སྐད་འཇོག་ས།

གླིང་གེ་སར་དྲ་བ་འདི་གཉེར་བའི་དམིགས་ཡུལ་ནི། བོད་ཀྱི་མི་སྣ་དཔའ་བོ་གླིང་རྗེ་གེ་སར་ནི་བོད་ཀྱི་ལོ་རྒྱུས་སྟེང་དངོས་སུ་བྱུང་བའི་དོན་གནས་ཀྱི་མི་སྣ་ཞིག་ཡིན་ན་ཡང་། དུས་ཀྱི་གནས་བབ་ཀྱིས་མི་སྣ་འདི་ལ་ངག་ཏུ་བརྒྱུད་པའི་དོན་དངོས་ལོ་རྒྱུས་ཐན་ཐུན་ལ་གཞི་བཅོལ་བའི་ཡིག་ཐོག་གི་ལོ་རྒྱུས་ཐད་ནས་ལྷ་སྒྲུང་ལྟ་བུར་ཆགས་ཏེ་ས་ཁྱབ་རྡོ་ཁྱབ་ཏུ་གྱུར་བ་དང་གཅིགགླིང་གེ་སར་གྱི་མི་རབས་ཕྱི་མ་དག་གིས་རང་རིགས་ཀྱི་མེས་པོའི་དོན་དངོས་ལོ་རྒྱུས་ཀྱི་དཔྱད་གཞི་ལ་ཆེར་མ་དམིགས་པར། དཔའ་བོའི་བསྟོད་སྒྲུང་གི་ཁ་སྙན་ངག་གི་འཇིག་རྟེན་ཞིག་ཏུ་ཁྲིད་དེ་རྩོམ་པ་པོ་རང་རང་གིས་རྟོག་པ་འཆར་ཡན་གྱི་ལམ་ནས་བྲིས་པ་མང་སྟབས། བོད་ཀྱི་དཔའ་བོའི་ལོ་རྒྱུས་ལ་དོན་དངོས་དང་ཉེ་བའི་ལོ་རྒྱུས་དང་། དཔའ་བོའི་བསྟོད་སྒྲུང་གི་སྙན་ངག་གཉིས་ལས་ཕྱི་མ་ཁྱབ་ཆེ་བར་སོང་སྟེ། ད་ཆ་འཛམ་གླིང་གི་རྟོགས་བརྗོད་ཆེན་མོ་འདི་ལ་སྤྱིའི་ཆ་ནས་སྙན་གྲགས་དང་མཛད་འཕྲིན་རྒྱ་ཤིན་ཏུ་ཆེ་ན་ཡང་།ཞིབ་གསལ་གྱི་ཆ་ན་སྒྲུང་མཁན་སོ་སོའི་འབྲི་སྟངས་མི་འདྲ་བ་དང་།སྔ་ཕྱི་མི་མཐུན་པ་སོགས་ལོ་རྒྱུས་པ་སོ་སོའི་འདོད་པ་མི་མཐུན་ས་མང་པོ་ཞིག་གིས་བོད་ཀྱི་གླིང་གེ་སར་རིག་གཞུང་ལོ་རྒྱུས་ལ་ཞིབ་འཇུག་པ་རྣམ་པར་དཀའ་ངལ་ཆེ་བའི་གནས་བབ་ལ་ཁ་གཏད་དེ། གླིང་གེ་སར་རིག་གནས་ཀྱི་ཕྱོགས་ཡོངས་ཀྱི་དཔྱད་གཞིའི་མ་ལགས་འཐུས་སྒོ་ཇེ་ཚང་ལ་གཏོང་ཨེ་ཐུབ་སྙམ་ནས་གཉེར་བ་ཡིན་མོད། འོན་ཀྱང་དྲ་བ་འདི་གཉེར་བ་པོར་བོད་ཁུལ་ཡོངས་ཀྱི་གླིང་གེ་སར་དོན་དངོས་ལོ་རྒྱུས་དང་ཉེ་བའི་དཔྱད་གཞི་ལ་ཐོས་མཐོང་གི་རྒྱ་ཆུང་བས། གླིང་གེ་སར་རིག་གནས་ལ་སྤྲོ་སྣང་ལྡན་པའི་རྒྱ་ཆེའི་གྲོགས་པོ་དག་གིས་དྲ་བ་འདིའི་ས་བཅད་སོ་སོའི་ཁྱབ་ཁོངས་ལ་དཔྱད་གཞི་བསྡུ་རུབ་དང་། གླིང་གེ་སར་དཔྱད་རྩོམ། གླིང་གེ་སར་སྒྱུ་རྩལ་རི་མོ། གླིང་གེ་སར་དོན་དངོས་ལོ་རྒྱུས།གླིང་གེ་སར་དང་འབྲེལ་བའི་བོད་ཡུལ་སྟོད་སྨད་བར་གསུམ་གྱི་ཡུལ་སྲོལ། གླིང་གེ་སར་འཁྲབ་གཞུང་། གླིང་གེ་སར་ལོ་རྒྱུས་སམ་བསྟོད་སྒྲུང་གསར་རྙིང་དང་རྩོམ་པ་པོ་དང་འབྲེལ་ཡོད་མི་སྣ་ངོ་སྤྲོད་སོགས་མཁོ་སྤྲོད་གནང་སྦྱིན་གྱི་བཀའ་དྲིན་སྐྱོང་རྒྱུ། མདོར་ན་བོད་རང་གི་དཔའ་བོའི་ལོ་རྒྱུས་ལ་གཅེས་སྐྱོང་གི་འདུ་ཤེས་ལྡན་པའི་སྒོ་ནས་ཕྱོགས་ཡོངས་ལ་མཛུབ་སྟོན་རྒྱབ་སྐྱོར་གནང་རྒྱུ་བཀའ་དྲིན་ཆེ་ཞུ་བ་དང་། ནོར་འཁྲུལ་དང་རིག་གནས་ཀྱིས་མ་འཇོན་ས་ཡོད་ན་རྒྱ་ཆེའི་ཀློག་པ་པོ་རྣམ་པར་གུས་བཤགས་བྱེད་ངེས་ཡིན། དེ་དང་ལྷན་བོད་ཀྱི་མེས་པོ་གླིང་རྗེ་སར་སྐྱེས་བུའི་རྣམ་ཐར་ལོ་རྒྱུས་རིང་མོའི་མཛད་འཕྲིན་འཛམ་གླིང་རིག་གནས་བང་མཛོད་ཀྱི་སྙིང་བཅུད་འདོད་འབྱུང་གི་ཡིད་བཞིན་ནོར་བུ་ལྟ་བུར་འགྱུར་ཐུབ་པའི་སྨོན་འདུན་ཡང་ཡང་ཞུ་བ་ལགས་སོ། ། ཞོར་དུ་དྲ་བ་འདིའི་གཞི་གྲངས་མཛོད་དང་ལོ་རེའི་དྲྭ་གནས་དོ་དམ་གྱི་ཁྲལ་སོགས་ཀྱི་ཐད་ནས་རོགས་སྐྱོར་གནང་མཁན་སྤྲུལ་ཀློང་ཡངས་དང་མི་ཉག་པ་འཇམ་དབྱངས་འོད་ཟེར། ཇོ་ཁྲི་འཇམ་དབྱངས་བསྟན་པའི་རྒྱལ་མཚན།དྲེལ་དཀར་སྤྲུལ་སྐུ་བསོད་བློ་སོགས་སྔ་རྗེས་སུ་ཐུགས་ཁུར་རྒྱབ་སྐྱོར་གནང་མཁན་རྣམ་པར་བཀའ་དྲིན་ཞུ་བཞིན་ཡོད།                              ཅེས་བོད་རབ་བྱུང༡༧པའི་ལྕགས་མོ་ཡོས་ལོའི་ལོ་སར་ལ་གླིང་དྲྭ་འདིའི་གཙོ་བདག་སྨིན་དབུས་པོས་ཕུལ་བཀྲ་ཤིས་པར་གྱུར་ཅི

 

 

ཨ་སྟག་ལྷ་མོ།

ཨ་སྟག་ལྷ་མོ།

བྱང་ཡུལ་བདུད་ཀྱི་ཕ་མཁར་མཐོན་པོ་ན་རོདགུ་ཅོག་ཉེ་འགྲམ་དུ།།

ཉི་འོད་འཇག་མའི་དྲོད་གཤེར་ལས་འཁྲུངས་མོ་མཛེས་གཟུགས་ལ་དཔའ་བོའི་སྟོབས།།

ལྕགས་མདའ་ལྕགས་གཞུ་ཤེད་ཀྱིས་འཕངས་ཚེ་རུ་དམར་འབྲོང་ཁྱུ་ཁྲག་ལ་བསྲེས།།

བདུད་རྗེ་ཀླུ་བཙན་དཔའ་ཡ་དཔུང་རོགས་ཡར་ཁམས་བྱང་ལ་འབྲུག་ལྟར་གྲགས།།

དཀར་དམར་བཞིན་རས་པདྨའི་གདོང་ལ་གཏུམ་རྔམ་འཁྲོས་པའི་གཉེར་མ་མདུད།།

དྲུག་དཀར་གཡུ་ཡི་སྐྲ་རྒྱན་སྟེང་དུ་ལྕགས་རྨོག་དར་ཕྲུ་མུན་པ་འཐིབས།།

ཚིགས་གསུམ་སྨྱུག་མའི་སྐུ་ལུས་ལྡེམ་ཡག་འགྱིང་ཆེན་འབྲོང་མོའི་གོམ་སྟབས་སྤོ།།

དཀར་ཟླུམ་བྲང་གི་ནུ་འབུར་ཆ་གཅིག་ལྕགས་ཁྲབ་མེ་ལུང་གོ་ཆས་གཡོགས།།

གཉེན་ལྕུག་ལག་ཟུང་གསེར་གདུབ་དང་བཅས་མདའ་གྲི་མདུང་གི་རྩལ་ལ་མཁས།།

ཕྲ་ལྡེམ་སྐེད་པའི་དུང་ཆབ་སྟེང་ལ་འཁོར་གསུམ་དུག་གི་ཚེར་མ་རྔམ།།

མི་མགོའི་སྒ་ཆས་མི་ལྤགས་རྟ་ཟབ་ཞེ་སྡང་སྦྲུལ་གྱི་གོང་སྨེ་སྤྲས།།

རག་པ་སྟག་ལག་རྒྱུགས་མ་འདུར་ལ་ཐང་དཀར་རྒོད་ཀྱི་བང་རྩལ་རྫོགས། །

ཤི་བསད་སྡིག་པའི་འཁོར་ལོ་སྐོར་མཁན་རི་ཤིའི་བུ་མོ་གདོང་དམར་ཞེས།།

གསོན་པོའི་མི་གཅིག་བདུད་ཡུལ་མི་མངག་མུན་པ་ཆུ་འཁྲིགས་སྒོ་སྲུང་། །

སེང་ཆེན་དཔའ་བོའི་གྲོགས་སུ་ཕེབས་ནས་བདུད་ཡུལ་སྐྱོད་པའི་མཐུན་རྐྱེན་གནང་།།

བྱང་བདུད་ཀླད་ཁྲག་མདའ་ཡི་གཏོར་རྗེས་བདུད་སྡེ་བཅོ་བརྒྱད་དཔོན་ཐོབ་བཞེས།

ཧོར་འདུལ་དཔའ་བོའི་རྒྱལ་རྔ་རྡུང་དུས་འབྲོང་ནག་ཤུགས་ཆེན་མདའ་ལ་དྲངས་།།

འཇང་ཡུལ་ཚྭ་མཚོའི་རྩོད་གླེང་གཡུལ་ལ་དུག་མིའི་གཅེས་སྲོག་རྦད་ཀྱིས་བཅད།།

ལྷོ་རོང་འབྲས་དཀར་བང་མཛོད་འཕྲོགས་དུས་ཀླུ་བདུད་མགོ་ལུས་གས་གཉིས་བྱས།།

ཁ་ཆེའི་ལས་དམ་གླིང་ལ་ཕབ་དུས་གཡུ་རྒོད་ཚངས་པའི་སྙིང་ཁྲག་འཐུང་།།

ཨ་དྲག་རྫ་ལམ་དཔུང་གིས་གཏོར་དུས་སྒོང་ངའི་བུ་རྟ་མཚར་བསོད་བྱས།།

བྱེ་རིའི་བྱུར་དམར་རྒྱན་ལ་ལེན་དུས་འབྲོང་སྲས་འོད་དཀར་མདའ་ཡིས་བསད།།

གྲུ་གུའི་གོ་མཚོན་གཏེར་ཁ་འཕྲོག་ཉིན་བླ་གནས་དོམ་ནག་མིང་མེད་བྱས།།

མི་ནུབ་དུག་མཚོ་ཁ་རུ་ལུད་དུས་སྐྱེ་ཡག་དུང་སེང་མིད་ཅེས་གྲགས།།

མོ་མཛེས་བཞིན་ལ་ལྷ་མི་འཁོར་བ་ཐང་ལྷའི་བརྫུསབུ་མི་ཡུལ་བལྟམས།།

བཅོ་བརྒྱད་རྫོང་གི་གཏེར་གཡང་ཕབ་དུས་སྐྱེས་མཆོག་དགྱེས་ཕྱིར་དཔུང་སྣ་ཁྲིད།།

ལས་འབྲས་གསལ་བའི་མེ་ལོང་སྟོན་ཕྱིར་ངན་སོང་གསུམ་གྱི་སྡུག་བསྔལ་བཞེས།།

ཚེ་འདས་བྱེ་བའི་ལམ་སྣ་དྲངས་ནས་བདུད་འདུལ་དྲག་མོའི་ཐུགས་ཀ་འཕོས།།

ཨ་མཚར་གཏམ་གྱི་ཚིག་གི་སྐུད་པ་དལ་གྱིས་འཁེལ་བའི་དཔྱིད་ཉི་ལ།།

ཨ་སྟག་རང་བཞིན་གཡུ་ཆུང་དྲུག་དཀར་གཅིག་ཏུ་བརྒྱུས་པའི་ཕྲེང་བ་ཞིག།།

དེ་རིང་ཉེར་ལྔའི་ཚོགས་མཆོད་དོད་དུ་མཁའ་འགྲོ་དགྱེས་པའི་སྒྲུང་གླུ་ཙམ།།

ཨ་མདོ་ཙོང་ཆུའི་གྲུ་ཁ་ཉུལ་བའི་བྱང་འཁྱམས་སྨྱོན་པས་གང་འདོད་བྲིས།།

                                                                      བྱང་འཁྱམས་པོས།

 

 

 

ཀློག་གྲངས།:[1322]
གླིང་གེ་སར་རིག་གནས་དྲྭ་ཚིགས།
དྲ་ཚིགས་འདིའི་པར་དབང་ཡོད་ཚད་གླིང་གེ་སར་རིག་གནས་དྲྭ་བར་དབང་བས།
འདི་ནས་རྩོམ་ཡིག་དང་བརྙན་རིས་དག་དྲྭ་བདག་ལ་འབྲེལ་གཏུགས་མ་བྱས་པར་མི་བཀོལ་བར་ཞུ།
འབྲེལ་ཡོད་རྩོམ་ཡིག་སྐུར་གནས།   382740503@qq.com