སྐད་འཇོག་ས།

གླིང་གེ་སར་དྲ་བ་འདི་གཉེར་བའི་དམིགས་ཡུལ་ནི། བོད་ཀྱི་མི་སྣ་དཔའ་བོ་གླིང་རྗེ་གེ་སར་ནི་བོད་ཀྱི་ལོ་རྒྱུས་སྟེང་དངོས་སུ་བྱུང་བའི་དོན་གནས་ཀྱི་མི་སྣ་ཞིག་ཡིན་ན་ཡང་། དུས་ཀྱི་གནས་བབ་ཀྱིས་མི་སྣ་འདི་ལ་ངག་ཏུ་བརྒྱུད་པའི་དོན་དངོས་ལོ་རྒྱུས་ཐན་ཐུན་ལ་གཞི་བཅོལ་བའི་ཡིག་ཐོག་གི་ལོ་རྒྱུས་ཐད་ནས་ལྷ་སྒྲུང་ལྟ་བུར་ཆགས་ཏེ་ས་ཁྱབ་རྡོ་ཁྱབ་ཏུ་གྱུར་བ་དང་གཅིགགླིང་གེ་སར་གྱི་མི་རབས་ཕྱི་མ་དག་གིས་རང་རིགས་ཀྱི་མེས་པོའི་དོན་དངོས་ལོ་རྒྱུས་ཀྱི་དཔྱད་གཞི་ལ་ཆེར་མ་དམིགས་པར། དཔའ་བོའི་བསྟོད་སྒྲུང་གི་ཁ་སྙན་ངག་གི་འཇིག་རྟེན་ཞིག་ཏུ་ཁྲིད་དེ་རྩོམ་པ་པོ་རང་རང་གིས་རྟོག་པ་འཆར་ཡན་གྱི་ལམ་ནས་བྲིས་པ་མང་སྟབས། བོད་ཀྱི་དཔའ་བོའི་ལོ་རྒྱུས་ལ་དོན་དངོས་དང་ཉེ་བའི་ལོ་རྒྱུས་དང་། དཔའ་བོའི་བསྟོད་སྒྲུང་གི་སྙན་ངག་གཉིས་ལས་ཕྱི་མ་ཁྱབ་ཆེ་བར་སོང་སྟེ། ད་ཆ་འཛམ་གླིང་གི་རྟོགས་བརྗོད་ཆེན་མོ་འདི་ལ་སྤྱིའི་ཆ་ནས་སྙན་གྲགས་དང་མཛད་འཕྲིན་རྒྱ་ཤིན་ཏུ་ཆེ་ན་ཡང་།ཞིབ་གསལ་གྱི་ཆ་ན་སྒྲུང་མཁན་སོ་སོའི་འབྲི་སྟངས་མི་འདྲ་བ་དང་།སྔ་ཕྱི་མི་མཐུན་པ་སོགས་ལོ་རྒྱུས་པ་སོ་སོའི་འདོད་པ་མི་མཐུན་ས་མང་པོ་ཞིག་གིས་བོད་ཀྱི་གླིང་གེ་སར་རིག་གཞུང་ལོ་རྒྱུས་ལ་ཞིབ་འཇུག་པ་རྣམ་པར་དཀའ་ངལ་ཆེ་བའི་གནས་བབ་ལ་ཁ་གཏད་དེ། གླིང་གེ་སར་རིག་གནས་ཀྱི་ཕྱོགས་ཡོངས་ཀྱི་དཔྱད་གཞིའི་མ་ལགས་འཐུས་སྒོ་ཇེ་ཚང་ལ་གཏོང་ཨེ་ཐུབ་སྙམ་ནས་གཉེར་བ་ཡིན་མོད། འོན་ཀྱང་དྲ་བ་འདི་གཉེར་བ་པོར་བོད་ཁུལ་ཡོངས་ཀྱི་གླིང་གེ་སར་དོན་དངོས་ལོ་རྒྱུས་དང་ཉེ་བའི་དཔྱད་གཞི་ལ་ཐོས་མཐོང་གི་རྒྱ་ཆུང་བས། གླིང་གེ་སར་རིག་གནས་ལ་སྤྲོ་སྣང་ལྡན་པའི་རྒྱ་ཆེའི་གྲོགས་པོ་དག་གིས་དྲ་བ་འདིའི་ས་བཅད་སོ་སོའི་ཁྱབ་ཁོངས་ལ་དཔྱད་གཞི་བསྡུ་རུབ་དང་། གླིང་གེ་སར་དཔྱད་རྩོམ། གླིང་གེ་སར་སྒྱུ་རྩལ་རི་མོ། གླིང་གེ་སར་དོན་དངོས་ལོ་རྒྱུས།གླིང་གེ་སར་དང་འབྲེལ་བའི་བོད་ཡུལ་སྟོད་སྨད་བར་གསུམ་གྱི་ཡུལ་སྲོལ། གླིང་གེ་སར་འཁྲབ་གཞུང་། གླིང་གེ་སར་ལོ་རྒྱུས་སམ་བསྟོད་སྒྲུང་གསར་རྙིང་དང་རྩོམ་པ་པོ་དང་འབྲེལ་ཡོད་མི་སྣ་ངོ་སྤྲོད་སོགས་མཁོ་སྤྲོད་གནང་སྦྱིན་གྱི་བཀའ་དྲིན་སྐྱོང་རྒྱུ། མདོར་ན་བོད་རང་གི་དཔའ་བོའི་ལོ་རྒྱུས་ལ་གཅེས་སྐྱོང་གི་འདུ་ཤེས་ལྡན་པའི་སྒོ་ནས་ཕྱོགས་ཡོངས་ལ་མཛུབ་སྟོན་རྒྱབ་སྐྱོར་གནང་རྒྱུ་བཀའ་དྲིན་ཆེ་ཞུ་བ་དང་། ནོར་འཁྲུལ་དང་རིག་གནས་ཀྱིས་མ་འཇོན་ས་ཡོད་ན་རྒྱ་ཆེའི་ཀློག་པ་པོ་རྣམ་པར་གུས་བཤགས་བྱེད་ངེས་ཡིན། དེ་དང་ལྷན་བོད་ཀྱི་མེས་པོ་གླིང་རྗེ་སར་སྐྱེས་བུའི་རྣམ་ཐར་ལོ་རྒྱུས་རིང་མོའི་མཛད་འཕྲིན་འཛམ་གླིང་རིག་གནས་བང་མཛོད་ཀྱི་སྙིང་བཅུད་འདོད་འབྱུང་གི་ཡིད་བཞིན་ནོར་བུ་ལྟ་བུར་འགྱུར་ཐུབ་པའི་སྨོན་འདུན་ཡང་ཡང་ཞུ་བ་ལགས་སོ། ། ཞོར་དུ་དྲ་བ་འདིའི་གཞི་གྲངས་མཛོད་དང་ལོ་རེའི་དྲྭ་གནས་དོ་དམ་གྱི་ཁྲལ་སོགས་ཀྱི་ཐད་ནས་རོགས་སྐྱོར་གནང་མཁན་སྤྲུལ་ཀློང་ཡངས་དང་མི་ཉག་པ་འཇམ་དབྱངས་འོད་ཟེར། ཇོ་ཁྲི་འཇམ་དབྱངས་བསྟན་པའི་རྒྱལ་མཚན།དྲེལ་དཀར་སྤྲུལ་སྐུ་བསོད་བློ་སོགས་སྔ་རྗེས་སུ་ཐུགས་ཁུར་རྒྱབ་སྐྱོར་གནང་མཁན་རྣམ་པར་བཀའ་དྲིན་ཞུ་བཞིན་ཡོད།                              ཅེས་བོད་རབ་བྱུང༡༧པའི་ལྕགས་མོ་ཡོས་ལོའི་ལོ་སར་ལ་གླིང་དྲྭ་འདིའི་གཙོ་བདག་སྨིན་དབུས་པོས་ཕུལ་བཀྲ་ཤིས་པར་གྱུར་ཅི

 

 

རྟ་རྒྱུག་འཁྲབ་གཞུང་དཔྱོད་ལྡན་སྐལ་བཟང་དགའ་བའི་དུས་སྟོན།༼ ཁག་དང་པོ། ༽

 

༄༅།། རྟ་རྒྱུགས་འཁྲབ་གཞུང་དཔྱོད་ལྡན་སྐལ་བཟང་

   དགའ་བའི་དུས་སྟོན་ཅེས་བྱ་བ་བཞུགས་སོ།།

འཇིགས་མེད་རྡོ་རྗེས་བརྩམས།  

སྨར་མདོ་གེ་སར་ཕོ་བྲང་པདྨ་ལྷ་རྩེའི་ཟློས་གར་མྱུར་སྐྱོབ་ཚོགས་པས་མཁོ་འདོན་མཛད།

 

                                

༈ སེང་ཆེན་གེ་སར་རྒྱལ་པོའི་རྟོགས་བརྗོད་ལས། རྟ་རྒྱུགས་རྒྱལ་འཇོག་འཁྲབ་གཞུང་ནོར་བུའི་ཕྲེང་བ་ཅེས་བྱ་བ་བཞུགས།

                                ༡༩༨༤ལོའི་ཟླ་༤བའི་ཚེས་༡༨ཉིན། 

རྒྱལ་ཀུན་གསང་གསུམ་གཅིག་བསྡུས་མཚན་དཔེའི་སྐུ།།

ལྷོ་ནུབ་འོ་མཚོར་འདབ་སྟོང་རྩེར་བཞད་ཅིང་།།

ངོ་མཚར་རྫུ་འཕྲུལ་བཀོད་པའི་ཞིང་ཁམས་འདིར།།

ངེས་གསང་སྙིང་པོའི་ལམ་སྟོན་བླ་མར་འདུད།།

མཐའ་བརྒྱད་སྤྲོས་དང་བྲལ་བ་ལྟ་བའི་མཚོར།།

སྒོམ་པའི་བློ་གྲོས་འཇོག་པའི་རྟག་རོལ་ཅིང་།།

བསླབ་གསུམ་ནོར་བུའི་མཛོད་ལ་དབང་བསྒྱུར་བའི།།

ཤནྟི་རཀྵི་ཏ་ཞེས་མགོན་དེས་སྐྱོངས།།

བོད་ཡུལ་མུན་གླིང་སྡུག་པོའི་འདྲེ་ཡུལ་དུ།།

སྡུག་བསྔལ་གསུམ་གྱི་ཉམ་ཐག་གྱུར་བའི་འགྲོ།

དགེ་བཅུའི་བཀའ་ཁྲིམས་ཕན་བདེའི་འོད་དཀར་ཅན།།

ཕྲིན་ལས་ཤིང་རྟས་དྲངས་མཛད་ཁྲི་སྲོང་རྗེ།།

མཁྱེན་པའི་མ་རིག་སེལ་ལ་འཇམ་པའི་དབྱངས།།

བརྩེ་བས་གཞན་དོན་མཛད་ལ་འཇིག་རྟེན་དབང་།།

ནུས་པས་བདུད་དཔུང་འཇོམས་མཛད་གསང་བའི་བདག།

རིགས་གསུམ་གཅིག་བསྡུས་སེང་ཆེན་རྒྱལ་པོར་འདུད།།

གླིང་དཀར་རྟ་རྒྱུགས་རྟོགས་པར་བརྗོད་པའི་གཏམ།།

ངོ་མཚར་མཛད་པའི་རྣམ་གྲངས་ཆ་བརྒྱད་དུ།།

ཕྱེ་སྟེ་ནོར་བུའི་ཕྲེང་བ་འདི་གསལ་བྱ།།

ཆོས་བདག་མཁའ་འགྲོས་བཀའ་ཡི་གནང་བ་སྩོལ།།

 

འཁྲབ་ཚན་དང་པོ།

ཇོ་སྐྱིད་དམ་པ་སངས་རྒྱས་ལ།།

གུང་སྨན་རྒྱལ་མོས་བཀའ་ལུང་བརྩལ།།

ཨ་མ་འགག་བཟས་བཤོལ་མ་ཐེབས།།

ཁྲོ་ཐུང་ལུང་བསྟན་རྫུན་མ་ཕབས།།

དེ་ཡང་དུས་གསུམ་རྒྱལ་བ་ཡོངས་ཀྱི་ཕྲིན་ལས་ཀྱི་རོལ་གར་རྗེ་བཙུན་པདྨ་སམྦྷ་ཝ་བསམ་བཞིན་དགྲ་བླའི་རྒྱལ་པོའི་སྐུར་སྣང་སེང་ཆེན་ནོར་བུ་དགྲ་འདུལ་དེ་ཉིད་འཇིག་རྟེན་མི་ཡུལ་དུ་སྐུ་འཁྲུངས་ཤིང་ལོ་བདུན་གྱི་སྐབས་སུ་དངོས་ཅན་དངོས་མེད་ཀྱི་ལྷ་སྲིན་དུ་མ་དམ་ལ་བཏགས་ཤིང་ཐབས་ཀྱིས་འདུལ་བར་མཛད། ཇོ་སྐྱིད་དམ་པ་སངས་རྒྱས་ཁོང་ཉིད་རྨ་རྨད་གཡུ་ལུང་སུམ་མདོར་བཞུགས་པའི་ཚེ་ན། མ་གོང་སྨན་གནང་གྱི་རྒྱལ་མོའི་རྟ་རྒྱུགས་གོང་བ་རྩོད་དེ་གསེར་ཁྲི་ནོན་པའི་ལུང་བསྟན་གནང་། ཇོ་རུའི་སྐད་ཅིག་ལ་བྱང་ལྷ་རྟ་མགྲིན་དམར་པོར་སྤྲུལ་དེ་སྟག་རོང་ཁྲོ་ཐུང་ལ་ལུང་བསྟན་རྫུན་མར་ཕབ་སྟེ་གླིང་གི་ཕ་ཟོག་བཅྭོ་བརྒྱད། སྐྱ་ལོའི་སེང་ལྕམ་འབྲུག་མོ་སོགས་རྟ་རྒྱུགས་རྒྱལ་འཇོག་བྱས་ན་ཕ་སྟག་རོང་ཚང་ལ་ཐོབ་ཅེས་གསུངས། ཨ་ཁུ་ཁྲོ་ཐུང་ཐུགས་རབ་ཏུ་དགྱེས་ནས་འདོད་དོན་ཕྲིན་ལས་སྒྲུབ་པའི་སྐྱབས་འཇུག་ཞུས།

གུང་སྨན་རྒྱལ་མོ།

གླུ་ཨ་ལ་ལ་མོ་ཨ་ལ་ལེན།།

ཐ་ལ་གླུ་ཡི་ལེན་ལུགས་རེད།།

སྨན་ང་དང་ང་ངོ་མ་ཤེས་ན།།

ང་ཨ་ནེ་གནམ་སྨན་དཀར་མོ་ཡིན།།

ད་ཚ་བོ་ཨ་ནེའི་གླུ་ལ་ཉོན།།

གནས་ཨོ་རྒྱན་ཡུལ་གྱི་ལྷོ་ཕྱོགས་ན།།

རྟ་རྐྱང་བུ་འཕྲུལ་གྱི་འཕུར་ཤེས་ཡོད།།

དུས་ད་ལོ་བདག་འཛིན་བྱེད་རན་འདུག །

སྟེང་ལྷ་ནས་སྐོས་པའི་ན་ཆུང་མ།།

སྨན་སྐྱ་ལོའི་སེང་ལྕམ་འབྲུག་མོ་དེ།།

དུས་ད་ལོ་སྐྲ་བདག་མ་བྱས་ན།།

ཁོ་སྟག་རོང་བུ་དང་སྡེབ་ཉིན་ཡོད།།

དེ་སྡེབ་ན་རྟེན་འབྲེལ་སྒོ་མོ་འཆུག །

སང་ཐོ་རངས་སྟག་གི་དུས་ཚོད་ལ།།

ཁུ་ཁྲོ་ཐུང་ལུང་བསྟན་རྫུན་མར་ཕོབས།།

རྟ་གཡུ་བྱའི་མགྱོགས་དར་ལོན་ནོ་ཤོད།།

མ་འབྲུག་མོའི་སྐྲ་བདག་ཡིན་ནོ་ཤོད།།

མཐར་རྒྱལ་ཁ་ཚ་བོ་ཁྱེད་ལས་མེད།།

གླུ་མ་བརྗེད་གངས་དཀར་སེམས་ལ་ཟུངས།།

ཇོ་རུ་རིན་པོ་ཆེ།

ཚུར་ཉོན་དང་ཨ་མ་ལྷ་དཀར་སྒྲོན།།

ང་ཨ་ནེའི་ལུང་བསྟན་འདི་ལྟར་བྱུང་།།

གླིང་དཀར་པོའི་གསེར་ཁྲི་ནོན་དགོས་གསུངས།།

ཕྱོགས་དགྲ་བཞི་ཆོམས་ལ་ཕབ་དགོས་གསུངས།།

ཨ་མ་འགོག་མོ།

ངེད་ས་མཐའི་ཇོ་རུ་མ་བུ་གཉིས།།

ཟས་ཨབ་ཤ་ལོན་ན་ཕྱུག་པོ་ཡིན།།

གོང་གསེར་ཁྲི་ལོན་པའི་སྣང་བ་མེད།།

བུ་ཇོ་རུ་ཐུགས་སེམས་བདེ་བར་བཞུགས།།

ཇོ་རུ་རིན་པོ་ཆེ། ཁྱོད་ཨ་མའི་གཏམ་ལ་ཆག་འཇོག་མེད།།

ང་ཐག་པའི་བཏགས་ཀྱང་སྡོད་རྒྱུ་མིན།།

གླིང་དཀར་པོའི་ཕ་ཟོག་ཆ་བདུན་ལ།།

ང་ཇོ་རུ་མིན་པའི་བདག་པོ་མེད།།

ད་མི་སྡོད་གླིང་དཀར་སྟོད་དུ་འགྲོ།

རྟ་མགྲིན་དམར་པོ།

གླུ་ཨ་ལ་བདེ་མོའི་ཚིག་གིས་བརྗོད།།

ངག་ཐ་ལ་སྙན་མོའི་གླུ་ཡིས་འགུགས།།

ལྷ་ང་དང་ང་ངོ་མ་ཤེས་ན།།

མགོན་དབང་ཆེན་ཧྱགྷྀ་ཝ་ཡིན།།

ཚུར་ཉོན་དང་སྟག་རོང་ཁྲོ་ཐུང་དཔོན།།

གླིང་ཕ་ཟོག་ལས་ཀ་བཅྭོ་བརྒྱད་དང་།།

སྒ་སྐྱ་ལོའི་སེང་ལྕམ་འབྲུག་མོ་བཅས།།

གླིང་ལྷ་སྡེའི་རྟ་རྒྱུགས་རྒྱལ་འཇོག་ན།།

དོན་བདག་པོ་སྟག་རོང་ཁྱེད་ལས་མེད།།

བུ་ཁ་རྗེ་དར་འདོད་གླིང་དཀར་སྡེ།།

དར་ངོ་མ་སྟག་རོང་ཡབ་སྲས་ཡིན།།

རྟ་གཡུ་བྱའི་བང་རྩལ་མཁའ་ལ་བདེ།།

བུ་གདོང་བཙན་གསེར་ཁྲིའི་མངའ་བདག་ཡིན།།

གླིང་ཚོ་དྲུག་འདུ་ཐང་ཁྲ་མོར་བསྡུས།།

ཁྱེད་ཨ་ཁུས་རྟ་རྒྱུགས་སྟོན་མོ་བསྒྲིགས།།

དཔོན་ཁྲོ་ཐུང་ཐུགས་ལ་དེ་ལྟར་ཞོག །

ཨ་ཁུ་ཁྲོ་ཐུང་།

ཡ། ལྷ་བྱ་རྟ་མགྲིན་དམར་པོ་ངོ་སོ་བསྟོད། ལུང་བསྟན་གསལ་བོར་འདུག ཕ་གླིང་དཀར་གྱི་ཆོས་སྲིད་ཨ་ཁུའི་ཟིན་པར་འདུག ཐུགས་རྗེ་ཆེ། ཐུགས་རྗེ་ཆེ། ཧ་ཧ་་་་་་༼    ཡོལ་བ་དལ་གྱིས་བསུམ།   ༽

                                         འཁྲབ་ཚན་གཉིས་པ།

འདན་བཟས་ཐབས་ཚུལ་དུ་མ་ཡིས།།

མ་བཤོལ་ཨ་ཁུས་གླིང་དམག་བསྡུས།།

སྟག་རོང་རྒྱ་ཚས་ཕན་ཚུན་རྩོད།།

ཨ་མྱེས་ཕུ་ནུ་བར་འདུམ་བྱས།།

ཇོ་རུའི་སྤྲུལ་པས་སྟག་རོང་དཔོན་པོ་ཁྲོ་ཐུང་ལ་དབང་ཆེན་རྟ་མགྲིན་ཡིན་ཁུལ་གྱིས་ལུང་བསྟན་བརྩལ། ཨ་ཁུ་ཐུགས་རབ་དུ་དགྱེས་ནས་འདན་བཟའ་གསེར་མཚོ་མར་རྟ་རྒྱུགས་སྟོན་མོའི་སྤྲོས་པ་རྒྱ་ཆེར་དགོས་པའི་བཀའ་ཁྱབ་གནང་ཡང་འདན་བཟས་རྒོལ། སླར་ཡང་གཡོག་ཨ་ཁོད་ཐར་བའི་ཟོར་སྣར་གླིང་སྡེ་ཁྲ་མོར་འདུ་རར་བསྡུ་བའི་བརྡ་སྦྱར་དུ་བཅུག་ནས་རྔ་སྒྲ་དར་ཕྱར་གྱིས་བརྡ་བཏང་། སྟག་རོང་གཟིགས་འཕེན་དང་། རྒྱ་ཚ་ཞལ་དཀར་ཕན་ཚུན་རྩོད་པ་བསླངས་ཤིང་མདའ་བསྐོར་གཞུ་བསོར་དྲག་དུ་བྱས། གླིང་ཕ་ཁུ་གསུམ་གྱི་མགོ་འཛིན་སྤྱི་དཔོན་རོང་ཚ་ཁྲ་རྒན་དེས་སོ་སོར་ཕུ་ནུ་བར་བྱས་ཏེ་ལྷངས་འཇགས་གནས། ཁྲོ་ཐུང་རྒྱལ་པོའི་གླིང་ཆེ་འབྲིང་ཆུང་གསུམ་ལ་ཇ་ཆང་གི་སྐྱེམས་ཞུས་དང་། དགའ་སྐྱིད་ཀྱི་སྟོན་མོ་རྒྱ་ཆེན་བྱས་སོ།།

ཨ་ཁུ་ཁྲོ་ཐུང་།

ཤང་ཧ་ལ་ཧ་ལ་ཧ་ལ་ལེན།

གླུ་ཐ་ལ་ཐ་ལ་ཐ་ལ་འགུགས།།

ཕོ་ང་དང་ང་ངོ་མ་ཤེས་ན།།

སྟག་རོང་དཔོན་པོ་ཁྲོ་རྒྱལ་ཡིན།།

ད་མ་ཉལ་གསོན་དང་གསེར་མཚོ་མ།།

ལྷ་གོང་མའི་ལུང་བསྟན་འདི་འདྲ་བྱུང་།།

གླིང་ཚོ་དྲུག་ཕུ་ནུ་སུམ་ཅུ་དེ།།

ད་དགའ་སྐྱིད་སྟོན་མོ་བསྡུ་དགོས་གསུངས།།

གླིང་ཕ་ཟོག་གསེར་ཁྲི་འབྲུག་མོ་བཅས།།

མགྱོགས་འདོ་བའི་རྒྱལ་ལ་བཞག་པས་ན།།

ང་སྟག་རོང་དཔོན་ལ་ཐོབ་ཏོ་གསུངས།།

ཁྱོད་འདན་ཟས་སྟོན་ཆས་ལ་མོ་སྒྲིགས།།

སེམས་བསམ་པའི་གྲོགས་དང་འཕྲད་པས་ན།།

ཡང་སྨར་མོའི་རྒྱུ་ལ་བལྟ་རབས་མེད།།

གླུ་གོ་ན་རྣ་བའི་བཅུད་དུ་འཆོངས།།

ཚིག་གོ་བ་ཨེ་བྱུང་གསེར་མཚོ་མ།།

འདན་བཟའ་གསེར་མཚོ།

གླུ་ཨ་ལ༴ མ་ཐ་ལ༴

སྨན་ང་འདྲིའི་ང་ངོ་མ་ཤེས་ན།།

འདན་ཁ་རག་བུ་མོ་གསེར་མཚོ་ཟེར།།

ཚུར་གསོན་དང་སྟག་རོང་ཁྲོ་ཐུང་ལགས།།

ཁྱོད་ལྷ་ཡི་ལུང་བསྟན་མ་ཡིན་དེ།།

བུ་ཇོ་རུའི་རྒྱལ་ཐོབ་ལེན་འདོད་རེད།།

གླིང་ཕ་ཟོག་རིན་ཆེན་སྣ་བརྒྱད་དེ།།

ཁོ་སྟག་རོང་ཉམས་ལ་ཕན་རབས་མེད།།

གཞན་ཆས་ལོན་བསམ་ཡིད་ལ་མེད།།

རང་ཆས་མི་བརླག་ཐག་ཆོད་ཡིན།།

ཁྱོད་ཁྲོ་ཐུང་ཡིད་ལ་དེ་ལྟར་ཞོག །

ཨ་ཁུ་ཁྲོ་ཐུང་།

ཤེས་མེད་ཕུང་མོ་གསེར་མཚོ་མ།།

ལུང་བསྟན་གསེར་གྱི་མཆོད་རྟེན་ལ།།

གཏམ་ངན་སྟྭ་རེ་གཡུག་མཁན་མ།།

རྟེན་འབྲེལ་དགྲ་བླའི་ངོ་སོ་ལ།།

ལྟས་ངན་ཐལ་བ་གཏོར་མཁན་མ།།

མ་སྡོད་རང་གི་ཕ་ཁྱིམ་སོང་།།

                            གཡོག་ཨ་ཁོད་ཐར་བའི་ཟོར་སྣ།།

གཡོག་ཨ་ཁོད།    ཡོད་ལགས།

ཨ་ཁུ་ཁྲོ་ཐུང་།         ཁྱོད་མ་སྡོད་སྟག་ཐང་ཁྲ་མོ་ནས།།

ཁྲིམས་རྔ་ལེབ་ཆེན་བསྐོར་བརྡུང་གྱིས།།

ཁྲིམས་དུང་དཀར་མོ་བསྐོར་འབུད་ཀྱིས།།

གླིང་ཚོ་དྲུག་ཆེ་འབྲིང་ཆུང་གསུམ་ལ།།

ཀི་བསྭོ་ཧོ་གསུམ་ལ་མོ་གྱིས།།

གཡོག་ཨ་ཁོད། ལགས་ལེགས་སོ།། ༼   རྔ་དང་དུང་འབུད་དེ་བརྡ་སྦྱོར།

༼      རྟ་འགྲོས་རོལ་མོ་ཚར་ དང་ལྷན་དུ་ གླིང་སྡེ་ཁྲ་མོར་འདུ་རར་འདུས།     ༽

འདན་མ་བསམ་འགྲུབ།

ང་དང་ང་ངོ་མ་ཤེས་ན།།

ཚ་ཞིང་འདན་མ་བྱང་ཁྲ་ཡིན།།

ཁྲིམས་རྔ་ཁྲིམས་དུང་སིལ་སྙན་གསུམ།།

ལྷ་ཨོ་རྒྱན་པདྨའི་བསྒྲུབ་རྟེན་རེད།།

སྡེ་གླིང་དཀར་ལྷ་སྡེའི་སྤྱི་ཟོག་རེད།།

ཁྱོད་གཡོག་པོའི་བརྡུང་ལེ་མ་དགོས་པས།།

རྗེ་བླ་མའི་འཇལ་ཁ་ཡོད་ལེ་མིན།།

དུས་དེ་རིང་བརྡུང་ལེ་ཅི་དོན་ཡིན།།

གླིང་དཔའ་ཐུལ་ཕུ་ནུ་རེ་རེ་ལ།།

ཀི་བསྭོ་ཧོ་གསུམ་ཅི་ཚུགས་ཡིན།།

གཏམ་དང་མདའ་མོ་དྲངས་ན་དགའ།།

དྲང་ལ་དགའ་བའི་དྲང་གཏམ་གྱིས།།

གཡོག་ཨ་ཁོད།

ང་མ་བཞེས་དཔོན་པོ་ཁྲོ་རྒྱལ་གྱིས།།

མངག་པའི་མི་ཕོ་གོ་ཆོད་ཡིན།།

ང་ཡོང་དོན་རྩ་བ་བཤད་པའི་ན།།

ཁོང་ཁྲོ་ཐུང་རྒྱལ་པོའི་བཀའ་བཀོད་ལ།།

གླིང་ཕ་ཟོག་ལས་ཀ་བཅྭོ་བརྒྱད་དང་།།

སྒ་སྐྱ་ལོའི་མི་ཟོག་འཁོར་བཅས་དེ།།

སྡེ་དོན་མེད་ལག་ཏུ་མ་ཤོར་གོང་།།

གླིང་ཕུ་ནུའི་སྐུགས་ལ་བཞག་དགོས་གསུངས།།

ཨ་མྱེ་ཁྲ་རྒན།

ཡ་ཁོ་རེ་གླིང་དཀར་ཕུ་ནུ་ཚོ།།

ལར་འཇིག་རྟེན་དཀའ་བ་རྣམས་གསུམ་ལ།།

གདངས་ལྟ་བ་མེད་པའི་འདྲེ་འདུལ་དཀའ།།

ཕོ་གཅིག་གི་བྱ་ཆེན་རྩོམ་ནི་དཀའ།།

མོ་གཅིག་གི་གཞི་ཆེན་ཟིན་ནི་དཀའ།།

ལས་ཡག་ཤས་ཉེས་ཤས་གཉིས་ཀ་ཆེ།།

གླིང་ཕ་ཟོག་རྒྱལ་ལ་སྐུགས་རྒྱུ་དེ་ཐག་ཆོད་དཀའ་ནི་རེད་དང་ཁྲོ་ཐུང་རྒྱལ་པོའི་བཀའ་ལ་ཡར་རྗོགས་མེད་ན་རྨ་སྨད་ནས་ལྷ་སྲས་འགག་ཚ་ཇོ་རུ་དེ་ཆུང་རྒྱུད་གླིང་གི་གྲྭལ་དུ་འབུད་རྒྱུ་དང་། ལྷ་རྟ་རྐྱང་ཆུང་དེ་རི་མཐོ་དམན་གང་ན་ཡོད་ཀྱང་འཛིན་ཐབས་བྱེད་དགོས་སོ།།

ཨ་ཁུ་ཁྲོ་ཐུང་།

ཧ་ཧ་་་ གསེར་ནག་གི་མཆོད་རྟེན་བཞེངས་ས་ལ། ར་གན་སེར་བོ་མེད་པའི་ཐབས་ཆགས། ཕ་གླིང་བའི་དཔའ་གྲྭལ་གཤིབ་ས་ལ། འདྲེ་ཕྲུག་ཇོ་རུ་མེད་པའི་ཐབས་ཆགས། ཆིབས་རྟ་མཆོག་གི་རྒྱུགས་གྲྭལ་གཤིབ་ས་ལ། སྔོ་རྟ་རྐྱང་རིས་མེད་པའི་ཐབས་ཆགས།

རྒྱ་ཚ་ཞལ་དཀར།

གླུ་ཨ་ལ༴

ཐ་ལ༴

ང་དང་ང་ངོ་མ་ཤེས་ན།།

ལྡོང་འབུམ་པའི་རྒྱ་ཚ་ཞལ་དཀར་ཟེར།།

ཚུར་ཉོན་དང་གླིང་དཀར་སྡེ་བ་ཚོ།།

དུས་ད་སྔོན་ཁྲ་མོ་གླིང་དཀར་སྡེའི།།

ལྡོང་སྨུག་པོའི་རྒྱལ་རབས་བཅྭོ་བརྒྱད་ལ།།

ལས་འདི་འདྲ་མ་གོ་གླིང་བ་ཚོ།།

དུས་དེ་རིང་ཁྲོ་ཐུང་རྒྱལ་པོ་ཡིས།།

ཁོང་ཆེ་རྒྱུད་འབྲིང་རྒྱུད་སྟོན་མོ་སྒྲིགས།།

སྐྱིད་རྟ་ཕོའི་བང་རྒྱུགས་ཕ་ཆས་རྩོད།།

ངེད་ཆུང་རྒྱུད་ཕུ་ནུ་ག་ཆུང་བྱས།།

ངས་ནུ་བོ་ལྷ་སྲས་ཇོ་རུ་ལ།།

གླིང་རྟ་རྒྱུགས་སྟོན་མོའི་ཆ་སྐད་མེད།།

ཡ་ཁོ་རེ་ཁྲ་མོ་གླིང་དཀར་དང་།།

ལས་ཤེ་རེ་ཆེ་རྒྱུད་ཆེ་མཐོང་ཅན།།

བྱ་འདི་འདྲ་དོན་ཐོག་འཇོག་དགོས་ན།།

ངས་ཕྱི་དམེ་ནང་ལ་མ་གཏུག་ཚེ།།

དཔའ་རྒྱ་ཚ་མིན་པའི་རྟགས་ལ་ཞོག །

ཁྱོད་ཆེ་རྒྱུད་ཡིད་ལ་དེ་ལྟར་འཆོང་།།

སྟག་རོང་གཟིགས་འཕེན། ༼   རོལ་མོའི་སྒྲ་རྒྱན་ཁྲོད་ནས་རྒྱ་ཚ་ཞེས་བོས་ཏེ།   ༽

གླུ་ཨ་ལ༴

ཐ་ལ༴

ང་དང་ང་ངོ་མ་ཤེས་ན།།

ཆེ་རྒྱུད་སྟག་རོང་གཟིག་འཕེན་ཡིན།།

ཉོན་དང་འབུམ་པའི་བུ་རོ་ཉོན།།

ཁྱོད་འུ་གཉིས་འདྲ་འོ་ཨེ་བསམ་ཏོ།།

དོན་མི་འདྲ་ངོ་མ་སེམས་ཐག་ཡིན།།

གླིང་ཕུ་ནུའིཆེ་འདུས་སྟོན་མོ་ལ།།

ཕོ་ཤེས་མེད་ཀ་བརྡར་ཁོང་ཁྲོ་སྐྱེས།།

བུ་ཁྱོད་ལ་དཔའ་ཡ་མ་ཡོངས་ན།།

ང་དཔའ་ཐུལ་མིང་བཏགས་དོན་མེད་རེད།།

གཏམ་ཨ་མཚར་ཁ་མཚར་མི་བཤད་དེ།།

གླིང་སྡེ་བའི་ལྟད་མོ་ལྟོས་དང་ཆོག །

དཔའ་སྟག་རོང་སྐྱེན་པོའི་མདའ་རྩེ་ལ།།

ཕོ་ཀ་བརྡར་མ་བཞག་སྟག་རོང་མིན།།

ཁྱོད་ཤེས་མེད་ཡིད་ལ་དེ་ལྟར་ཞོག །

ཨ་མྱེ་ཁྲ་རྒན། ༼    རྔ་དང་རོལ་མོའི་སྒྲ་རྒྱན་ཁྲོད་ནས་རྒྱ་ཚ་དང་སྟག་རོང་གཟིགས་འཕེན་ཞེས་བོས་ཏེ།    ༽

ཕོ་ང་དང་ང་ངོ་མ་ཤེས་ན།།

སྤྱི་དཔོན་རོང་ཚ་ཁྲ་རྒན་ཟེར།།

རྒྱལ་སྐུགས་པའི་ལས་ཟོག་རིན་པོ་ཆེ།།

ཕོ་བུ་དཔའ་རྟ་མགྱོགས་གཅིག་གི་ཆོག །

ཕ་ཕུ་ནུའི་གཟའ་འདུས་སྟོན་མོ་ལ།།

ཕོ་སྔ་ཕྱི་གང་ཐོན་འདྲ་འདྲ་ཡིན།།

བརྟག་ཤེས་ན་རྟེན་འབྲེལ་སྣ་ཚོགས་ཡོད།།

སྟག་རོང་དཔོན་དང་རྒྱ་ཚ་གཉིས།།

བུ་ཁྱོད་གཉིས་དཔའ་བོའི་རང་ཚོད་ཟུངས།།

ཚ་བོ་ལྷ་སྲས་ཇོ་རུ་དེ།།

གླིང་དཀར་ཕུ་ནུའི་གྲལ་དུ་བོས།།

དེའི་བར་དུ་ནང་དམེ་མ་བྱེད་ཅིག །

སྟོན་མོ་གླིང་དཀར་ལྷ་སྡེའི་ཞོག །

རྟ་རྒྱུགས་ཕུ་ནུ་ཁ་གསུམ་རྒྱུགས།།

༼    གསོལ་སྟོན་སྒྲིག་ཏེ། བདུད་རྩི་འོ་མའི་རྒྱ་མཚོ།། སྐྱེམས་ཕུད་གསེར་སྐྱེམས་ཟེགས་མ།། བདུད་རྩི་རོ་བརྒྱ་ལྡན་པ་འདི།། ལྷ་གཙང་མ་ཕུད་ཀྱི་མཆོད་པ་འབུལ་ཞེས་ལན་གསུམ་དང་སྒྲ་རྒྱན་བཅས་དང་ཞབས་བྲོ་འཁྲབ་རྗེས་སུ་རོལ་དབྱངས་ཁྲོད་ནས   ༽

ཨ་མྱེ་ཁྲ་རྒན།          སེང་ལྕམ་འབྲུག་མོ་

སེང་ལྕམ་འབྲུག་མོ།     ཡོད་ལགས།

ཨ་མྱེ་ཁྲ་རྒན།          སྐྱ་ལོའི་སེང་ལྕམ་འབྲུག་མོ་འདི།།

ཡེ་ཤེས་མཁའ་འགྲོའི་སྤྲུལ་པ་རེད།།

ཇོ་རུ་འབོད་པའི་རྟེན་འབྲེལ་ཡོད།།

ཁྱོད་མ་འདུག་ལ་མོ་གདན་འདྲེན་བྱོན།།

སེང་ལྕམ་འབྲུག་མོ།

འོ་ལེགས་སོ།། ༼     ཡོལ་བ་དལ་གྱིས་བསུམ།   ༽

 

                                                   འཁྲབ་ཚན་གསུམ་པ།

སྐྱ་ལོའི་སེང་ལྕམ་འབྲུག་མོ་དེ།།

རྨ་སྨད་ཇོ་རུ་འབོད་དུ་སོང་།།

སྤྲུལ་པ་ཉི་མ་རྒྱལ་མཚན་གྱིས།།

ཉམས་སད་བྱས་ཤིང་རྟེན་འབྲེལ་བསྒྲིགས།།

མ་རྗེ་བཙུན་སྒྲོལ་མ་དཀར་མོའི་སྤྲུལ་པ། དྭངས་སྨན་ཇ་མ་བཅུ་གསུམ་གྱི་གཙོ་མོ། སྒ་སྐྱ་ལོའི་སྟོན་པ་རྒྱལ་མཚན་གྱི་སྲས་མོ་ན་ཆུང་སེང་ལྕམ་འབྲུག་མོ་དེ་རྨ་སྨད་གཡུ་ལུང་སུམ་མདོར། ཇོ་སྐྱིད་དམ་པ་སངས་རྒྱས་འབོད་དུ་སོང་ཚེ། རྨ་མཁན་པ་བར་མའི་ཡར་ཐང་དུ་ཇོ་རུའི་སྤྲུལ་པ་ཉི་མ་རྒྱལ་མཚན་གྱིས་ཉམས་སད་བྱས་ཤིང་ཐབས་ཤེས་བདེ་སྟོང་དགའ་བཞིའི་རྟེན་འབྲེལ་སྒྲིགས་པ་མ་ཟད་སྟོང་བཞིའི་ཡེ་ཤེས་ཀྱི་རྗེས་ཆགས་སྦྱངས།

༼    རྟ་འགྲོས་རོལ་མོ་ཚར་ ལྷན་དུ་འཁྲབ་ཡོལ་གྱི་གཡས་གཡོན་ནས་བུད་དེ       ༽

བེ་རུ་ཉི་མ་རྒྱལ་མཚན།

གླུ་ཨ་ལ༴

ཐ་ལ༴

ཕོ་ང་དང་ང་ངོ་མ་ཤེས་ན།།

ལྡོང་བེ་རུའི་ཉི་མ་རྒྱལ་མཚན་ཟེར།།

ཆུ་ཕ་རིས་བུ་མོ་ཁེར་མདུར་མ།།

མགོ་གཡུ་བྱུར་ཤིག་ཤིག་གང་ན་འགྲོ།

རྒྱབ་ཁྲ་མོ་སྤུང་སྤུང་ཅི་ཚུགས་བྱེད།།

ལུས་རིན་ཆེན་རྒྱན་གོས་གང་ཡོད་དེ།།

དེ་རིང་ཇག་པའི་ཟ་སྐལ་ཡིན།།

མགྲོན་ཕྱུག་པོ་ཟ་རྒྱུ་ཨེ་མཐོང་སྙམས།།

སྨན་ཁྱོད་བས་ཕྱུག་ཅིག་གང་ན་གདའ།།

ཁྱོད་ས་ཆ་ཡུལ་ཕྱོགས་གང་དུ་འགྲོ།

གཏམ་སྐད་ཆ་དྲང་པོར་མ་བཤད་ན།།

ལས་བྱ་བ་ཅི་བྱུང་ལྟད་མོ་ལྟོས།།

སེང་ལྕམ་འབྲུག་མོ།

གླུ་ཨ་ལ༴

ཐ་ལ༴

སྨན་ང་དང་ང་ངོ་མ་ཤེས་ན།།

སྒ་སྐྱ་ལོའི་སེང་ལྕམ་འབྲུག་མོ་ཟེར།།

ཕ་གླིང་བའི་རྟ་རྒྱུགས་སྐུགས་དགོས་ཟེར།།

བུ་ཇོ་རུ་འབོད་པའི་ཕོ་ཉ་ཡིན།།

ང་འབྲུག་མོ་ན་ཆུང་བུ་མོ་ལ།།

དུས་ད་རུང་མི་ཚེ་རིང་སྣང་སྐྱེས།།

ད་དེ་ཚེ་སེམས་ལ་བསམ་ཚུལ་རེད།།

ཁྱོད་ཇག་པ་དཔའ་བོ་དགྲ་འཇིགས་ཅན།།

ངས་ལུས་ཆས་རྒྱན་གོས་ཁྱེད་ལ་འབུལ།།

ང་མ་གསོད་ཨ་བུ་སྐུ་ཚེ་རིང་།།

ཉི་མ་རྒྱལ་མཚན།

ང་ལྡོང་ཡུལ་ཉི་མ་རྒྱལ་མཚན་དང་།།

ཁྱོད་གླིང་དཀར་སེང་ལྕམ་འབྲུག་མོ་གཉིས།།

ཚེ་འདི་སྣང་མཐུན་པའི་གཏམ་གཅིག་བཤད།།

ལས་ཕྱི་མ་ཐུབ་པའི་མནའ་གཅིག་འཇོག །

༼   རྟ་འགྲོས་རོལ་མོ་ཚར་ ལྷན་དུ་འཁྲབ་ཡོལ་གྱི་གཡས་གཡོན་ནས་བུད་དེ་ཇོ་རུས་མི་ཡིན་ན་བར་ཆད་བདུད་དང་འཁྲོལ་ཞེས་འུར་རྡོས་འཕངས། ༽

ཇོ་རུ་རིན་པོ་ཆེ།

ཀླུ་གཙུག་ན་ནོར་གྱི་གདན་ས་ལ།།

དུས་དེ་རིང་འདྲེ་མོའི་སྐོར་རྒྱུགས་བྱས།།

འུར་ཁྲ་ཐུང་དགྲ་བླའི་རྟེན་མཁར་ཡིན།།

འདྲེ་ཡིན་ན་རྣམ་ཤེས་བདེ་ཆེན་དྲོངས།།

མི་ཡིན་ན་བར་ཆད་བདུད་དང་འཁྲོལ།།

སེང་ལྕམ་འབྲུག་མོ།

ཚུར་ཉོན་དང་ལྷ་སྲས་ཇོ་རུ་ལགས།།

སྒ་སྐྱ་ལོའི་སེང་ལྕམ་འབྲུག་མོ་ང་།།

འགྲོ་དབང་མེད་ཕུ་ནུའི་བདག་འཛིན་བྱེད།།

འདུག་དབང་མེད་ཇོ་རུའི་རྔན་ཆེན་འདོན།།

སྡུག་ཉེས་ཆད་འབྲུག་མོ་ང་ལ་བབས།།

བུ་ཇོ་རུ་གོང་མ་ལྷ་ནས་བསྐོས།།

ཐུགས་འགལ་བ་ཅི་བྱུང་འབྲུག་མོས་བཤགས།།

ཁྱེད་ཡར་བྱོན་གླིང་དཀར་སྟོད་ལ་བྱོན།།

ཇོ་རུ་རིན་པོ་ཆེ།

འོ་ན་འབྲུག་མོ་ཁྱོད་ཀྱིས། ང་ཡི་ཚེ་རབས་ལས་ཀྱི་རྟ་ཕོ་དེ་ཟིན་དགོས། ང་གླིང་ལ་འགྲོ ཁྱོད་འབྲུག་མོའི་སྐྲ་བདག སྐྱ་ལོའི་རྒྱུ་བདག གླིང་དཀར་པོའི་གསེར་ཁྲི་འཛིན་པ་དཀའ་རྒྱུ་མི་འདུག

སེང་ལྕམ་འབྲུག་མོ།

འོ་ ལེགས་སོ།། ༼    ཡོལ་བ་དལ་གྱིས་བསུམ།    ༽  

                                 འཁྲབ་ཚན་བཞི་བ།

མཐོན་པོ་དགུ་སྒྲིགས་རི་རྩེར་སླེབས།།

རག་ཟས་གནས་རི་རྩིས་སྤྲོད་གནང་།།

ཨ་མས་དགྲ་བླ་ལྷ་འབོད་བྱས།།

སྲུང་མས་རྟ་མཆོག་རང་ནོམ་སྤྲད།།

མ་ཡུམ་འགོག་བཟའ་ལྷ་དཀར་དང་། རག་ཟ་དགེ་མཚོ། ལྷ་མོ་ནེའུ་ཆུང་། སེང་ལྕམ་འབྲུག་མོའི་དཔུང་བཅས་ཞགས་པ་རེ་རེ་བསྣམས་ནས་རྨ་མཐོན་པོ་དགུ་སྒྲིག་གི་རི་རྩེར་ལྷ་རྟ་རྐྱང་ངུ་འཚོལ་དུ་ཕྱིན་ནས་ཕྱོགས་བཞིར་བལྟས་ཚེ་རྟ་རྐྱང་ཆུང་གར་ཡང་མ་མཐོང་། རག་ཟས་རྒྱ་གར་ནག་བོད་ཡུལ་སོགས་ཀྱི་གནས་རི་གཞི་བདག་རྣམས་དཔེ་དོན་མཐུན་པའི་རྩིས་སྤྲོད་རྒྱས་པར་གནང་། ཨ་མ་འགོག་མོས་དགྲ་བླ་ཝེར་མའི་ཚོགས་ལ་འབོད་བསྐུལ་དང་། སྨོན་ལམ་བདེན་ཚིག་གི་གླུ་ཞུས་གནང་ཕྲལ། ཐག་རིང་བོ་ནས་འདོ་རྗེ་རྐྱང་ཆུང་གི་འཚེར་སྐད་སྙན་ལ་རིང་ལ་ཐེངས་གསུམ་གྲགས་བྱུང་བའི་རྗེས་སོར་ཐབས་ཀྱིས་བཟུང་། དེ་ཕྲལ་སེང་ལྕམ་འབྲུག་མོས་རྟེན་འབྲེལ་མགུར་མ་དང་བདེ་སྟོང་རྡོ་རྗེ་གླུ་ཡི་བྲོ་གར་སྣ་ཚོགས་ཀྱིས་བརྡ་ཐབས་ཟབ་མོའི་ཕྱོགས་བཞིའི་དགྲ་བཞི་འདུལ་ཞིང་རྫོང་ཆེན་བཅྭོ་བརྒྱད་སོགས་ཕྲིན་ལས་གསར་བའི་རྟེན་འབྲེལ་སྒྲིག

རག་ཟ་དགེ་མཚོ།

གླུ་ཨ་ལ་ལ་མོ་ཨ་ལ་ལེན།།

མ་ཐ་ལ་ལ་མོ་ཐ་ལ་ལེན།།

མ་འཇིགས་བརྒྱད་གཡུལ་འཇོམས་རྒྱལ་བའི་ཡུམ།།

དཔལ་རྗེ་བཙུན་སྒྲོལ་མ་དཀར་མོ་མཁྱེན།།

ས་འདི་ཡི་ས་ངོ་མ་ཤེས་ན།།

རྨ་མཐོན་པོ་དགུ་སྒྲིག་ཡང་རྩེ་རེད།།

སྨན་ང་དང་ང་ངོ་མ་ཤེས་ན།།

ང་ཆག་ཆེན་རག་ཟ་དགེ་མཚོ་ཟེར།།

སྟོད་ཡར་ལ་བལྟས་པའི་ལྟད་མོ་ལ།།

རི་མཐོན་པོ་སྤོས་ཕོར་བཤམ་འདྲ་འདི།།

སྟོད་རྒྱ་གར་སྤོས་རི་ལྔ་ལྡན་རེད།།

ཡང་སྨད་ལ་བལྟས་པའི་ལྟད་མོ་ལ།།

རྫ་མཐོན་པོ་གླང་ཆེན་རྒྱན་བཀོད་འདྲ།།

སྨད་རྒྱ་ནག་གླང་ཆེན་འགྱིང་རི་རེད།།

ཡང་མདུན་ལ་བལྟས་པའི་ལྟད་མོ་ལ།།

གངས་མཐོན་པོ་ཕྱེ་མར་བཤམས་འདྲ་འདི།།

རྨ་སྤོམ་ར་ལྷ་ཡི་ཕོ་བྲང་རེད།།

བུ་ཇོ་རུ་གོང་མ་ལྷ་ནས་བསྐོས།།

དུས་ཇི་སྲིད་ནམ་མཁའ་གནས་ཀྱི་བར།།

སྨོན་ལམ་དང་ཕྲིན་ལས་རྒྱུན་ཆད་མེད།།

དོན་དགེ་ལེགས་འགྲུབ་པའི་བཀྲ་ཤིས་ཤོག །

ཨ་མ་འགོག་མོ།

གླུ་ཨ་ལ་སྐྱེ་མེད་ངང་ནས་ལེན།།

ངག་ཐ་ལ་འགག་མེད་གདངས་སུ་འགུགས།།

གནས་ཨོ་རྒྱན་རང་བྱུང་ཕོ་བྲང་ནས།།

མ་རྒྱལ་ཡུམ་རྡོ་རྗེ་ཕག་མོ་མཁྱེན།།

སྨན་ང་དང་ང་ངོ་མ་ཤེས་ན།།

མ་འགོག་བཟའ་ལྷ་དཀར་སྒྲོན་མ་ཡིན།།

མ་ཨ་ནེ་གནམ་སྨན་དཀར་མོ་དང་།།

དགྲ་བླ་ཝེར་མའི་ཚོགས་དང་བཅས།།

ངེད་མ་བུ་སྐྱོབ་པའི་སྲུང་མ་རྣམས།།

ད་མ་གཡེལ་དེ་རིང་གྲོགས་ལ་བྱོན།།

ཁོང་ལྷ་སྲས་མི་ཡུལ་མངག་དུས་སུ།།

དུས་ནམ་དགོས་ལུང་བསྟན་ཡོད་དོ་གསུང་།།

རྟ་རྐྱང་རྒོད་རི་ནས་བཟུང་རོགས་དང་།།

བོད་དབུ་ནག་འདུག་ཆུས་སྒྲུབ་རོགས་མཛོད།།

ལྷ་གོང་མའི་མགོན་སྐྱབས་མ་གཡེལ་རེམ། །༼    རྟའི་མཚེར་སྐད་ལན་གསུམ།   ༽

འབྲུག་མོ།

             ཨ་ཧོ་ཡ། ཐབས་མཆོག་ལྷ་སྲས་མི་ཡི་ཉི་མ།།

            ཤེས་རབ་བརྡ་ཐབས་དཔའ་མོའི་གར་སྟབས།།

           ཟུང་འཇུག་མཉམ་སྦྱོར་བདུན་ལྡན་བདེ་བ།།

ཆགས་བྲལ་ཞུ་བདེ་དགའ་བཞིའི་མཆོད་པས།།

དོན་དམ་ཡེ་གྲོལ་ཚོགས་ཆེན་རྫོགས་ཤོག །

སྣང་སྟོང་སྒྱུ་མའི་གར་གྱི་གཟུགས་བརྙན།།

གྲགས་སྟོང་བརྗོད་བྲལ་རྡོ་རྗེའི་རོལ་མོ།།

ཚོར་སྟོང་ལྷན་སྐྱེས་ག་བུར་དྲི་བསུང་།།

རེག་གྲོགས་བཅུ་དྲུག་དགའ་བའི་རྗེས་ཆགས།།

ཡེངས་མེད་དྲན་པའི་ངང་ནས་སྐྱོངས་ཤོག །

ཡེ་ཡིན་རྡོ་རྗེ་ཕུང་པོའི་གྲོང་ཁྱེར།།

རྩ་གསུམ་འཁོར་ལོ་ལྔ་ཡི་ཞིང་ན།།

རིག་འཛིན་དཔའ་བོ་ཚོགས་རྗེ་རྣལ་འབྱོར།།

གཏུམ་མོ་ཡེ་ཤེས་མེ་ཡི་མཆོད་པས།།

གདན་གསུམ་རྩ་གནས་ལྷ་ཚོགས་དགྱེས་ཤིང་།།

ཡེ་གྲོལ་སྐུ་གསུམ་རང་ས་ཟིན་ཤོག །    ཇོ་རུ་དང་འབྲུག་མོའི་ཞབས་བྲོ། རོལ་དབྱངས།   ༽   

ཞབས་བྲོ།

  ཨ་ཧོ་ཡ།

ཀ།  འཆི་མེད་མཚོ་སྐྱེས་བླ་མ།།

རྒྱ་བོད་རིག་འཛིན་རྒྱ་མཚོས།།

འགྲོ་དོན་དུས་ལ་བབས་པའི།།

རྟེན་འབྲེལ་དགོངས་པ་མཛད་སོང་།།

ཁ།  རྒྱལ་ཡུམ་ཡེ་ཤེས་མཚོ་རྒྱལ།།

རིགས་ལྔ་གནས་ཡུལ་མཁའ་འགྲོས།།

བཀྲ་ཤིས་བུམ་པ་བསྣམས་ནས།།

གཙང་ལྡན་སྐུ་ཁྲུས་མཛད་སོང་།།

ཀ།   འཇམ་དབྱངས་སྤྱན་གཟིགས་ལ་སོགས།།

ཕྱོགས་བཅུའི་སེམས་དཔའི་རྣམས་ཀྱིས།།

སྨོན་ལམ་བདེན་པའི་ཚིག་གིས།།

བཀྲ་ཤིས་མེ་ཏོག་འཐོར་སོང་།།

ཁ། དྲི་ཆབ་ལྷ་མོ་ལ་སོགས།།

བྱང་ཆུབ་སེམས་མའི་ཚོགས་ཀྱིས།།

བདེ་སྟོང་རྡོ་རྗེ་གླུ་ཡིས།།

དགྱེས་པའི་བྲོ་གར་འཁྲབ་སོང་།།

ཀ།  སྒོ་སྲུང་ཁྲོ་རྒྱལ་རིགས་བཞི།།

ལས་བྱེད་ཕོ་ཉའི་ཚོགས་ཀྱིས།།

ཕྱི་ནང་གསང་བའི་བགེགས་ཚོགས།།

ཕྱོགས་ཀྱི་ཕ་མཐར་བསྐྲད་སོང་།།

ཁ།འཇིག་རྟེན་ཕྱོགས་བཅུ་སྐྱོང་བ།།

ཚངས་དང་ཁྱབ་མཇུག་ཚོགས་ཀྱིས།།

སྙན་དབྱངས་རོག་མོའི་སྒྲ་ཡིས།།

བསྟོད་ཚིག་མཆོད་པ་འབུལ་ལོ།།

ཀ་ཁ། ཨེ་མ་ཧོ་ཡ་དགའ་བ།།

ཨ་ཧོ་ངོ་མཚར་ཆེ་བ།།

དགའ་སྐྱིད་གླུ་ཡི་མཆོད་པ།།

སྙིང་གྲོགས་ཁྱེད་ལ་འབུལ་ལོ།།   ཡོལ་བ་དལ་གྱིས་བསུམ།   ༽

 

           འཕྲོ་དྲྭ་ངོས་རྗེས་མར་མུ་འགོད།  

 

 

ཀློག་གྲངས།:[190]
གླིང་གེ་སར་རིག་གནས་དྲྭ་ཚིགས།
དྲ་ཚིགས་འདིའི་པར་དབང་ཡོད་ཚད་གླིང་གེ་སར་རིག་གནས་དྲྭ་བར་དབང་བས།
འདི་ནས་རྩོམ་ཡིག་དང་བརྙན་རིས་དག་དྲྭ་བདག་ལ་འབྲེལ་གཏུགས་མ་བྱས་པར་མི་བཀོལ་བར་ཞུ།
འབྲེལ་ཡོད་རྩོམ་ཡིག་སྐུར་གནས།   382740503@qq.com