སྐད་འཇོག་ས།

གླིང་གེ་སར་དྲ་བ་འདི་གཉེར་བའི་དམིགས་ཡུལ་ནི། བོད་ཀྱི་མི་སྣ་དཔའ་བོ་གླིང་རྗེ་གེ་སར་ནི་བོད་ཀྱི་ལོ་རྒྱུས་སྟེང་དངོས་སུ་བྱུང་བའི་དོན་གནས་ཀྱི་མི་སྣ་ཞིག་ཡིན་ན་ཡང་། དུས་ཀྱི་གནས་བབ་ཀྱིས་མི་སྣ་འདི་ལ་ངག་ཏུ་བརྒྱུད་པའི་དོན་དངོས་ལོ་རྒྱུས་ཐན་ཐུན་ལ་གཞི་བཅོལ་བའི་ཡིག་ཐོག་གི་ལོ་རྒྱུས་ཐད་ནས་ལྷ་སྒྲུང་ལྟ་བུར་ཆགས་ཏེ་ས་ཁྱབ་རྡོ་ཁྱབ་ཏུ་གྱུར་བ་དང་གཅིགགླིང་གེ་སར་གྱི་མི་རབས་ཕྱི་མ་དག་གིས་རང་རིགས་ཀྱི་མེས་པོའི་དོན་དངོས་ལོ་རྒྱུས་ཀྱི་དཔྱད་གཞི་ལ་ཆེར་མ་དམིགས་པར། དཔའ་བོའི་བསྟོད་སྒྲུང་གི་ཁ་སྙན་ངག་གི་འཇིག་རྟེན་ཞིག་ཏུ་ཁྲིད་དེ་རྩོམ་པ་པོ་རང་རང་གིས་རྟོག་པ་འཆར་ཡན་གྱི་ལམ་ནས་བྲིས་པ་མང་སྟབས། བོད་ཀྱི་དཔའ་བོའི་ལོ་རྒྱུས་ལ་དོན་དངོས་དང་ཉེ་བའི་ལོ་རྒྱུས་དང་། དཔའ་བོའི་བསྟོད་སྒྲུང་གི་སྙན་ངག་གཉིས་ལས་ཕྱི་མ་ཁྱབ་ཆེ་བར་སོང་སྟེ། ད་ཆ་འཛམ་གླིང་གི་རྟོགས་བརྗོད་ཆེན་མོ་འདི་ལ་སྤྱིའི་ཆ་ནས་སྙན་གྲགས་དང་མཛད་འཕྲིན་རྒྱ་ཤིན་ཏུ་ཆེ་ན་ཡང་།ཞིབ་གསལ་གྱི་ཆ་ན་སྒྲུང་མཁན་སོ་སོའི་འབྲི་སྟངས་མི་འདྲ་བ་དང་།སྔ་ཕྱི་མི་མཐུན་པ་སོགས་ལོ་རྒྱུས་པ་སོ་སོའི་འདོད་པ་མི་མཐུན་ས་མང་པོ་ཞིག་གིས་བོད་ཀྱི་གླིང་གེ་སར་རིག་གཞུང་ལོ་རྒྱུས་ལ་ཞིབ་འཇུག་པ་རྣམ་པར་དཀའ་ངལ་ཆེ་བའི་གནས་བབ་ལ་ཁ་གཏད་དེ། གླིང་གེ་སར་རིག་གནས་ཀྱི་ཕྱོགས་ཡོངས་ཀྱི་དཔྱད་གཞིའི་མ་ལགས་འཐུས་སྒོ་ཇེ་ཚང་ལ་གཏོང་ཨེ་ཐུབ་སྙམ་ནས་གཉེར་བ་ཡིན་མོད། འོན་ཀྱང་དྲ་བ་འདི་གཉེར་བ་པོར་བོད་ཁུལ་ཡོངས་ཀྱི་གླིང་གེ་སར་དོན་དངོས་ལོ་རྒྱུས་དང་ཉེ་བའི་དཔྱད་གཞི་ལ་ཐོས་མཐོང་གི་རྒྱ་ཆུང་བས། གླིང་གེ་སར་རིག་གནས་ལ་སྤྲོ་སྣང་ལྡན་པའི་རྒྱ་ཆེའི་གྲོགས་པོ་དག་གིས་དྲ་བ་འདིའི་ས་བཅད་སོ་སོའི་ཁྱབ་ཁོངས་ལ་དཔྱད་གཞི་བསྡུ་རུབ་དང་། གླིང་གེ་སར་དཔྱད་རྩོམ། གླིང་གེ་སར་སྒྱུ་རྩལ་རི་མོ། གླིང་གེ་སར་དོན་དངོས་ལོ་རྒྱུས།གླིང་གེ་སར་དང་འབྲེལ་བའི་བོད་ཡུལ་སྟོད་སྨད་བར་གསུམ་གྱི་ཡུལ་སྲོལ། གླིང་གེ་སར་འཁྲབ་གཞུང་། གླིང་གེ་སར་ལོ་རྒྱུས་སམ་བསྟོད་སྒྲུང་གསར་རྙིང་དང་རྩོམ་པ་པོ་དང་འབྲེལ་ཡོད་མི་སྣ་ངོ་སྤྲོད་སོགས་མཁོ་སྤྲོད་གནང་སྦྱིན་གྱི་བཀའ་དྲིན་སྐྱོང་རྒྱུ། མདོར་ན་བོད་རང་གི་དཔའ་བོའི་ལོ་རྒྱུས་ལ་གཅེས་སྐྱོང་གི་འདུ་ཤེས་ལྡན་པའི་སྒོ་ནས་ཕྱོགས་ཡོངས་ལ་མཛུབ་སྟོན་རྒྱབ་སྐྱོར་གནང་རྒྱུ་བཀའ་དྲིན་ཆེ་ཞུ་བ་དང་། ནོར་འཁྲུལ་དང་རིག་གནས་ཀྱིས་མ་འཇོན་ས་ཡོད་ན་རྒྱ་ཆེའི་ཀློག་པ་པོ་རྣམ་པར་གུས་བཤགས་བྱེད་ངེས་ཡིན། དེ་དང་ལྷན་བོད་ཀྱི་མེས་པོ་གླིང་རྗེ་སར་སྐྱེས་བུའི་རྣམ་ཐར་ལོ་རྒྱུས་རིང་མོའི་མཛད་འཕྲིན་འཛམ་གླིང་རིག་གནས་བང་མཛོད་ཀྱི་སྙིང་བཅུད་འདོད་འབྱུང་གི་ཡིད་བཞིན་ནོར་བུ་ལྟ་བུར་འགྱུར་ཐུབ་པའི་སྨོན་འདུན་ཡང་ཡང་ཞུ་བ་ལགས་སོ། ། ཞོར་དུ་དྲ་བ་འདིའི་གཞི་གྲངས་མཛོད་དང་ལོ་རེའི་དྲྭ་གནས་དོ་དམ་གྱི་ཁྲལ་སོགས་ཀྱི་ཐད་ནས་རོགས་སྐྱོར་གནང་མཁན་སྤྲུལ་ཀློང་ཡངས་དང་མི་ཉག་པ་འཇམ་དབྱངས་འོད་ཟེར། ཇོ་ཁྲི་འཇམ་དབྱངས་བསྟན་པའི་རྒྱལ་མཚན།དྲེལ་དཀར་སྤྲུལ་སྐུ་བསོད་བློ་སོགས་སྔ་རྗེས་སུ་ཐུགས་ཁུར་རྒྱབ་སྐྱོར་གནང་མཁན་རྣམ་པར་བཀའ་དྲིན་ཞུ་བཞིན་ཡོད།                              ཅེས་བོད་རབ་བྱུང༡༧པའི་ལྕགས་མོ་ཡོས་ལོའི་ལོ་སར་ལ་གླིང་དྲྭ་འདིའི་གཙོ་བདག་སྨིན་དབུས་པོས་ཕུལ་བཀྲ་ཤིས་པར་གྱུར་ཅི

 

 

གླིང་རྗེ་སེང་ཆེན་སྐྱེས་བུའི་ངོ་སྤྲོད།

 

༈ གླིང་རྗེ་སེང་ཆེན་སྐྱེས་བུའི་ངོ་སྤྲོད།

ཞེ་ཆེན་རབ་འབྱམས་དྲུག་པའི་གསུང་། རབ་བྱུང་བཅོ་ལྔ་པའི་ལྕགས་ཕག་༡༩༡༡ལོར་མགོ་ལོག་ཨ་སྐྱོང་སྦྲ་གསར་དཔོན་ཚང་སར་སྐུ་འཁྲུངས་པའི་མདོ་ཁམས་ཞེ་ཆེན་བསྟན་གཉིས་དར་རྒྱས་གླིང་གི་བསྟན་པའི་བདག་པོ་ཞེ་ཆེན་རབ་འབྱམས་སྐུ་རབས་དྲུག་པ་ཀུན་བཟང་བསྟན་པའི་ཉི་མའམ་སྣང་མཛད་གྲུབ་པའི་རྡོ་རྗེས་མཛད་པའི་གེ་སར་རྡོ་རྗེ་ཚེ་རྒྱལ་གྱི་སྲོག་གཏད་ཆུ་འབབ་ཏུ་བཀོད་པ་བཀླག་པས་གྲུབ་པ་ལས། དེ་ལ་འདིར་དུས་གསུམ་རྒྱལ་བ་སྲས་དང་བཅས་པའི་ཕྲིན་ལས་གཅིག་ཏུ་བསྡུས་པའི་རང་གཟུགས་རྒྱལ་དབང་མཚོ་སྐྱེས་རྡོ་རྗེ་ཉིད་ཀྱི་གསང་གསུམ་མཚན་དང་སྐུའི་བཀོད་པ་བསམ་གྱིས་མི་ཁྱབ་པས་མཁའ་ཁྱབ་ཀྱི་འགྲོ་བ་རྣམས་རིམ་དང་ཅིག་ཆར་དུ་སྨིན་གྲོལ་ལ་བཀོད། ཁྱད་པར་མ་འོངས་སྙིགས་དུས་ཀྱི་འགྲོ་ལ་ཐུགས་རྗེའི་ཁྱད་པར་ལྔ་དང་ལྡན་པའི་སྒྱུ་འཕྲུལ་རྡོ་རྗེའི་རོལ་གར་མཐའ་ཀླས་པས་གངས་ལྗོངས་འགྲོ་བ་སྐྱོབ་ཅིང་ལྷག་པར་སྙིགས་དུས་ལོག་སྤྱོད་ཆེས་ཆེར་བདོ་ཞིང་། མ་རུངས་བདུད་དང་དམ་སྲིའི་རིགས་ཀུན་དངོས་སུ་གཟུགས་ཅན་མི་དང་རྒྱབ་བརྟེན་ལྷ་སྲུང་གཟུགས་མེད་འབྱུང་པོའི་རྣམ་པར་བརྫུས་ཏེ་བསྟན་འགྲོའི་བདེ་སྐྱིད་འཕྲོག་པ་དག་ལྷན་ཅིག་སྨོན་ལོག་གི་མཐུས་འཛོམས་པ་དེ་དག་འདུལ་བའི་གཉེན་པོར་གུ་རུ་ཉིད་དང་། དུས་གསུམ་རྒྱལ་བའི་མཁྱེན་བརྩེ་ནུས་པའི་བདག་ཉིད་རིགས་གསུམ་ཞི་ཁྲོའི་རྣམ་རོལ་དགྲ་བླའི་རྒྱལ་པོ་གེ་སར་རྡོ་རྗེ་ཚེ་རྒྱལ་ལམ་སེང་ཆེན་ནོར་བུ་དགྲ་འདུལ་ཞེས་སྲིད་ཞིའི་ཁོངས་ན་མཚན་གྱི་དབྱངས་སྙན་ཡོངས་སུ་གྲགས་ཤིང་འཕྲིན་ལས་བཞིས་བསྟན་འགྲོའི་དགེ་མཚན་སྤེལ་བའི་རྣམ་ཐར་བསམ་མི་ཁྱབ་པའི་དབང་ཕྱུག་ཆེན་པོ་དང་ལྡན་པས་གངས་ཅན་བོད་ཀྱི་སྐྱེ་དགུ་རྣམས་དངོས་བརྒྱུད་གང་ནས་ཀྱང་ཚར་གཅོད་རྗེས་འཛིན་གྱི་འཕྲིན་ལས་ལ་དབང་འབྱོར་པས་གནས་སྐབས་ཀྱི་སྲུང་མ་ཙམ་དུ་མ་ཟད། མཐའ་ཐུག་རྣམ་གྲོལ་བྱང་ཆུབ་ཆེན་པོར་བཀྲ་ཤིས་པའི་ཕན་བདེའི་རྩ་ལག་དམ་པར་གྱུར་ཕྱིར་ཚུར་མཐོང་སྐྱེ་བོའི་བློས་སྲུང་མ་རང་རྒྱུད་པར་འཛིན་མི་རུང་བ་ཙམ་དུ་མ་ཟད། རྗེ་འཇམ་པའི་དབྱངས་ཨ་ཛི་ཏས། ངོ་བོ་དཔལ་ལྡན་འཇམ་པའི་རྡོ་རྗེ་དང་། །རྣམ་པ་སྣང་སྲིད་དགྲ་བླའི་རྒྱལ་པོའི་ཚུལ། །སྔོན་ཚེ་རིག་འཛིན་པདྨ་འབྱུང་གནས་ཏེ། །ད་ལྟ་སེང་ཆེན་ནོར་བུ་དགྲ་འདུལ་རྩལ། །མ་འོངས་རིགས་ལྡན་དྲག་པོ་འཁོར་ལོ་ཅན། །བདག་དང་དབྱེར་མེད་སྙིང་གི་ལྷ་མཆོག་ཆེ། །ཞེས་གསུངས་པ་ལྟར། གང་ལ་གང་འདུལ་གྱི་གདུལ་བྱའི་རེ་བ་སྐོང་བ་ལ་སྲུང་མ་གཞན་ལས་ཀྱང་ཁྱད་པར་འཕགས་པས་བྱང་ཆུབ་བསྒྲུབ་པའི་འགལ་རྐྱེན་སེལ་ཞིང་། མཐུན་རྐྱེན་མངོན་མཐོའི་ཡོན་ཏན་བདུན་དང་འཕྲིན་ལས་བཞི་སོགས་ལས་རབ་འབྱམས་ཐོགས་མེད་སྩོལ་བའི་ཆོས་སྐྱོང་བའི་དགྲ་བླའི་རྣམ་པར་རོལ་པ་དང་། མ་འོངས་པ་ན་བསྟན་ཞབས་ཀླ་ཀློས་སྡུད་པའི་ཚེ་རིགས་ལྡན་དྲག་པོའི་སྐུར་བཞེངས་ནས་མཐོང་ཐོས་དྲན་རེག་གི་འགྲོ་རྣམས་དཔལ་ལྡན་དང་པོའི་ངོ་བོར་མཐར་འབྲས་མངོན་པར་བྱང་ཆུབ་པའི་ས་ལ་གཞོལ་བར་མཛད་པའི་ཕྱིར། ངེས་པའི་དོན་དུ་གསང་གསུམ་ཡོན་ཏན་འཕྲིན་ལས་རྒྱལ་བ་རྣམས་དང་དབྱེར་མེད་པ་སྟེ། མདོར་ན་རྒྱལ་འགོང་དམ་སྲི་འདུལ་བའི་གཤེད་མ། རྣལ་འབྱོར་སྒྲུབ་པ་པོ་ཡི་དགྲ་བླ། ཆོས་སྐྱོང་ནོར་ལྷ་རྒྱ་མཚོའི་གཙོ་བོ། གནས་ཡུལ་དཔའ་བོ་མཁའ་འགྲོའི་ཚོགས་རྗེ། ལས་བཞིའི་དངོས་གྲུབ་སྟེར་བའི་ཡི་དམ། བརྒྱུད་གསུམ་རིག་འཛིན་བླ་མའི་ཞལ་སྐྱིན་དུ་བཞུགས་པས་ན། ལས་དང་སྐལ་བ་ལྡན་ཞིང་དམ་ཚིག་ལ་ཟོལ་ཟོག་མེད་པའི་སྒྲུབ་པ་པོས་རྩ་གསུམ་ཆོས་སྐྱོང་ནོར་ལྷའི་ངོ་བོར་སྒྲུབ་པའི་ཚུལ་ཇི་སྙེད་ཅིག་ཟབ་གཏེར་རྣམས་སུ་བྱུང་བ་ལས། ཞེས་གསུངས་སོ། །འདི་ཡང་རབ་བརྟན་དགེ་ལེགས་ཕུན་ཚོགས་པས་གེ་སར་དབང་ཡིག་དངོས་ལས་ཞལ་བཤུས་བགྱིས་པའོ། །

 

 

 

ཀློག་གྲངས།:[1536]
གླིང་གེ་སར་རིག་གནས་དྲྭ་ཚིགས།
དྲ་ཚིགས་འདིའི་པར་དབང་ཡོད་ཚད་གླིང་གེ་སར་རིག་གནས་དྲྭ་བར་དབང་བས།
འདི་ནས་རྩོམ་ཡིག་དང་བརྙན་རིས་དག་དྲྭ་བདག་ལ་འབྲེལ་གཏུགས་མ་བྱས་པར་མི་བཀོལ་བར་ཞུ།
འབྲེལ་ཡོད་རྩོམ་ཡིག་སྐུར་གནས།   382740503@qq.com