སྐད་འཇོག་ས།

གླིང་གེ་སར་དྲ་བ་འདི་གཉེར་བའི་དམིགས་ཡུལ་ནི། བོད་ཀྱི་མི་སྣ་དཔའ་བོ་གླིང་རྗེ་གེ་སར་ནི་བོད་ཀྱི་ལོ་རྒྱུས་སྟེང་དངོས་སུ་བྱུང་བའི་དོན་གནས་ཀྱི་མི་སྣ་ཞིག་ཡིན་ན་ཡང་། དུས་ཀྱི་གནས་བབ་ཀྱིས་མི་སྣ་འདི་ལ་ངག་ཏུ་བརྒྱུད་པའི་དོན་དངོས་ལོ་རྒྱུས་ཐན་ཐུན་ལ་གཞི་བཅོལ་བའི་ཡིག་ཐོག་གི་ལོ་རྒྱུས་ཐད་ནས་ལྷ་སྒྲུང་ལྟ་བུར་ཆགས་ཏེ་ས་ཁྱབ་རྡོ་ཁྱབ་ཏུ་གྱུར་བ་དང་གཅིགགླིང་གེ་སར་གྱི་མི་རབས་ཕྱི་མ་དག་གིས་རང་རིགས་ཀྱི་མེས་པོའི་དོན་དངོས་ལོ་རྒྱུས་ཀྱི་དཔྱད་གཞི་ལ་ཆེར་མ་དམིགས་པར། དཔའ་བོའི་བསྟོད་སྒྲུང་གི་ཁ་སྙན་ངག་གི་འཇིག་རྟེན་ཞིག་ཏུ་ཁྲིད་དེ་རྩོམ་པ་པོ་རང་རང་གིས་རྟོག་པ་འཆར་ཡན་གྱི་ལམ་ནས་བྲིས་པ་མང་སྟབས། བོད་ཀྱི་དཔའ་བོའི་ལོ་རྒྱུས་ལ་དོན་དངོས་དང་ཉེ་བའི་ལོ་རྒྱུས་དང་། དཔའ་བོའི་བསྟོད་སྒྲུང་གི་སྙན་ངག་གཉིས་ལས་ཕྱི་མ་ཁྱབ་ཆེ་བར་སོང་སྟེ། ད་ཆ་འཛམ་གླིང་གི་རྟོགས་བརྗོད་ཆེན་མོ་འདི་ལ་སྤྱིའི་ཆ་ནས་སྙན་གྲགས་དང་མཛད་འཕྲིན་རྒྱ་ཤིན་ཏུ་ཆེ་ན་ཡང་།ཞིབ་གསལ་གྱི་ཆ་ན་སྒྲུང་མཁན་སོ་སོའི་འབྲི་སྟངས་མི་འདྲ་བ་དང་།སྔ་ཕྱི་མི་མཐུན་པ་སོགས་ལོ་རྒྱུས་པ་སོ་སོའི་འདོད་པ་མི་མཐུན་ས་མང་པོ་ཞིག་གིས་བོད་ཀྱི་གླིང་གེ་སར་རིག་གཞུང་ལོ་རྒྱུས་ལ་ཞིབ་འཇུག་པ་རྣམ་པར་དཀའ་ངལ་ཆེ་བའི་གནས་བབ་ལ་ཁ་གཏད་དེ། གླིང་གེ་སར་རིག་གནས་ཀྱི་ཕྱོགས་ཡོངས་ཀྱི་དཔྱད་གཞིའི་མ་ལགས་འཐུས་སྒོ་ཇེ་ཚང་ལ་གཏོང་ཨེ་ཐུབ་སྙམ་ནས་གཉེར་བ་ཡིན་མོད། འོན་ཀྱང་དྲ་བ་འདི་གཉེར་བ་པོར་བོད་ཁུལ་ཡོངས་ཀྱི་གླིང་གེ་སར་དོན་དངོས་ལོ་རྒྱུས་དང་ཉེ་བའི་དཔྱད་གཞི་ལ་ཐོས་མཐོང་གི་རྒྱ་ཆུང་བས། གླིང་གེ་སར་རིག་གནས་ལ་སྤྲོ་སྣང་ལྡན་པའི་རྒྱ་ཆེའི་གྲོགས་པོ་དག་གིས་དྲ་བ་འདིའི་ས་བཅད་སོ་སོའི་ཁྱབ་ཁོངས་ལ་དཔྱད་གཞི་བསྡུ་རུབ་དང་། གླིང་གེ་སར་དཔྱད་རྩོམ། གླིང་གེ་སར་སྒྱུ་རྩལ་རི་མོ། གླིང་གེ་སར་དོན་དངོས་ལོ་རྒྱུས།གླིང་གེ་སར་དང་འབྲེལ་བའི་བོད་ཡུལ་སྟོད་སྨད་བར་གསུམ་གྱི་ཡུལ་སྲོལ། གླིང་གེ་སར་འཁྲབ་གཞུང་། གླིང་གེ་སར་ལོ་རྒྱུས་སམ་བསྟོད་སྒྲུང་གསར་རྙིང་དང་རྩོམ་པ་པོ་དང་འབྲེལ་ཡོད་མི་སྣ་ངོ་སྤྲོད་སོགས་མཁོ་སྤྲོད་གནང་སྦྱིན་གྱི་བཀའ་དྲིན་སྐྱོང་རྒྱུ། མདོར་ན་བོད་རང་གི་དཔའ་བོའི་ལོ་རྒྱུས་ལ་གཅེས་སྐྱོང་གི་འདུ་ཤེས་ལྡན་པའི་སྒོ་ནས་ཕྱོགས་ཡོངས་ལ་མཛུབ་སྟོན་རྒྱབ་སྐྱོར་གནང་རྒྱུ་བཀའ་དྲིན་ཆེ་ཞུ་བ་དང་། ནོར་འཁྲུལ་དང་རིག་གནས་ཀྱིས་མ་འཇོན་ས་ཡོད་ན་རྒྱ་ཆེའི་ཀློག་པ་པོ་རྣམ་པར་གུས་བཤགས་བྱེད་ངེས་ཡིན། དེ་དང་ལྷན་བོད་ཀྱི་མེས་པོ་གླིང་རྗེ་སར་སྐྱེས་བུའི་རྣམ་ཐར་ལོ་རྒྱུས་རིང་མོའི་མཛད་འཕྲིན་འཛམ་གླིང་རིག་གནས་བང་མཛོད་ཀྱི་སྙིང་བཅུད་འདོད་འབྱུང་གི་ཡིད་བཞིན་ནོར་བུ་ལྟ་བུར་འགྱུར་ཐུབ་པའི་སྨོན་འདུན་ཡང་ཡང་ཞུ་བ་ལགས་སོ། ། ཞོར་དུ་དྲ་བ་འདིའི་གཞི་གྲངས་མཛོད་དང་ལོ་རེའི་དྲྭ་གནས་དོ་དམ་གྱི་ཁྲལ་སོགས་ཀྱི་ཐད་ནས་རོགས་སྐྱོར་གནང་མཁན་སྤྲུལ་ཀློང་ཡངས་དང་མི་ཉག་པ་འཇམ་དབྱངས་འོད་ཟེར། ཇོ་ཁྲི་འཇམ་དབྱངས་བསྟན་པའི་རྒྱལ་མཚན།དྲེལ་དཀར་སྤྲུལ་སྐུ་བསོད་བློ་སོགས་སྔ་རྗེས་སུ་ཐུགས་ཁུར་རྒྱབ་སྐྱོར་གནང་མཁན་རྣམ་པར་བཀའ་དྲིན་ཞུ་བཞིན་ཡོད།                              ཅེས་བོད་རབ་བྱུང༡༧པའི་ལྕགས་མོ་ཡོས་ལོའི་ལོ་སར་ལ་གླིང་དྲྭ་འདིའི་གཙོ་བདག་སྨིན་དབུས་པོས་ཕུལ་བཀྲ་ཤིས་པར་གྱུར་ཅི

 

 

སྟག་རོང་དཔོན་པོ་ཁྲོ་ཐུང་གི་མཁར་ཤུལ།

 

སྟག་རོང་དཔོན་པོ་ཁྲོ་ཐུང་གི་མཁར་ཤུལ། 

དེ་ཡང་དུས་རབས་བཅུ་གཅིག་པའི་སྐེད་ཙམ་ན། གླིང་རྗེ་གེ་སར་རྒྱལ་པོས་གདོང་སྨུག་པོ་གླིང་ཚང་གི་མངའ་ཁོངས། འབྲི་རྫའི་རྒྱུད་ནས་རྨ་ཆུའི་རྒྱུད་དུ་རྒྱ་བསྐྱེད་པའི་ལོ་རྒྱུས་དོན་ངོས་ཡིན་པ་དང་། གླིང་ཚང་རང་གི་ས་གནས་སུ་སྔར་ཡོད་ཀྱི་རྫོང་མཁར་གྲགས་ཆེན་ཚོར་དཔེར་བླངས་ཏེ། རྨ་ཡུལ་དུ་སྐུ་མཁར་གཉིས་པ་རེ་བཞེངས་ཚུལ་གྱི་ལོ་རྒྱུས་ཡོད་པ་ནང་བཞིན། གླིང་སྟག་རོང་དཔོན་པོ་ཁྲོ་ཐུང་ཕ་བུས་ཀྱང་། རྨ་ཁོ་མདོ་ལི་མའི་གདོང་ཟུར་དུ་ཕོ་བྲང་གཉིས་པ་ཞིག་བཞེངས་ཏེ། མཁར་མིང་སྔར་ལྟར་གསོལ་བ་ཡིན་ཚུལ་ཡིག་རྙིང་ལས་གསལ་བ་ལྟར། སྟག་རོང་དཔོན་པོ་ཁྲོ་ཐུང་གི་མཁར་ཤུལ་དུ་གྲགས་པ་རེ་གཉིས་ཡོད་མོད། སྟག་རོང་དཔོན་པོ་ཁྲོ་ཐུང་གི་མཁར་ཕོ་རོག་སྙིང་རྫོང་དངོས་དེ་དང་པོ་བཞེངས་ས་དང་། མཁར་གྱི་མིང་ཐོགས་ས། མཁར་བཞེངས་ཡུལ་བཤད་སྐབས་ཀྱི་ས་དབྱིབས་སོགས། མཁར་ཤུལ་དངོས་ཇི་མ་ཇི་བཞིན་དུ་ཡོད་ས་དེ་ནི། སྔར་གྱི་གླིང་ཡུལ་ཡིད་ལྷུང་ཤོག་ཆེན་བཅོ་བརྒྱད་དུ་གྲགས་པའི་ས་ཆ་དང་། ད་ལྟ་སྡེ་དགེ་རྫོང་མ་ཎི་ཀ་མགོའི་ཁྲོ་བ་ཡུལ་ཚོའི་ས་ཡིན་ཟེར་འདུག་ལ། ཁྲོ་བ་ཡུལ་ཚོ་ལ་ལུང་བ་གཉིས་ཡོད་ཅིང་། ལུང་ཁོག་གཅིག་ལ་ཨ་ཁུའི་ཁོག་དང་། ལུང་ཁོག་གཉིས་པར་ཁྲོ་བ་ཁོག་གཉིས་ཀྱི་ས་མིང་། སྔ་རབས་པའི་དུས་ནས་མ་འགྱུར་བར་བྱུང་ཚུལ་དང་། ད་ལྟ་དངོས་ཟིན་གྱི་འདྲ་པར་ལྟར། བྲག་རི་བྱ་ཕོ་རོག་གིས་གཤོག་པ་བརྐྱབས་འདྲའི་དབྱིབས་ཅན་གྱི་མགུལ་ལམ་སྙིང་གའི་ས་མིག་སྟེང་དེ། མཁར་ཕོ་རོག་སྙིང་རྫོང་གི་མཁར་ཤུལ་དངོས་ཡིན་པའི་བཤད་རྒྱུན་དང་། མཁར་ཤུལ་དེའི་ཁོར་ཡུག་ནི། གླིང་གི་རྟོགས་བརྗོད་དག་ལས་ཁྲོ་ཐུང་ཕ་བུ་གླེང་སྐབས། ས་བཙན་རྫ་མ་རྭ་འགག ། ཅེས་པ་དང་། ས་བཙན་སུ་རུའི་གདོང་ཟུར། ཞེས་མངོན་པ་ལྟར། ངོ་མ་ས་བཙན་པོ་དང་འགག་དོག་མོ། སྒྲུང་ལས་བཤད་པ་ཇི་བཞིན་དུ་ཡོད་པར་མ་ཟད། ཁོར་ཡུག་ཏུ་ཁྲོ་ཐུང་གི་ཇག་ལམ་ཆེ་གསུམ་དུ་གྲགས་པའི་གཤོང་ལམ་ཡ་མཚན་ཅན་དང་། དེ་ལས་ཀྱང་ཨ་ཁུའི་ག་ཟི། ཞེས་གངས་རི་དཀར་པོ་གྲོད་པུའི་དབྱིབས་ཅན་དང་། གཙང་དཀར་གཙང་ནག་ཅེས་པའི་གཞི་བདག་དྲག་རྩལ་ཅན་གཉིས། ལྷག་པར་དུ་བུམ་ལྷ་བུམ་ཐོགས་ཟེར་བ་ཁྲོ་ཐུང་ཕ་བུའི་ཡུལ་ལྷ་གཙོ་བོ་ཞིག་ཡིན་པར་བཤད་པའི་གནས་རི། རི་དབྱིབས་ནི་ངོ་མ། བུམ་པ་ཞིག་གི་ཁ་ཐོག་ལ་རིན་ཆེན་ནོར་བུ་བཀོད་པ་ལྟ་བུའི་མཛེས་བརྗིད་ལྡན་པ། འུད་བརྗོད་ཙམ་མ་ཡིན་པར་མཐོང་ན་ཡིད་འཕྲོག་པར་བྱེད་པ་དང་། གཞན་ཁྲོ་ཐུང་ཕ་བུས་ནུབ་སྟག་གཟིག་གི་ཡུལ་ནས་འདོ་བ་ཁྱུང་གཤོག་སྔོན་མོ་རྐུས་རྗེས། རེ་ཞིག་སྐུང་མགོ་མ་ཐོན་པར་ཆེད་དུ་སྟག་རོང་གི་གཞིས་སུ་ཁྱེར་འོང་ནས་སྦས་སྐུང་བྱེད་སར་གྲགས་པའི་གནས་སོགས། སྟག་རོང་དཔོན་པོ་ཁྲོ་ཐུང་དང་འབྲེལ་བའི་རྗེས་ཤུལ་དང་། གཏམ་རྒྱུད་གསོན་པོ་མང་པོ་ད་སྦས་ཚུལ་དུ་བཞུགས་པ་དག་ནི། ཉེ་ལམ་གེ་སར་ལས་གཞི་སྣ་མང་གི་དགོས་མཁོའི་ཆེད། གསར་དུ་དྲན་འོང་བ་དག་གི་རིགས་དང་ཡེ་ནས་མི་འདྲ་བར། སྨུག་པོ་གདོང་གི་མི་རབས་ནས་མི་རབས་བར་ངག་རྒྱུན་ཟམ་མ་ཆད་དུ་བྱུང་བ་ཁོ་ན་ཡིན་འདུག་པས། གླིང་ཤུལ་ཞིབ་འཇུག་ལ་སྤྲོ་སྣང་ཅན་ཚོའི་ཐུགས་ལ་ངེས་འཚལ།

ཞེས་གྲོགས་གསོ་བྱེད་པ་བདེ་པོས་མཁར་ཤུལ་གྱི་འདྲ་པར་སོགས་མཁོ་སྤྲོད་མཛད་སྐབས་གླིང་དགའ་བ་སྨིན་དབུས་དེས་༢༠༡༩ - ༤ - ༢༥ ཉིན་གྱི་བསྙེལ་ཟིན་དུ་བཏབ་པའོ། །

 

 

 

 

ཀློག་གྲངས།:[395]
གླིང་གེ་སར་རིག་གནས་དྲྭ་ཚིགས།
དྲ་ཚིགས་འདིའི་པར་དབང་ཡོད་ཚད་གླིང་གེ་སར་རིག་གནས་དྲྭ་བར་དབང་བས།
འདི་ནས་རྩོམ་ཡིག་དང་བརྙན་རིས་དག་དྲྭ་བདག་ལ་འབྲེལ་གཏུགས་མ་བྱས་པར་མི་བཀོལ་བར་ཞུ།
འབྲེལ་ཡོད་རྩོམ་ཡིག་སྐུར་གནས།   382740503@qq.com