཆེ་བའི་གནས་བབ་ལ་ཁ་གཏད་དེ། གླིང་གེ་སར་རིག་གནས་ཀྱི་ཕྱོགས་ཡོངས་ཀྱི་དཔྱད་གཞིའི་མ་ལགས་འཐུས་སྒོ་ཇེ་ཚང་ལ་གཏོང་ཨེ་ཐུབ་སྙམ་ནས་གཉེར་བ་ཡིན་མོད། འོན་ཀྱང་དྲ་བ་འདི་གཉེར་བ་པོར་བོད་ཁུལ་ཡོངས་ཀྱི་གླིང་གེ་སར་དོན་དངོས་ལོ་རྒྱུས་དང་ཉེ་བའི་དཔྱད་གཞི་ལ་ཐོས་མཐོང་གི་རྒྱ་ཆུང་བས། གླིང་གེ་སར་རིག་གནས་ལ་སྤྲོ་སྣང་ལྡན་པའི་རྒྱ་ཆེའི་གྲོགས་པོ་དག་གིས་དྲ་བ་འདིའི་ས་བཅད་སོ་སོའི་ཁྱབ་ཁོངས་ལ་དཔྱད་གཞི་བསྡུ་རུབ་དང་། གླིང་གེ་སར་དཔྱད་རྩོམ། གླིང་གེ་སར་སྒྱུ་རྩལ་རི་མོ། གླིང་གེ་སར་དོན་དངོས་ལོ་རྒྱུས།གླིང་གེ་སར་དང་འབྲེལ་བའི་བོད་ཡུལ་སྟོད་སྨད་བར་གསུམ་གྱི་ཡུལ་སྲོལ། གླིང་གེ་སར་འཁྲབ་གཞུང་། གླིང་གེ་སར་ལོ་རྒྱུས་སམ་བསྟོད་སྒྲུང་གསར་རྙིང་དང་རྩོམ་པ་པོ་དང་འབྲེལ་ཡོད་མི་སྣ་ངོ་སྤྲོད་སོགས་མཁོ་སྤྲོད་གནང་སྦྱིན་གྱི་བཀའ་དྲིན་སྐྱོང་རྒྱུ། མདོར་ན་བོད་རང་གི་དཔའ་བོའི་ལོ་རྒྱུས་ལ་གཅེས་སྐྱོང་གི་འདུ་ཤེས་ལྡན་པའི་སྒོ་ནས་ཕྱོགས་ཡོངས་ལ་མཛུབ་སྟོན་རྒྱབ་སྐྱོར་གནང་རྒྱུ་བཀའ་དྲིན་ཆེ་ཞུ་བ་དང་། ནོར་འཁྲུལ་དང་རིག་གནས་ཀྱིས་མ་འཇོན་ས་ཡོད་ན་རྒྱ་ཆེའི་ཀློག་པ་པོ་རྣམ་པར་གུས་བཤགས་བྱེད་ངེས་ཡིན། དེ་དང་ལྷན་བོད་ཀྱི་མེས་པོ་གླིང་རྗེ་སར་སྐྱེས་བུའི་རྣམ་ཐར་ལོ་རྒྱུས་རིང་མོའི་མཛད་འཕྲིན་འཛམ་གླིང་རིག་གནས་བང་མཛོད་ཀྱི་སྙིང་བཅུད་འདོད་འབྱུང་གི་ཡིད་བཞིན་ནོར་བུ་ལྟ་བུར་འགྱུར་ཐུབ་པའི་སྨོན་འདུན་ཡང་ཡང་ཞུ་བ་ལགས་སོ། ། ཞོར་དུ་དྲ་བ་འདིའི་གཞི་གྲངས་མཛོད་དང་ལོ་རེའི་དྲྭ་གནས་དོ་དམ་གྱི་ཁྲལ་སོགས་ཀྱི་ཐད་ནས་རོགས་སྐྱོར་གནང་མཁན་སྤྲུལ་ཀློང་ཡངས་དང་མི་ཉག་པ་འཇམ་དབྱངས་འོད་ཟེར། ཇོ་ཁྲི་འཇམ་དབྱངས་བསྟན་པའི་རྒྱལ་མཚན།དྲེལ་དཀར་སྤྲུལ་སྐུ་བསོད་བློ་སོགས་སྔ་རྗེས་སུ་ཐུགས་ཁུར་རྒྱབ་སྐྱོར་གནང་མཁན་རྣམ་པར་བཀའ་དྲིན་ཞུ་བཞིན་ཡོད།                              ཅེས་བོད་རབ་བྱུང༡༧པའི་ལྕགས་མོ་ཡོས་ལོའི་ལོ་སར་ལ་གླིང་དྲྭ་འདིའི་གཙོ་བདག་སྨིན་དབུས་པོས་ཕུལ་བཀྲ་ཤིས་པར་གྱུར་ཅི

 

 

རྟ་རྒྱུག་འཁྲབ་གཞུང་དཔྱོད་ལྡན་སྐལ་བཟང་དགའ་བའི་དུས་སྟོན།༼ ཁག་གཉིས་པ། ༽

 ༼དྲྭ་ངོས་གོང་མའི་འཕྲོ། ༽ 

འཇིགས་མེད་རྡོ་རྗེས་བརྩམས།

སྨར་མདོ་གེ་སར་ཕོ་བྲང་པདྨ་ལྷ་རྩེའི་ཟློས་གར་མྱུར་སྐྱོབ་ཚོགས་པས་མཁོ་འདོན་མཛད།


 

            འཁྲབ་ཚན་ལྔ་བ།

ཇོ་རུ་ཕུ་ནུའི་འདུས་གྲྭལ་འཛོམས།།

འབྲུག་མོས་རྟ་མཆོག་ལྕག་ཚན་ཕུལ།།

ཨ་མྱེས་རྟ་རྒྱུགས་གྲོས་ཐག་བཅད།།

ཐམས་ཅད་དགའ་སྐྱིད་ཡུལ་དུ་གྱེས།།

ཇོ་སྐྱིད་དམ་པ་སངས་རྒྱས་དེ་ཉིད་གླིང་འདུ་ར་སྟག་ཐང་ཁྲ་མོར་ཕུ་ནུའི་འདུས་གྲྭལ་དུ་འཛོམས་ཚེ་སེང་ལྕམ་འབྲུག་མོའི་ཆིབས་པ་རྐྱང་བུ་ཁ་དཀར་དང་ལྕག་ཚན་བསམ་པའི་དོན་གྲུབ་ཕུལ་བ་མ་ཟད། བཀྲ་ཤིས་བདེན་ཚིག་གིས་ཐུགས་སྨོན་མཛད། གླིང་ལྷ་སྡེ་སྟོད་སྨད་བར་གསུམ་གྱིས་ཚད་མི་འདྲ་བའི་གྲོས་གཞི་སོ་སོར་བཏོན། ཨ་མྱེ་ཁྲ་རྒན་ནས་གྲོས་ཐག་བཅད་ཅིང་ཡུལ་དུ་གྱེས་སོ།།

སེང་ལྕམ་འབྲུག་མོ།

ཆིབས་ལྷ་རྟ་རྐྱང་ཆུང་ཁ་དཀར་དང་།།

ལྕག་ཚན་བསམ་པའི་དོན་གྲུབ་གཉིས།།

བཀྲ་ཤིས་ལྷ་དར་དཀར་པོ་གསུམ།།

དུས་དེ་རིང་ལྷ་སྲས་ཁྱེད་ལ་འབུལ།།

ལྷ་དཀར་ཕྱོགས་བསྟན་པ་སྲུང་བ་དང་།།

བདུད་ནག་ཕྱོགས་ཆོམས་ལ་ཕབ་པ་དང་།།

དུས་སྙིགས་མའི་རྒུད་པ་གསོ་བ་སོགས།།

ཐུགས་བཞེད་དོན་གེགས་མེད་ལྷུན་གྲུབ་ཤོག །

གདོང་བཙན་སྣང་ལུ་ཨ་དཔལ།

ཡ། ང་གདོང་བཙན་གྱིས་བསམ་པ་ལ།

ཀུན་ལ་གྲགས་པའི་རྟ་རྒྱུགས་དགོས།།

རྒྱུགས་མགོ་རྒྱ་གར་ཡུལ་དུ་གཏད།།

རྒྱུགས་གཏིང་རྒྱ་ནག་ཡུལ་ལ་བྱེད།།

ལྟད་མོ་དབུ་ནག་བོད་ནས་བལྟ།།

སེང་སྟག་ཨ་དོམ།

         ང་སེང་སྟག་གིས་བསམ་པ་ལ།

རྒྱུགས་མགོ་ཨ་སྔོན་གནམ་ལ་གཏད།།

རྒྱུགས་རྟིང་དོག་མོ་ས་ལ་གཏད།།

ལས་ཟོག་ཉི་ཟླའི་ཟུར་ན་བཞག །

ལྟད་མོ་བར་སྣང་ཁམས་ནས་བལྟ།།

རྒྱ་ཚ་ཞལ་དཀར།

ཡ། ང་ཞལ་དཀར་གྱིས་བསམ་པ་ལ།

རྒྱུགས་མགོ་ཀུ་ར་རྫ་ལ་གཏད།།

རྒྱུགས་རྟིང་ཨ་ཡུ་ཏིས་ལ་གཏད།།

ལྟད་མོ་ལྷ་ཏིས་མགོ་ནས་བལྟ།།

བསང་མཆོད་ཀླུ་ཏིས་མགོ་ནས་བྱེད།།

གཟུ་བ།                            ༼     རོང་ཚ་ཁྲ་རྒན་གྱིས་  ༽

རྒྱ་བོད་བར་གྱི་རྟག་རྒྱུགས་དང་།།

ཉི་ཟླའི་བར་གྱི་རྟིང་མ་དེ།།

རེད་དང་རེད་དེ་ལག་ལེན་དཀའ།།

རྒྱུགས་མགོ་ཀུ་ར་རྫ་ལ་གཏད།།

རྒྱུགས་རྟིང་ཨ་ཡུ་ཏིས་ལ་གཏད།།

ལྟད་མོ་ཀླུ་ཏིས་མགོ་ནས་བལྟ།།

བསང་མཆོད་ལྷ་ཏིས་མགོ་ནས་བྱེད།།

རྒྱུགས་ན་དཀྱུས་ཐག་དེ་ཀའི་ཆོད།།

        ༼     རྔ་དང་རོལ་དབྱངས་ཁྲོད་ནས་བསང་མཆོད་དུ་ཆས་ཏེ་བསང་མཆོད་སྤྲོས་པ་ཅན་ཕུལ་རྗེས། ཡོལ་བ་དལ་གྱིས་བསུམ།   ༽

                                                   འཁྲབ་ཚན་དྲུག་པ།

   གླིང་དཀར་ལྷ་སྡེ་རུ་གསུམ་བསྒྲིག །

   རྟ་རྒྱུགས་གསེར་ཁྲིའི་གོང་བ་རྩོད།།

                                                                         འབྲུག་མོས་མི་རྟ་རྩིས་སྤྲོད་བྱས།།

                                                                         ཁྲོ་ལུས་ཇོ་རུ་བཤོལ་མ་ཐེབས།།

གླིང་ཚོ་དྲུག་ཕུ་ནུ་སུམ་ཅུ་དེ་རྨ་ཨ་ཡུའི་ཏིས་ཆེན་གོང་མ་ནས་ཤོག་གསུམ་དུ་བསྒོས་ཤིང་མགྱོགས་རྟ་ཕོའི་བང་རྩལ་འགྲན་བཞིན་པའི་ཚེ་ན། ལྟད་མོ་མཁན་ལ་སྐྱ་ལོའི་སེང་ལྩམ་འབྲུག་མོ། སྔོ་ལོའི་བུ་མོ་ནེའུ་ཆུང་། སྤྱི་དཔོན་ལྷ་མོ་གཡུ་སྒྲོན། ཁྲོ་ཐུང་བུ་མོ་ཁྲོ་མཚོ་སོགས་མ་སྲུ་སྤུན་བདུན་དང་གླིང་འདུས་སྡེ་ཡོངས་ལ་སེང་ལྕམ་འབྲུག་མོའི་མི་རྟ་རྩིས་སྤྲོད་གནང་། རྨ་ཕོ་རོག་ཐང་གི་མར་གཤམ་ནས་ཇོ་སྐྱིད་དམ་པ་སངས་རྒྱས་དང་། ཁྱི་ཤེས་བུ་ཡི་རྒུ་རུ་ཐུག སྟག་རོང་དཔོན་པོ་ཁྲོ་ཐུང་གི་ཇོ་རུ་བཤོལ་བའི་ཐབས་ཚུལ་སྣ་ཚོགས་བྱད་ཀྱང་བཤོལ་མ་ཐེབས།

གཟི་བ།    ༼    ཨ་མྱེ་རོང་ཚ་ཁྲ་རྒན་གྱིས།     ༽

ཀིས། ཉོན་ཅིག ཉོན་གཉིས། ཉོན་གསུམ། གླིང་ཕ་ཟོག་ནོར་བུ་ཆ་བདུན། ཕ་སྐྱ་ལོའི་ནོར་དང་ལོངས་སྤྱོད། སྨན་འབྲུག་མོའི་གཟུགས་དང་ལང་ཚོ།། བུ་འབྲུག་རྒྱལ་སྙན་དང་གྲགས་པ་སོགས་མགྱོགས་རྟ་མཆོག་གི་རྒྱན་ལ་རྩོད་རྒྱུ་ཡིན་པས་ཆིབས་མགྱོགས་པའི་བང་ཁ་ད་རྩོད་ཅིག

ཚང་མས། ༼    ཀིས་ཞེས་ རོལ་དབྱངས་ཁྲོད་དུ་རྒྱུགས་ཏེ། རྟ་འགྲོས་རྣམ་འགྱུར་སྣ་ཚོགས་ཀྱིས་རྒྱུགས་རྗེས་ མ་སྲུ་སྤུན་བདུན་སོགས་ཀྱིས་ལྟད་མོར་ཕེབས་ནས་གླིང་འདུས་སྡེ་ཡོངས་ལ་སེང་ལྕམ་འབྲུག་མོའི་མི་རྟ་རྩིས་སྤྲོད་གནང་། དཔའ་ཐུལ་རིམ་བྱོན་གྱི་ངོ་སྤྲོད་གླུའི་འགྲོས་དང་བསྟུན་ཉམས་འགྱུར་ལྡན་པའི་རིམ་པར་བྱོན།    ༽

སེང་ལྕམ་འབྲུག་མོ།

ཡ། ཁྱེད་འདིར་ཚོགས་ཀྱི་གླིང་དཀར་མ་སྲུ་ཚོ། དེ་རིང་གླིང་ཕུ་ནུ་ཡོངས་ཀྱིས་རྟ་རྒྱུགས་རྒྱལ་འཇོག་ལ། ངས་དཔའ་ཐུལ་རིམ་བྱོན་གྱི་ངོ་སྤྲོད་གླུ་འདི་འདྲ་ཞིག་ཡོད་པས་གསན་པར་ཞུ།།

གླུ་ཨ་ལ་ལ་མོ་ཨ་ལ་ལེན།།

ཐ་ལ་ངག་གི་འགུགས་ལུགས་རེད།།

གནས་གཡུ་ལོ་བཀོད་པའི་ཞིང་ཁམས་ནས།།

མ་རྗེ་བཙུན་འཕགས་མ་སྒྲོལ་མ་མཁྱེན།།

སྨན་ང་དང་ང་ངོ་མ་ཤེས་ན།།

སྒ་སྐྱ་ལོའི་བུ་མོ་ཨ་འབྲུག་ཟེར།།

ཚུར་ཉོན་དང་ལྟད་མོ་འདི་འདྲ་གདའ།།

སྟོད་ཀ་ལིའི་ལྷ་ལམ་བར་མ་ན།།

ཁོ་མི་དཀར་དུང་གི་ཞལ་རས་ཅན།།

གདོང་བཙན་པོ་སྣང་ལུའི་ཨ་དཔལ་རེད།།

ཁོ་གླིང་དཀར་དཔོན་པོ་ཡོངས་ངེས་རེད།།

ཞབས་རྟ་ཕོ་གཡུ་བྱ་རྟེའུ་སྔོན་ཟེར།།

འདི་རྟ་ཞིག་མ་རེད་བྱ་ཞིག་རེད།།

དེ་རྗེས་སྐྱེས་བུ་བྱོན་རྒྱུ་དེ།།

སྟག་རོང་དཔོན་པོ་གཟིག་འཕེན་རེད།།

ཞབས་རྟ་ཕོ་ཕོ་རོག་སྟོང་ཆམ་རེད།།

དེ་རྗེས་སྐྱེས་བུ་བྱོན་རྒྱུ་དེ།།

ཁྲོ་ཐུང་ཉ་ཚ་ཨ་བརྟན་རེད།།

ཞབས་རྟ་ཕོ་གངས་རི་ལྡིང་ཤེས་རེད།

དེ་རྗེས་སྐྱེས་བུ་བྱོན་རྒྱུ་དེ།།

གསེར་བའི་ཉི་འབུམ་དར་ཡག་རེད།།

ཞབས་རྟ་ཕོ་ངང་བ་གསེར་སྒོང་རེད།།

དེ་རྗེས་སྐྱེས་བུ་བྱོན་རྒྱུ་དེ།།

དཔའ་ཡ་མེད་སེང་སྟག་ཨ་དོམ་རེད།།

ཞབས་རྟ་ཕོ་སྟོང་རི་དལ་འཇམ་ཟེར།།

དེ་རྗེས་སྐྱེས་བུ་བྱོན་རྒྱུ་དེ།།

འབྲི་སྒ་བདེའི་ཆོས་སྐྱོང་བེར་ནག་རེད།།

ཞབས་རྟ་ཕོ་རླུང་ནག་འཚུབ་ཆེན་རེད།།

དེ་རྗེས་སྐྱེས་བུ་བྱོན་རྒྱུ་དེ།།

མི་ཆེན་རྒྱལ་བའི་ལྷུན་གྲུབ་རེད།།

ཞབས་འདོ་བ་ཀྭ་མ་ཡ་མེད་རེད།།

དེ་རྗེས་སྐྱེས་བུ་བྱོན་རྒྱུ་དེ།།

བློན་ཆེན་གུ་རུ་རྒྱལ་མཚན་རེད།།

ཞབས་འདོ་བ་སྨུག་བུ་དལ་འཇམ་རེད།།

དེ་རྗེས་སྐྱེས་བུ་བྱོན་རྒྱུ་དེ།།

དཔའ་ཡ་མེད་རྒྱལ་ཚ་ཞལ་དཀར་རེད།།

ཞབས་རྟ་ཕོ་རྒྱ་བྱ་སོག་དཀར་ཟེར།།

དེ་རྗེས་སྐྱེས་བུ་བྱོན་རྒྱུ་དེ།།

ཚ་ཞིང་འདན་མ་བྱང་ཁྲ་རེད།།

ཞབས་རྟ་ཕོ་ངུལ་ཕྲུག་ལྡེམ་པ་ཟེར།།

དེ་རྗེས་སྐྱེས་བུ་བྱོན་རྒྱུ་དེ།།

ནུ་བོ་རོང་ཚ་ལྷ་དར་རེད།།

ཞབས་འདོ་བ་རྨ་བྱ་མདངས་ཅན་ཟེར།།

དེ་རྗེས་སྐྱེས་བུ་བྱོན་རྒྱུ་དེ།།

དར་འཕེན་དུག་གི་སྡོང་བོ་རེད།།

ཞབས་འདོ་བ་སྨུ་གུ་ལྡིང་ཤེས་ཟེར།།

དེ་རྗེས་སྐྱེས་བུ་བྱོན་རྒྱུ་དེ།།

ཨ་མྱེ་རོང་ཚ་ཁྲ་རྒན་རེད།།

ཞབས་རྟ་ཕོ་ཤ་རྐྱང་དྲིལ་མགོ་ཟེར།།

དེ་རྗེས་སྐྱེས་བུ་བྱོན་རྒྱུ་དེ།།

སྟག་རོང་དཔོན་པོ་ཁྲོ་རྒྱལ་རེད།།

ཞབས་རྟ་ཕོ་འཕར་བ་རྔ་ནག་རེད།།

དེ་རྗེས་སྐྱེས་བུ་བྱོན་རྒྱུ་དེ།།

སེང་བློན་ཀ་མ་རི་སྐྱེས་རེད།།

ཞབས་རྟ་ཕོ་མཚལ་བུ་དམར་པོ་ཟེར།

དེ་རྗེས་སྐྱེས་བུ་བྱོན་རྒྱུ་དེ།།

བརྒྱ་དཔོན་བན་དེ་དམར་པོ་རེད།།

ཞབས་འདོ་བ་རྨ་བྱ་འཕུར་ཤེས་ཟེར།།

དེ་རྗེས་སྐྱེས་བུ་བྱོན་རྒྱུ་དེ།།

སྟོང་དཔོན་ཤེས་ཆེན་ཉི་མ་རེད།།

ཞབས་འདོ་བ་སྟོང་རྒྱུག་ངལ་འཇམ་ཟེར།

དེ་རྗེས་སྐྱེས་བུ་བྱོན་རྒྱུ་དེ།།

ལྕགས་ནག་དཔོན་པོ་སེང་སེང་རེད།།

ཞབས་འདོ་བ་ཁྱུང་ནག་ལྡིང་ཤེས་ཟེར།

དེ་རྗེས་སྐྱེས་བུ་བྱོན་རྒྱུ་དེ།།

བཅོ་ལྔའི་དཔའ་གསར་ཟླ་བ་རེད།།

ཞབས་འདོ་བ་མཚལ་སྟག་འཁྱམས་ཤེས་ཟེར།

དེ་རྗེས་སྐྱེས་བུ་བྱོན་རྒྱུ་དེ།།

སྤྱི་དཔོན་སྣང་ངུ་གཡུ་སྟག་རེད།།

ཞབས་འདོ་བ་གཡུ་རྡོ་འཕུར་ཤེས་ཟེར།

དེ་རྗེས་སྐྱེས་བུ་བྱོན་རྒྱུ་དེ།།

གླིང་གི་མི་ཆུང་ཁ་བདེ་རེད།།

རྟ་ཆུང་ཟི་མ་འཕུར་ཤེས་ཟེར།

དེ་རྗེས་སྐྱེས་བུ་བྱོན་རྒྱུ་དེ།།

གཡོག་ཨ་ཁོད་ཐར་བའི་ཟོར་སྣ་རེད།།

ཞབས་འདོ་བ་དགོ་ཆུང་ཁ་དཀར་ཟེར།

དེ་རྗེས་སྐྱེས་བུ་བྱོན་རྒྱུ་དེ།།

ཁྱི་ཤེས་བུ་ཡི་རྒུ་རུ་རེད།།

ཞབས་རྟ་ཕོ་ཀ་བ་ཁྲི་སྐྱིད་ཟེར།།

དེ་རྗེས་སྐྱེས་བུ་བྱོན་རྒྱུ་དེ།།

འགོག་མོའི་བུ་ཆུང་ཇོ་རུ་རེད།།

ཞབས་རྟ་ཕོ་རྐྱང་བུ་ཁ་དཀར་ཟེར།།

གླུ་གོ་ན་རྣ་བའི་བདུད་རྩི་ཡིན།།

མ་གོའི་གླུ་ལ་འབྲེལ་བ་མེད།།

སྨན་ནེའུ་ཆུང་ཐུགས་ལ་དེ་ལྟར་ཞོག །

ནེའུ་ཆུང་མ།

ཨ་རོག་བུ་མོ་འབྲུག་མོ་ལོ།།

གླིང་ཆེ་རྒྱུད་བསྟོད་ར་མ་བྱེད་ཅིག །

བུ་ཇོ་རུ་དམའ་འབེབ་མ་བྱེད་དང་།།

སེམས་གངས་དཀར་བུ་མོའི་སྙིང་གཏམ་ཡིན།།

ཁྲོ་མཚོ་མ།

སྐྱ་ལོའི་སེང་ལྕམ་འབྲུག་མོ་ལོ།།

ཚེ་མགོ་གང་སྐྱིད་དེ་དེ་རང་ཤར།།

གླིང་ཕ་ཟོག་ལས་ཀ་བཅྭོ་བརྒྱད་དེ།།

ཕ་ཁྲོ་ཐུང་མིན་པའི་བདག་པོ་མེད།།

སྤྱི་དཔོན་གཡུ་སྒྲོན།

གོང་རིན་ཆེན་གསེར་ཁྲི་ནོན་མི་ལ།།

བུ་ཇོ་རུ་མིན་པའི་བདག་པོ་མེད།།

ལས་གལ་ཏེ་ཆེ་རྒྱུད་ཤོར་སྲིད་ན།།

ངས་ཕྱི་དམེ་ནང་ལ་མ་གཏུགས་ན།།

ང་གཡུ་སྒྲོན་མིན་པའི་རྟགས་ལ་ཞོག །

ཇོ་རུ་རིན་པོ་ཆེ།

ཀིས། ཁྱོད་རྒུ་རུ་མ་འགྲོ་རྒུ་རུ་སྡོད།།

ཇོ་རྒུར་གྲྭ་སྡེབ་བྱས་ནས་འགྲོ།

རྒྱལ་ལོན་ན་ཕན་ཚུན་མཉམ་དུ་བསྒོ།

ཚིག་སྙན་མོའི་འདུན་མ་སྒྲིག་ནས་འགྲོ།

རྒུ་རུ།

གླུ་ཨ་ལ༴

གླུ་ཐ་ལ༴

ཆོས་སྐུ་རྡོ་རྗེ་འཆང་ཆེན་དོན།།

དེ་རིང་རྒུ་རུའི་གྲོགས་ལ་བྱོན།།

ང་དང་ང་ངོ་ཨེ་ཤེས་ལོ།།

ཡ་ད་གླིང་གི་གཉིས་རྒུར་ཡིན།།

ཕོ་རྒུ་རྒུར་ཐམས་ཅད་དཔལ་རྩལ་རྒོད།།

མོ་རྒུར་རྒུར་ཐམས་ཅད་ཁོག་ཤེས་ཆེ།།

མཚོན་རྒུར་རྒུར་ཐམས་ཅད་སོ་ཁ་རྣོ།།

ང་ཕྱུག་པོ་ཡིན་ཚུལ་བཤད་པས་ན།།

བུ་སྤུན་དགུ་ཡི་བདག་པོ་ཡིན།།

དབྱར་ཤ་དགུན་ཤ་ཆད་ལེ་མིན།།

བུ་མོ་དགུ་ཡི་བདག་པོ་ཡིན།།

དབྱར་གྲོ་དགུན་གྲོ་ཆད་ལེ་མིན།།

ཡིན་པ་ཨ་ཕོ་དེ་འདྲ་ཡིན།།

བུ་ཁྱོད་ལ་གྲྭ་སྡེབ་ཀ་ལ་བྱེད།།

ཁྱོད་དང་འུ་གུ་འདྲ་ས་མེད།།

ངས་ཕ་ཚེ་བུ་ཡི་རི་འགང་ལ།།

ཨ་བསད་བྲ་བསད་བྱེད་མ་མྱོང་།།

ཨབ་ཤ་འཆའ་ཟེར་དགྲ་ལ་བསྒྱུར།།

ཕ་ཟོག་ལས་ཀ་བཅྭོ་བརྒྱད་དེ།།

ཕོ་རྒུ་རུ་ང་ཡིས་ལོན་པའི་ན།།

ངས་བསྒོ་ནི་མི་དགོས་ལྟད་མོ་ཙམ།།

བུ་ཁྱོད་ལ་བལྟ་རུ་མི་འཇུག་གོ །

བུ་ཇོ་རུ་ཁྱོད་ཀྱིས་ལོན་པས་ཚེ།།

ང་མི་དགོས་ཁྱོད་རང་ཕྱོགས་སུ་ཁྱེར།།

ཁྱོད་སྤྲང་ཕྲུག་ཡིད་ལ་དེ་ལྟར་ཞོག །

༼    ཇོ་རུས་རྒུ་རུའི་གོས་སོགས་ཐུག་པ་སོགས་ཀྱི་རྣམ་འགྱུར་ཆུང་ངུ་བསྟན་ཏེ། རྒུ་རུས་མ་དགའ་འམ་མི་གཙང་བའི་ཉམས་སོགས་བསྟན།  ༽  

ཇོ་རུ་རིན་པོ་ཆེ།

གླིང་དཔའ་ཐུལ་རྣམས་ཀྱིས་དར་གོས་ཀྱི་ན་བཟའ་གསོལ་དུས་ཁྱོད་རྒུ་རུ་ཞ་ཉེའི་གློ་ཟུང་འདོགས་པ་མ་གཏོགས་ཁྱོད་ཕྱུག་པོ་ཞིག་ཡིན་རབས་གོ་མ་མྱོང་། ༼    ཇོ་རུས་རྒུ་རུ་མི་རྟ་གཉིས་འདམ་གྱི་ནང་དུ་བརྫངས།   ༽

རྒུ་རུ།

ཇོ་རུ། ཇོ་རུ།

ཇོ་རུ་ཡིད་བཞིན་ནོར་བུ་ལགས།།

ད་སྔོན་མ་ཤེས་འཁྲུལ་བའི་བློ།།

ད་ཕྱི་དྲོ་སོ་ནམ་གཏན་ལ་ཕབས།།

ང་འདམ་གྱི་ཁ་ནས་འདོན་པར་ཞུ།།

ཇོ་རུ་རིན་པོ་ཆེ།

ཁྱོད་ཡར་ཡར་འཕོག་དང་ཡར་ཡར་འབུད་རྒྱུ་རེད།

ཐབས་ཡོད་ན་གསེར་ཁྲི་ནོན་རན་ཡིན།།

ཐབས་མེད་ན་ལྷ་མདའ་བདག་ལ་གནོངས།།

འདམ་འདི་ལས་འདོན་ཐབས་ང་ཡིས་བྱེད།།

རྒུ་རུ

ལགས་ལེགས་སོ།     ཇོ་རུ་སྔོན་དུ་སོང་རྗེས་རྒུ་རུས་    ༽  

ཨ་ཁ་ཁ། ད་ངས་ཕ་གླིང་བའི་རྟ་རྒྱལ་མ་ལོན་སེམས་ཐག་རེད། ང་རང་གི་སྲོག་མགོ་ཐོན་ན་དེ་ལས་ཅི་ཡང་མེད།

ཨ་ཁུ་ཁྲོ་ཐུང་།

ཡ་ ཨ་ཁུའི་ཚ་བོ་ཇོ་རུ་ལགས།།

ཚེ་ཡར་སྟོད་ཉི་མ་ན་ནང་ལ།།

སྡེ་གཅིག་རུང་ཁུ་ཚན་ཐུག་དུས་མེད།།

དུས་དེ་རིང་ཉི་མ་ཕན་ཆོད་ལ།།

ངེད་ཁུ་ཚན་སྐྱིད་སྡུག་གཅིག་རྒྱུ་བྱེད།

ཇོ་རུ་རིན་པོ་ཆེ།

གླུ་ཨ་ལ་ གླུ་ཐ་ལ་

གདོང་མ་བཞིའི་དཔོན་པོ་ཁྲོ་ཐུང་ལགས།།

ཁྱོད་ཕྱིར་ལྟས་ཕྱིར་ལྟས་བྱས་པ་དེ།།

འདྲེ་གཞི་བདག་གང་དང་འཕྲད་པ་རེད།།

ཁྱོད་ཁེར་གླུ་ཁེར་གླུ་ལེན་པ་དེ།།

བཙན་འདྲེ་མོ་སུ་དང་འཕྲད་པ་རེད།།

གླིང་གྲུབ་ཆེན་སྟོན་མོའི་ཚོགས་གྲྭལ་ལ།།

ཕ་ཁུ་བོ་བརྒྱ་འབོད་སྟོང་འབོད་བྱས།།

ངེད་སེང་བློན་ཕ་བུའི་སྟོན་སྐལ་བཅད།།

དེའི་ངན་ལན་དེ་རིང་ཨེ་འཕྲོད་བསམ།།

ང་ཇོ་རུའི་རྟ་འུ་འདི་འདྲ་སྙེད།།

རྟ་འདི་ལ་རྒྱུགས་ལུགས་མི་ཤེས་ལོ།།

ཁྱོད་ཨ་ཁུས་ཚ་བོ་ཁ་ཏ་དགོས།།

ཁྲོ་ཐུང་།

ད་ཉོན་དང་ཨ་ཁུའི་ཚ་བོ་ལགས།།

འདི་རྟ་ཞིག་མ་རེད་བྱ་ཞིག་རེད།།

བྱ་རྒྱལ་ཁྱུང་གི་འགྲན་ཡ་མེད།།

རྟ་གཞན་ལས་འདི་ཉིད་ཁྱད་པར་འཕགས།།

གླིང་ཚོ་དྲུག་རྟ་རྒྱུགས་བྱེད་དུས་སུ།།

ངེད་ཁུ་ཚན་གཉིས་པོ་རང་ཡུལ་སྙེགས།།

ཁྱོད་ཚ་བོ་ཨ་ཁུའི་ཁྱིམ་དུ་ཤོག །

རྒྱུ་ནོར་རྫས་གང་དགའ་ཁྱོད་ལ་སྟེར།། ༼    ཇོ་རུ་གར་སོང་ཆ་མེད་དུ་བོར     ༽

ཨ། ཇོ་རུ། ༼     ཨ་ཁུ་སེམས་ཚུབ་པའི་ངང་ནས་མདུད་དུ་བསྐྱོད།    ༽

                                  འཁྲབ་ཚན་བདུན་པ།

                                   ཇོ་རུའི་སྤྲུལ་པས་ཉམས་སད་བྱས།།

                                   ཞལ་དཀར་ཐུགས་རྒྱལ་དྲག་དུ་ཁྲོས།།

                                              སླར་ཡང་ཇོ་རུའི་རྫུ་འཕྲུལ་གྱིས།།

                                   གཡུ་བྱ་འཕུར་ཤེས་ས་ལ་རྡབས།།

ལྷ་འཇམ་དཔལ་དབྱངས་ཀྱི་རོལ་གར་ལྡོང་འབུམ་པའི་རྒྱ་ཚ་ཞལ་དཀར་དེས་གླིང་རྟ་རྒྱུགས་གསེར་ཁྲི་ནོན་པར་ཐུགས་འཚུབས་བསླངས་ཤིང་རྟ་མགྱོགས་པ་རྒྱ་བྱ་སོག་དཀར་ལ་ལྕག་ཚ་བ་གསུམ་བྲབ་དེ་བང་བཏང་ཕྲལ་ཇོ་རུའི་སྤྲུལ་པ་ཉི་མ་རྒྱལ་མཚན་གྱིས་ཉམས་སད་བྱས་ཞལ་དཀར་ཐུགས་རྒྱལ་དྲག་ཏུ་བཞེས་ཤིང་དཔའ་གཏམ་དཔུང་ངོམས་བྱས་མཐར་ཇོ་རུས་རང་གཟུགས་བསྟན། སྐབས་དེར་གདོང་བཙན་གནང་ལུའི་ཨ་དཔལ་དེ་གློག་འཁྱུགས་པ་ལྟར་འགྲོ་བཞིན་པ་ན་ཇོ་རུའི་རྫུ་འཕྲུལ་གྱིས་གཡུ་བྱའི་བང་ཁ་བསྡམས་དེ་ས་ལ་འགྲེ་ལོག་བྱེད་བཞིན་གནས་སོ།།

བེ་རུ་ཉི་མ་རྒྱལ་མཚན།

ཕོ་ང་དང་ང་ངོ་མ་ཤེས་ན།།

བེ་རུའི་ཉི་མ་རྒྱལ་མཚན་ཟེར།།

དེ་ནས་མི་དཀར་རྟ་དཀར་ཅན།།

ཉོན་དང་ལོ་རྒྱུས་འདི་འདྲ་ཡོད།།

ན་ནིང་དགུན་གྱི་དུས་ཚོད་ལ།།

སྐྱ་ལོའི་མི་རྒྱུ་འཁོར་དང་བཅས།།

ཁྱེད་ལ་མགོ་འབུལ་བྱས་ཏེ་ཟེར།།

ཨ་ཕོ་ང་ཡི་ལག་ན་ཡོད།།

དེ་མིན་སྐད་ཆ་བཤད་པའི་ན།།

སྒང་གསུམ་རོ་ཡིས་བཀང་ལེ་གཅིག །

གཤོང་གསུམ་ཁྲག་གིས་བཀང་བ་གཉིས།།

གླིང་དཀར་མངའ་འོག་བསྡུ་ལེན་ཞིག །

མ་བྱས་བསྡད་ན་ཧོར་བདུད་མིན།།

གླུ་གོ་ན་གངས་དཀར་རྒྱན་དུ་ཞོག །

རྒྱ་ཚ་ཞལ་དཀར།

ང་དང་ང་ངོ་མ་ཤེས་ན།།

དཔའ་མི་འགྱུར་རྒྱ་ཚ་ཞལ་དཀར་ཡིན།།

ཚུར་ཉོན་དང་ཧོར་བདུད་རྡར་མ་ཝ།།

བུ་ཁྱོད་འདྲ་ཐུག་ན་དགའ་བ་ལ།།

ཁྱོད་དང་འུ་གུ་གཉིས་པོ་ལ།།

བར་བ་སྐྱི་སེར་རླུང་ལས་མེད།།

ཁྲག་འཐུང་དོག་མོའི་ས་ལས་མེད།།

ལྟད་མོ་ཨ་སྔོན་དགུང་ལས་མེད།།

སྐྱ་ལོ་མི་རྒྱུ་འཁོར་བཅས་དེ།།

དགྲ་ཕ་རོལ་ལག་བཞག་མ་དགོས་ཨང་།།

གླིང་ཕུ་ནུའི་ལག་ལ་སྤྲོད་པ་མིན།།

ཁྱོད་ཧམ་ཅན་ཡིད་ལ་དེ་ལྟར་ཞོག །

    ཇོ་རུའི་སྤྲུལ་བ་ལྡོང་བེ་རུ་ཉི་མ་རྒྱལ་མཚན་ཚུར་ཇོ་རུ་དངོས་ཀྱི་རྣམ་པར་སྤྲུལ་ཏེ།  ༽

ཇོ་རུ་རིན་པོ་ཆེ།

ཡ་ཕུ་བོ་རྒྱ་ཚ་ཞལ་དཀར། ད་ཤ་ཟོས་སྤྱང་ཀི་རི་ལ་མངག ཆུ་འཐུང་ཝ་མོ་གལ་བཙུད། ང་ཇོ་རུ་ཉམས་ཆུང་གི་ཚོད་ལ་མ་བལྟ།

རྒྱ་ཚ་ཞལ་དཀར།

ཨ་སྐྱིད་ཇོ་སྐྱིད་རིན་པོ་ཆེ།།

ཇོ་རུ་དགོངས་པ་མཐོ་རྒྱུ་ལགས།།

ང་ལ་ཉམས་ཚད་དགོས་དོན་མེད།།

གོང་གསེར་ཁྲིའི་རྒྱན་དུ་ད་བྱོན་ཅིག །

༼   ཇོ་རུ་སྔོན་དུ་སོང་རྗེས་གདོང་བཙན་ཨ་དཔལ་གྱི་རྟ་བཤའ་གྲབ་བྱས།    ༽

ཇོ་རུ་རིན་པོ་ཆེ།

ཧ་ཧ་་་་་ དེ་རིང་བཟང་པོ་བྱུང་། བོད་འཇིག་རྟེན་གནའ་མིའི་ཁ་དཔེ་ལ། རྟ་བཤའ་གཏོར་ལེན་རོ་ཁུར་གསུམ། ལྷ་འདྲེ་སྟོང་གི་ཐར་མ་ཡིན། ཡུལ་ལ་ན་ཚ་བྱུང་ན་གཅོད་པ་རྒྱག མགྲོན་པོ་ལམ་ཉེས་བྱུང་ན་བྱ་སྤྲང་རྒྱག་ཟེར་བ་ལྟར་དེ་རིང་ང་ལ་ཤ་སྟོན་ཚེས་སྟོན་ཞིག་བབ་ནི་རེད། རྟ་འདི་ཡི་རྣམ་ཤེས་དབྱངས་སུ་སྤར་དགོས། ༼    གདོང་བཙན་ཨ་དཔལ་གྱིས་རྟ་བཤའ་རྒྱུ་རེད་སྙམ་ཏེ་རྒྱུགས་འོང་ནས།     ༽

གདོང་བཙན་ཨ་དཔལ།

ཇོ་རུ་རིན་པོ་ཆེ། ཇོ་རུ་རིན་པོ་ཆེ།

རྟ་མ་བཤའ་ལགས། རྟ་མ་བཤའ་ལགས།

ཨ་ཁུ་ཁྲོ་ཐུང།

ཧ་ཧ། ཡ་ཨ་ཁུའི་ཚ་ལུ། རྟ་འདི་ཡར་སོས་ཐབས་ལ་ང་ཨ་ཁུའི་སྔགས་སྐོར་གཅིག་ལས་མི་དགོས། ཨེ་བདེན་ལྟོས་ཨ། ཨོཾ་ཧྲཱི༔པདྨ་ཏ་ཀྲྀ་ཏ་བཛྲ་ཀྲོ་ཏ་ཧྱ་གྷྲྀ་ཝ་ཧུ་ལུ་ཧུ་ལུ་ཧཱུྃ་ཕཊ༔ ལན་གསུམ། ༼    ཇོ་རུ་ཧ་ཧ་ཞེས་བགད་ཤོར་ཏེ་ཨ་ཁུ་ཁྲོ་ཐུང་ཀྱང་ ཨ་ཞེས་ཡ་མཚན་སྐྱེས།   ༽

ཇོ་རུ་རིན་པོ་ཆེ།

འོ་ན་རྒྱ་ནག་པོའི་ཇ་རྫོང་ཕབ་ཚེ་རྟ་འདི་ཐེངས་གཅིག་ང་ལ་ཨེ་གཡར། དེ་གཡར་ན་ང་ལ་གསོ་བའི་ཐབས་ཞིག་ཡོད།

གདོང་བཙན་ཨ་དཔལ།

ཐེངས་གཅིག་མ་ཚད་ཐེངས་གསུམ་གཡར་ཆོག་ལགས། ༼   དེ་མ་ཐག་ཇོ་རུ་སྔོན་དུ་ཤོར   ༽     ༼   ཡོལ་བ་དལ་གྱིས་བསུམ། ༽

                                  འཁྲབ་ཚན་བརྒྱད་པ།

                                      ཡུལ་ལྷ་རྨ་རྒྱལ་སྤོམ་རའི་མདུན།།

                                      ཇོ་རུས་རྟ་རྒྱུགས་གསེར་ཁྲི་ལོན།།

                                      ཕ་ཁུས་བཀྲ་ཤིས་གླུ་ཚིག་ཞུས།།

                                     འབྲུག་མོས་རྟེན་འབྲེལ་བདེན་ཚིག་ཕུལ།།

གངས་ཅན་བོད་ཀྱི་མགུལ་ལྷ་ཆེན་པོ་རྨ་རྒྱལ་སྤོམ་རའི་མདུན་ངོས་སུ་མི་འཇིགས་སེངྒེའི་བཏེགས་པའི་གསེར་ཁྲིའི་འཕང་སུ་མངའ་གསོལ་མཛད་ཅིང་སེང་ཆེན་མི་ཡི་ཉི་མ་བཞིའི་བརྟན་པ་དབང་མེད་དུ་འཕྲོག་པའི་རྟེན་གྱི་གླུ་ལེན་གར་རྩེད་ཀྱི་དཔལ་ལ་ལོངས་སྤྱོད་དོ།།    མི་འཇིགས་སེངྒེའི་བཏེགས་པའི་གསེར་ཁྲིའི་འཕང་སུ་མངའ་གསོལ་མཛད་ཚུལ་ལ་མཆོད་སྐོར་ཆ་ཚང་གིས་མདུན་དུ་བསུས་ཏེ་གླིང་དཀར་ལྷ་སྡེ་ཡོངས་ཀྱིས་མཇལ་དར་ཕུལ་རྗེས   ༽

ཨ་མྱེ་ཁྲ་རྒན།

གླུ་ཨ་ལ༴

ཐ་ལ༴

ང་ཨ་མྱེ་མ་ཤི་ཚེ་ཐག་རིང་།།

ཚེ་ཐག་རིང་བའི་བསམ་དོན་འགྲུབ།།

བུ་དེ་འདྲ་མིན་ན་ཅི་འདྲ་ཡིན།།

གོང་གི་དཔོན་པོའི་གོ་ས་ལོན།།

ཁྲ་ལྷང་ངེ་གསེར་ཁྲི་ལོན་དུས་སུ།།

ང་ཨ་ཁུའི་སེམས་ལ་ཉི་མ་ཤར།།

བོད་དབུ་ནག་འདུག་ཆས་འགྲུབ་ནས་དགའ།།

གླིང་རྔ་སྒྲ་དར་ཕྱར་དུང་འབུད་གསུམ།།

དུས་དེ་རིང་ཨ་ཁུའི་སྙན་ལ་སྤྲོ།།

ཚ་ཇོ་རུ་བསམ་དོན་འགྲུབ་ཏུ་ལགས།།

ལས་གལ་ཆེན་དོན་ཆེན་མ་ཡིན་ན།།

དམག་དགྲ་ལས་བྱེད་པའི་མགོ་ལ་རྩོམ།།

བསྟན་པ་དང་སེམས་ཅན་དོན་མིན་ན།།

སྡེ་ཁྲལ་ཆེན་གྱི་ལས་ལ་མ་སྡུས་ཤིག །

ཕོ་རྒོད་པོ་གོང་དུ་ཤོར་དུས་ལ།།

ཐབས་ཤེས་རབ་སྒོ་ནས་འདུལ་ཤེས་དགོས།།

རང་འདོད་ཀྱི་བྱ་བ་ཕར་ལ་སྤོངས།།

བདག་གཞན་ལ་ཕན་པ་ཅི་ཐོག་མཛོད།།

ཨ་ཁུ་ཁྲོ་ཐུང་།

ད་ཉོན་དང་ཚིག་གསུམ་བཤད་པ་ན།།

ལྡོང་མི་རབས་གསུམ་གྱི་མི་རྒྱུད་ལ།།

རྒྱུ་བསོག་བསོག་ཨ་མྱེ་ཨ་ཁུས་གསོག །

དཔོན་ལས་ཅན་འདྲ་འདྲ་མང་ན་ཡང་།།

དཔོན་ཁྲོ་ཐུང་ང་དང་འདྲ་བ་མེད།།

ལྷ་རྟ་མགྲིན་དམར་པོ་དངོས་བྱོན་ཡིན།།

ང་ཁྲོ་ལུས་རྟ་རྒྱལ་མ་བཞག་ན།།

ཚ་ཇོ་རུ་བཟང་ཡང་ལོན་ཐབས་མེད།།

ང་ཁུ་བོའི་བསམ་དོན་དེ་རིང་འགྲུབ།།

གླིང་དཀར་པོའི་ཆེ་ཐང་ཐོབ་ཐང་དེ།།

དུས་དེ་རིང་ལྷ་སྲས་ཕྱག་ཏུ་འཕྲོད།།

ཐོབ་གོ་ས་ཨེ་ཟིན་ཁྱེད་རང་ཤེས།།

ཁྱེད་ཀྱི་མཚན་ལ་འཛམ་གླིང་གེ་སར་རྒྱལ་པོ་དང་། སེང་ཆེན་སྐྱེས་བུ་དོན་འགྲུབ་གསོལ།

འདུས་སྡེ་ཡོངས་ཀྱིས།

ལགས་ལགས་སོ།།

སྐྱ་རྗེ་སེང་ལྕམ་འབྲུག་མོ།

          གླུ་ཨ་ལ༴

ཐ་ལ༴

གསེར་ཁྲི་སེར་པོའི་གདན་སྟེང་ན།།

སྐུ་བཞུགས་པ་འཛམ་གླིང་གེ་སར་བཞུགས།།

བཀའ་གོང་མ་རྒྱལ་མོའི་སྐུ་ཚེ་རིང་།།

བཀྲ་ཤིས་པའི་ཁ་བཏགས་ཡར་ལ་བཞེངས།།

སྐུ་སྐྱེ་འཆི་མེད་པའི་ཆང་འདི་བཞེས།།

ཐུགས་བརྩེ་བས་བཀྲ་ཤིས་མགུར་ཅིག་གསུང་།།

གླིང་ལྷ་སྡེ་དབུ་འཕང་མཐོ་བར་ཤོག །

སྐུ་ཚེ་བསམ་པ་མཐའ་རུ་ཕྱིན།།

ཉོན་མོངས་བདུད་བཞི་ཆོས་ཉིད་གྲོལ།།

དོན་འགྱུར་མེད་ཡེ་ཤེས་ཐོབ་པར་ཤོག །

ཨ་མྱེ་ཁྲ་རྒན།

ཨ་ཁུ་ཁྲོ་ཐུང་།

ཀ།   ངས་ལག་ན་བཟུང་བའི་ཆང་དཀར་འདི།།

ལོ་ཆང་བདུད་རྩི་ཁམས་པ་རེད།།

ཟླ་ལ་བསྙལ་བའི་ཟླ་ཆང་རེད།།

ཟླ་ཆང་བདུད་རྩི་ཟིལ་མ་རེད།།

ཁ།  ཞག་ལ་བསྙལ་བའི་ཞག་ཆང་རེད།།

ཞག་ཆང་བདུད་རྩི་འཁྱིལ་བ་རེད།།

གླིང་ཀེར་མཛོད་གཉན་པོའི་ཚེ་ཆང་རེད།།

སྐུ་འཛམ་གླིང་རྒྱལ་པོའི་སྒྲུབ་ཆང་རེད།།

ཀ།  ན་ནང་གི་ལོ་ཆང་ཁམས་པ་ལ།།

ད་ལོའི་འབྲུ་ཆང་སིལ་མ་བཏབས།།

བར་ལ་འཁོར་ལོ་འཁོར་བ་འདྲ།།

འཁོར་ལོ་རླུང་གི་བསྐྱོད་འདྲ་ཡིན།།

ཁ།  དབང་ཆེན་དཔོན་གྱི་བཞེས་པ་ན།།

ཐུགས་རྒྱ་ཆེ་མཁའ་དང་མཉམ་པ་ཡིན།།

ཕོ་སྙིང་མེད་ལམ་འགྲོའི་སྐྱེལ་མ་ཡིན།།

དཔའ་དགྲ་ལྷ་མཆོད་པའི་ངར་འདོགས་ཡིན།།

ཀ།  སྟེང་ལྷ་ལ་མཆོད་ཀ་ཕོག་གྱུར་ན།།

ལུས་ཁྲབ་ཆེན་རྨོག་དཀར་དབུ་འཕང་མཐོ།།

གཡས་གཉན་ལ་མཆོད་ཀ་ཕོག་གྱུར་ན།།

ཕྱག་གཡས་ཐེབས་རྩལ་མདའ་ཤུགས་ཆེ།།

ཁ།  གཡོན་ཀླུ་ལ་མཆོད་ཀ་ཕོག་གྱུར་ན།།

གཡོན་པས་མཆོག་དཀར་གཞུ་མོ་བརྟེན།།

ཆང་འདི་ལ་ཡོན་ཏན་མང་པོ་ཡོད།།

ཆང་འདི་འདྲ་བོད་ལ་དཀོན་པ་ཡིན།།

ཀ་ཁ། མཐོ་མི་ཆེན་དཔོན་པོའི་བཞེས་རྒྱུ་རེད།།

སྐུ་སྐྱེ་འཇིགས་བྲལ་པའི་བདུད་རྩི་འདི།།

སྐྱིད་གླུ་དང་གར་གྱི་འབྱུང་ཁུངས་རེད།།

རྗེ་འཛམ་གླིང་རྒྱལ་པོའི་ཆང་འདི་བཞེས།།

སེང་ཆེན་མི་ཡི་ཉི་མ།

གླུ་ཨ་ལ་སྐྱེ་མེད་ཐབས་ཀྱི་དབྱངས།།

ངག་ཐ་ལ་འགགས་མེད་ཤེས་རབ་གླུ།

ས་འདི་ཡི་ས་ངོ་མ་ཤེས་ན།།

རྨ་ཀུ་རའི་རྫ་རྒྱལ་མདུན་ངོས་རེད།།

ཕོ་ང་དང་ང་ངོ་མ་ཤེས་ན།།

འཛམ་གླིང་སེང་ཆེན་རྒྱལ་པོ་ཡིན།།

ནམ་མཁའ་བཞིན་དུ་སྒོམ་གཅིག་དགོས།།

ལྷོ་སྤྲིན་བཞིན་དུ་རྣམ་རྟོག་འཆར།།

རྣམ་རྟོགས་སེམས་ཀྱི་ཆོ་འཕྲུལ་ཡིན།།

དེར་བདག་འཛིན་མེད་ན་རང་སར་གྲོལ།།

གནས་འོག་མིན་ཆོས་དབྱིངས་ཕོ་བྲང་ན།།

ལྷ་ཆོས་སྐུ་ཀུན་ཏུ་བཟང་པོ་འཛོམས།།

ཚེ་སྔ་ཡང་འཛོམས་ལ་ད་ཡང་འཛོམས།།

སང་ཡང་ཡང་འཛོམས་པའི་བཀྲ་ཤིས་ཤོག།

གནས་རང་ལུས་རྒྱལ་བའི་དཀྱིལ་འཁོར་ན།།

རྩལ་འབུམ་ཕྲག་ཡངས་པའི་མཁའ་འགྲོ་འཛོམས།།

ཚེ་སྔ་ཡང་འཛོམས་ལ་ད་ཡང་འཛོམས།།

སང་ཡང་ཡང་འཛོམས་པའི་བཀྲ་ཤིས་ཤོག །

ས་བཟང་པོ་སྨོན་ལམ་ལ་ཐོག་ན།།

སྡེ་ཁྲ་མོ་གླིང་དཀར་ལྷ་སྡེ་འཛོམས།།

ཚེ་སྔ་ཡང་འཛོམས་ལ་ད་ཡང་འཛོམས།།

སང་ཡང་ཡང་འཛོམས་པའི་བཀྲ་ཤིས་ཤོག །

བཀྲ་ཤིས་ཀུན་གསལ་ལྷ་ལམ་དབྱིངས།།

བཀྲ་ཤིས་རྟ་བདུན་འོད་སྣང་གསལ།།

བཀྲ་ཤིས་འགྲོ་བློའི་མུན་སེལ་ནས།།

བཀྲ་ཤིས་སྔ་འགྱུར་རྒྱལ་བའི་བསྟན།།

ཇི་སྲིད་ནམ་མཁའ་གནས་ཀྱི་བར།།

རྫོགས་ལྡན་དགའ་སྟོན་སྤྱོད་པར་སྨོན།།

སྲས་བཅས་རྒྱལ་བའི་བྱིན་རླབས་ཀྱིས།།

སྨོན་ལམ་ཅི་བཏབ་འགྲུབ་པར་ཤོག །

འོ། དེ་རིང་གི་ཉི་མ་བཟང་པོ། སྐར་མ་བཟང་པོ། བཀྲ་ཤིས་ཕུན་སུམ་ཚོགས་པའི་དུས་སྦྱོར་དགེ་བ་འདི་ནས་བཟུང་དཔོན་ལ་གེ་སར་རྒྱལ་པོ་བློན་ལ་ཕུ་ནུ་སུམ་ཅུ་འབངས་ལ་གླིང་དཀར་ལྷ་སྡེ་འདིས་ཕྱི་དགྲ་བོ་བྱུང་ན་མདུང་རྩེ་མཉམ་གཤིབ་ནང་དངོས་གྲུབ་བྱུང་ན་ཐོད་པ་མཉམ་གཏུག་བྱེད་རྒྱུ་ཡིན་པས་ལྷ་སྡེ་མཐོ་དམན་ཀུན་གྱིས་གོ་བར་གྱིས་ཤིག།

ཞབས་བྲོ། ༼    མཁན་རིན་པོ་ཆེ་དྷཪྨཱའི་མཚན་གྱིས་ལྗགས་རྩོམ་སུ་བརྩལ་བ་ལགས།  ༽

སྐུ་མཆོག་གངས་ཀྱི་རི་ལ།།

མཚན་དཔེའི་གཟི་འོད་འབུམ་འཁྱུད་བཞིན།།

མཐོང་བས་དད་མོས་སྒོ་བརྒྱ་འབྱེད།།

ནོར་བུ་དགྲ་འདུལ་སྐུ་ལ་བསྟོད།།

སྙན་གྲགས་ལྷ་ཡི་རྔ་བོ་ཆེ།།

ནག་ཕྱོགས་བདུད་རིགས་སྤ་ཀོང་ཞིང་།།

ཐོས་པས་ངན་འགྲོའི་འཇིགས་ལས་སྐྱོབས།།

ནོར་བུ་དགྲ་འདུལ་གསུང་ལ་བསྟོད།།

ཟབ་གསལ་ཐུགས་ཀྱི་རྒྱ་མཚོའི་ཀློང་།།

མཁྱེན་བརྩེའི་ཡེ་ཤེས་རྩོལ་མེད་རྒྱས།།

དྲན་པས་བདེ་སྟོང་ཏིང་འཛིན་བསྙེས།།

ནོར་བུ་དགྲ་འདུལ་ཐུགས་ལ་བསྟོད།།

སྔོན་སྨོན་ཐུགས་བསྐྱེད་ནམ་མཁའ་ལ།།

འགེགས་མེད་སེང་ཆེན་ཉི་མ་འཆར།།

བློན་ཆེན་དུང་ཟླ་དཔའ་བརྟུལ་སྨན།།

འབངས་སྡེ་སྐར་ཚོགས་འགྲན་འདི་མཚར།།

བཀྲ་ཤིས་ལྷ་རྒྱལ་ལོ ་།༼       ཡོལ་བ་དལ་གྱིས་བསུམ།     ༽

 

 

ཀློག་གྲངས།:[81]
གླིང་གེ་སར་རིག་གནས་དྲྭ་ཚིགས།
དྲ་ཚིགས་འདིའི་པར་དབང་ཡོད་ཚད་གླིང་གེ་སར་རིག་གནས་དྲྭ་བར་དབང་བས།
འདི་ནས་རྩོམ་ཡིག་དང་བརྙན་རིས་དག་དྲྭ་བདག་ལ་འབྲེལ་གཏུགས་མ་བྱས་པར་མི་བཀོལ་བར་ཞུ།
འབྲེལ་ཡོད་རྩོམ་ཡིག་སྐུར་གནས།   382740503@qq.com