སྐད་འཇོག་ས།

གླིང་གེ་སར་དྲ་བ་འདི་གཉེར་བའི་དམིགས་ཡུལ་ནི། བོད་ཀྱི་མི་སྣ་དཔའ་བོ་གླིང་རྗེ་གེ་སར་ནི་བོད་ཀྱི་ལོ་རྒྱུས་སྟེང་དངོས་སུ་བྱུང་བའི་དོན་གནས་ཀྱི་མི་སྣ་ཞིག་ཡིན་ན་ཡང་། དུས་ཀྱི་གནས་བབ་ཀྱིས་མི་སྣ་འདི་ལ་ངག་ཏུ་བརྒྱུད་པའི་དོན་དངོས་ལོ་རྒྱུས་ཐན་ཐུན་ལ་གཞི་བཅོལ་བའི་ཡིག་ཐོག་གི་ལོ་རྒྱུས་ཐད་ནས་ལྷ་སྒྲུང་ལྟ་བུར་ཆགས་ཏེ་ས་ཁྱབ་རྡོ་ཁྱབ་ཏུ་གྱུར་བ་དང་གཅིགགླིང་གེ་སར་གྱི་མི་རབས་ཕྱི་མ་དག་གིས་རང་རིགས་ཀྱི་མེས་པོའི་དོན་དངོས་ལོ་རྒྱུས་ཀྱི་དཔྱད་གཞི་ལ་ཆེར་མ་དམིགས་པར། དཔའ་བོའི་བསྟོད་སྒྲུང་གི་ཁ་སྙན་ངག་གི་འཇིག་རྟེན་ཞིག་ཏུ་ཁྲིད་དེ་རྩོམ་པ་པོ་རང་རང་གིས་རྟོག་པ་འཆར་ཡན་གྱི་ལམ་ནས་བྲིས་པ་མང་སྟབས། བོད་ཀྱི་དཔའ་བོའི་ལོ་རྒྱུས་ལ་དོན་དངོས་དང་ཉེ་བའི་ལོ་རྒྱུས་དང་། དཔའ་བོའི་བསྟོད་སྒྲུང་གི་སྙན་ངག་གཉིས་ལས་ཕྱི་མ་ཁྱབ་ཆེ་བར་སོང་སྟེ། ད་ཆ་འཛམ་གླིང་གི་རྟོགས་བརྗོད་ཆེན་མོ་འདི་ལ་སྤྱིའི་ཆ་ནས་སྙན་གྲགས་དང་མཛད་འཕྲིན་རྒྱ་ཤིན་ཏུ་ཆེ་ན་ཡང་།ཞིབ་གསལ་གྱི་ཆ་ན་སྒྲུང་མཁན་སོ་སོའི་འབྲི་སྟངས་མི་འདྲ་བ་དང་།སྔ་ཕྱི་མི་མཐུན་པ་སོགས་ལོ་རྒྱུས་པ་སོ་སོའི་འདོད་པ་མི་མཐུན་ས་མང་པོ་ཞིག་གིས་བོད་ཀྱི་གླིང་གེ་སར་རིག་གཞུང་ལོ་རྒྱུས་ལ་ཞིབ་འཇུག་པ་རྣམ་པར་དཀའ་ངལ་ཆེ་བའི་གནས་བབ་ལ་ཁ་གཏད་དེ། གླིང་གེ་སར་རིག་གནས་ཀྱི་ཕྱོགས་ཡོངས་ཀྱི་དཔྱད་གཞིའི་མ་ལགས་འཐུས་སྒོ་ཇེ་ཚང་ལ་གཏོང་ཨེ་ཐུབ་སྙམ་ནས་གཉེར་བ་ཡིན་མོད། འོན་ཀྱང་དྲ་བ་འདི་གཉེར་བ་པོར་བོད་ཁུལ་ཡོངས་ཀྱི་གླིང་གེ་སར་དོན་དངོས་ལོ་རྒྱུས་དང་ཉེ་བའི་དཔྱད་གཞི་ལ་ཐོས་མཐོང་གི་རྒྱ་ཆུང་བས། གླིང་གེ་སར་རིག་གནས་ལ་སྤྲོ་སྣང་ལྡན་པའི་རྒྱ་ཆེའི་གྲོགས་པོ་དག་གིས་དྲ་བ་འདིའི་ས་བཅད་སོ་སོའི་ཁྱབ་ཁོངས་ལ་དཔྱད་གཞི་བསྡུ་རུབ་དང་། གླིང་གེ་སར་དཔྱད་རྩོམ། གླིང་གེ་སར་སྒྱུ་རྩལ་རི་མོ། གླིང་གེ་སར་དོན་དངོས་ལོ་རྒྱུས།གླིང་གེ་སར་དང་འབྲེལ་བའི་བོད་ཡུལ་སྟོད་སྨད་བར་གསུམ་གྱི་ཡུལ་སྲོལ། གླིང་གེ་སར་འཁྲབ་གཞུང་། གླིང་གེ་སར་ལོ་རྒྱུས་སམ་བསྟོད་སྒྲུང་གསར་རྙིང་དང་རྩོམ་པ་པོ་དང་འབྲེལ་ཡོད་མི་སྣ་ངོ་སྤྲོད་སོགས་མཁོ་སྤྲོད་གནང་སྦྱིན་གྱི་བཀའ་དྲིན་སྐྱོང་རྒྱུ། མདོར་ན་བོད་རང་གི་དཔའ་བོའི་ལོ་རྒྱུས་ལ་གཅེས་སྐྱོང་གི་འདུ་ཤེས་ལྡན་པའི་སྒོ་ནས་ཕྱོགས་ཡོངས་ལ་མཛུབ་སྟོན་རྒྱབ་སྐྱོར་གནང་རྒྱུ་བཀའ་དྲིན་ཆེ་ཞུ་བ་དང་། ནོར་འཁྲུལ་དང་རིག་གནས་ཀྱིས་མ་འཇོན་ས་ཡོད་ན་རྒྱ་ཆེའི་ཀློག་པ་པོ་རྣམ་པར་གུས་བཤགས་བྱེད་ངེས་ཡིན། དེ་དང་ལྷན་བོད་ཀྱི་མེས་པོ་གླིང་རྗེ་སར་སྐྱེས་བུའི་རྣམ་ཐར་ལོ་རྒྱུས་རིང་མོའི་མཛད་འཕྲིན་འཛམ་གླིང་རིག་གནས་བང་མཛོད་ཀྱི་སྙིང་བཅུད་འདོད་འབྱུང་གི་ཡིད་བཞིན་ནོར་བུ་ལྟ་བུར་འགྱུར་ཐུབ་པའི་སྨོན་འདུན་ཡང་ཡང་ཞུ་བ་ལགས་སོ། ། ཞོར་དུ་དྲ་བ་འདིའི་གཞི་གྲངས་མཛོད་དང་ལོ་རེའི་དྲྭ་གནས་དོ་དམ་གྱི་ཁྲལ་སོགས་ཀྱི་ཐད་ནས་རོགས་སྐྱོར་གནང་མཁན་སྤྲུལ་ཀློང་ཡངས་དང་མི་ཉག་པ་འཇམ་དབྱངས་འོད་ཟེར། ཇོ་ཁྲི་འཇམ་དབྱངས་བསྟན་པའི་རྒྱལ་མཚན།དྲེལ་དཀར་སྤྲུལ་སྐུ་བསོད་བློ་སོགས་སྔ་རྗེས་སུ་ཐུགས་ཁུར་རྒྱབ་སྐྱོར་གནང་མཁན་རྣམ་པར་བཀའ་དྲིན་ཞུ་བཞིན་ཡོད།                              ཅེས་བོད་རབ་བྱུང༡༧པའི་ལྕགས་མོ་ཡོས་ལོའི་ལོ་སར་ལ་གླིང་དྲྭ་འདིའི་གཙོ་བདག་སྨིན་དབུས་པོས་ཕུལ་བཀྲ་ཤིས་པར་གྱུར་ཅི

 

 

རྨ་རྒྱལ་གནས་མདུན་དུ་གླིང་གེ་སར་གྱི་དཔལ་མཁར་གསར་སྐྲུན་མཛད་པ།

བོད་རབ་བྱུང་བཅུ་བདུན་ཤིང་རྟ་ལོའི་གླང་ཟླའི་ཚེས་བཅོ་ལྔ་སྟེ།འཛམ་གླིང་སྤྱི་བསང་གི་ཉིན་མོའི་དགོང་ཆེན་དབང་གི་དུས་ཚེས་དགེ་བར། གླིང་བཀའ་བློན་འདན་མ་གཡུལ་རྒྱལ་ཐོག་རྒོད་ཀྱི་སྒྱུ་འཕྲུལ་བོད་ཡུལ་གྲུབ་པའི་དབང་ཕྱུག་དཔལ་འཇའ་ལུས་པ་ཆེན་པོ་མཁན་ཆེན་ཚེ་དབང་རིག་འཛིན་མཆོག་གི་ཡང་སྤྲུལ་མ་ཎི་བླ་མ་བསྟན་འཛིན་སྙན་གྲགས་རིན་པོ་ཆེ་མཆོག་གིས།སྔོན་བྱོན་གྲུབ་པའི་སྐྱེས་ཆེན་གླིང་གེ་སར་གྱི་སྒྱུ་འཕྲུལ་དམ་པ་མདོ་མཁྱེན་བརྩེ་ཡེ་ཤེས་རྡོ་རྗེས་འབྱུང་འགྱུར་ལུང་དོན་ལས་གསལ་བོར་བསྟན་ཡོད་ཚུལ།མདོ་རིན་པོ་ཆེའི་ཁམས་གསུམ་ཟིལ་གནོན་དགྱེས་པ་རྡོ་རྗེའི་རྨ་རྒྱལ་གནས་བཤད་དུ་གསལ་བ། ཤར་ལྷོ་གཡུ་བཟང་གཡུ་ཡི་མཎྜལ་ལ།།གསེར་གྱི་རི་བོ་མཛེས་ཤིང་བསྐོར་བ་འདྲ། །རྨ་སྨད་བཀྲ་ཤིས་ལྷ་ལུང་གཡུ་ཐང་ཞེས། །གྲུབ་དབང་མཁྱེན་བརྩེས་ལུང་ཟིན་གནས་མཆོག་འདིར།།འཛམ་གླིང་སེང་ཆེན་མ་ཧཱ་རཱ་ཛ་ཡིས། །དཔའ་རྟུལ་རྣམས་དང་མི་དང་མི་མིན་སོགས།།འཁོར་ཚོགས་བྱེ་བར་ཆོས་འཁོར་བསྐོར་བའི་ཡུལ། །གསེར་ཆེན་ཉི་མའི་འཁོར་འདས་ངོ་མཚར་ཅན།།སླད་ནས་བྱོན་རྣམས་ཆོས་འཁོར་བསྐོར་བ་སོགས།།ལས་བཞིའི་འཕྲིན་ལས་གང་བརྩམས་མྱུར་འགྲུབ་འགྱུར། །ཞེས་རྡོ་རྗེའི་ལུང་གིས་གསལ་བར་བསྟན་ཡོད་པ་དུས་དང་རྟེན་འབྲེལ་མང་པོས་དུས་སུ་བབ་པའི་དོན་དང་བསྟུན།འཛམ་གླིང་ཞི་བདེ་དང་།གངས་ལྗོངས་སྣོད་བཅུད་ཀྱི་རྒུད་སེལ་དུ་རླབས་ཆེན་པོའི་ཐུགས་བསྐྱེད་བཅས། སྤྱིར་སྲིད་པའི་ཟོ་དོར་དང་།སྒོས་བོད་སྐྱོང་རྗེ་ཡི་མགུར་ལྷ། ལྷག་པར་གླིང་རྗེ་གེ་སར་རྒྱལ་བློན་གྱི་བླ་རི་གཉན་པོ།བསྟན་སྲུང་རྨ་རྒྱལ་སྤོམ་རའི་བཞུགས་ནས་རྨ་ལུང་གངས་ཀྱི་ར་བའི་གནས་ཀྱི་ཤར་ཕྱོགས།ས་བཟང་བོ་གཡུ་བཟང་ལ་ཐོག་ཏུ་ཕྱི་ནང་རྟེན་འབྲེལ་ཕུན་སུམ་ཚོགས་པའི་ངང་།གླིང་རྗེ་གེ་སར་རྒྱལ་པོའི་དཔལ་མཁར་སྒྲོན་ཞིང་ལྷ་བསང་རྒྱ་ཆེན་ཕུལ།དཔའ་བོ་དང་དཔའ་མོ་མཚོན་པའི་སྡེས་གླིང་བྲོ་བདེ་ཆེན་རོལ་མོ་སོགས་གླིང་སྐྱེས་བུའི་མཛད་རྣམ་རྗེས་དྲན་གྱིས་བྲོ་གར་དུ་མ་དང་བཅས་འཛམ་གླིང་ཞི་བདེ་དང་གངས་ལྗོངས་དགེ་བའི་བའི་ཐུགས་བསྐྱེད་བླ་མེད་གནང་།གླིང་རྗེ་སྐྱེས་བུའི་དཔལ་མཁར་གྱི་ཉེ་གམ་གཡུ་བཟང་ཆོས་ཁྲིའི་ལ་ཁ་ནས་འཁོར་འདུས་པ་ཁྲི་ཕྲག་ལྷག་ལ་གངས་ལྗོངས་ཞི་བདེའི་སྤྱི་རིམ་མ་ཎི་སྨོན་ལམ་ཆེན་མོ་ཚོགས་ཐེངས་བཅུ་བའི་ཆོས་འཁོར་ཞག་བདུན་ཕྲག་གཅིག་ལ་མཛད་པ་སོགས་བསྟན་འགྲོའི་དོན་ཆེན་ལ་རྩེ་གཅིག་ཏུ་དམིགས་པའི་མཛད་འཕྲིན་རྒྱ་ཆེན་གནང་བར་མཛད།གཞན་ཡང་གླིང་རྗེ་རྒྱལ་བློན་གྱི་གོ་མཚོན་གཏེར་དུ་སྦས་གནས་གོ་མཚོན་གཡུ་རྩེ་སོགས་རྨ་རྒྱལ་གྱི་ཕྱོགས་སོ་སོའི་གླིང་གེ་སར་དང་འབྲེལ་ཡོད་ཀྱི་གནས་རྣམས་སུ་ཐུགས་བསྐྱེད་རྒྱ་ཆེན་གྱིས་བསང་གསོལ་དང་གཏེར་སྦས་སོགས་ཕུན་སུམ་ཚོགས་པའི་བཀའ་དྲིན་བསྐྱངས་སོ།།

 

 

ཀློག་གྲངས།:[3230]
གླིང་གེ་སར་རིག་གནས་དྲྭ་ཚིགས།
དྲ་ཚིགས་འདིའི་པར་དབང་ཡོད་ཚད་གླིང་གེ་སར་རིག་གནས་དྲྭ་བར་དབང་བས།
འདི་ནས་རྩོམ་ཡིག་དང་བརྙན་རིས་དག་དྲྭ་བདག་ལ་འབྲེལ་གཏུགས་མ་བྱས་པར་མི་བཀོལ་བར་ཞུ།
འབྲེལ་ཡོད་རྩོམ་ཡིག་སྐུར་གནས།   382740503@qq.com