སྐད་འཇོག་ས།

གླིང་གེ་སར་དྲ་བ་འདི་གཉེར་བའི་དམིགས་ཡུལ་ནི། བོད་ཀྱི་མི་སྣ་དཔའ་བོ་གླིང་རྗེ་གེ་སར་ནི་བོད་ཀྱི་ལོ་རྒྱུས་སྟེང་དངོས་སུ་བྱུང་བའི་དོན་གནས་ཀྱི་མི་སྣ་ཞིག་ཡིན་ན་ཡང་། དུས་ཀྱི་གནས་བབ་ཀྱིས་མི་སྣ་འདི་ལ་ངག་ཏུ་བརྒྱུད་པའི་དོན་དངོས་ལོ་རྒྱུས་ཐན་ཐུན་ལ་གཞི་བཅོལ་བའི་ཡིག་ཐོག་གི་ལོ་རྒྱུས་ཐད་ནས་ལྷ་སྒྲུང་ལྟ་བུར་ཆགས་ཏེ་ས་ཁྱབ་རྡོ་ཁྱབ་ཏུ་གྱུར་བ་དང་གཅིགགླིང་གེ་སར་གྱི་མི་རབས་ཕྱི་མ་དག་གིས་རང་རིགས་ཀྱི་མེས་པོའི་དོན་དངོས་ལོ་རྒྱུས་ཀྱི་དཔྱད་གཞི་ལ་ཆེར་མ་དམིགས་པར། དཔའ་བོའི་བསྟོད་སྒྲུང་གི་ཁ་སྙན་ངག་གི་འཇིག་རྟེན་ཞིག་ཏུ་ཁྲིད་དེ་རྩོམ་པ་པོ་རང་རང་གིས་རྟོག་པ་འཆར་ཡན་གྱི་ལམ་ནས་བྲིས་པ་མང་སྟབས། བོད་ཀྱི་དཔའ་བོའི་ལོ་རྒྱུས་ལ་དོན་དངོས་དང་ཉེ་བའི་ལོ་རྒྱུས་དང་། དཔའ་བོའི་བསྟོད་སྒྲུང་གི་སྙན་ངག་གཉིས་ལས་ཕྱི་མ་ཁྱབ་ཆེ་བར་སོང་སྟེ། ད་ཆ་འཛམ་གླིང་གི་རྟོགས་བརྗོད་ཆེན་མོ་འདི་ལ་སྤྱིའི་ཆ་ནས་སྙན་གྲགས་དང་མཛད་འཕྲིན་རྒྱ་ཤིན་ཏུ་ཆེ་ན་ཡང་།ཞིབ་གསལ་གྱི་ཆ་ན་སྒྲུང་མཁན་སོ་སོའི་འབྲི་སྟངས་མི་འདྲ་བ་དང་།སྔ་ཕྱི་མི་མཐུན་པ་སོགས་ལོ་རྒྱུས་པ་སོ་སོའི་འདོད་པ་མི་མཐུན་ས་མང་པོ་ཞིག་གིས་བོད་ཀྱི་གླིང་གེ་སར་རིག་གཞུང་ལོ་རྒྱུས་ལ་ཞིབ་འཇུག་པ་རྣམ་པར་དཀའ་ངལ་ཆེ་བའི་གནས་བབ་ལ་ཁ་གཏད་དེ། གླིང་གེ་སར་རིག་གནས་ཀྱི་ཕྱོགས་ཡོངས་ཀྱི་དཔྱད་གཞིའི་མ་ལགས་འཐུས་སྒོ་ཇེ་ཚང་ལ་གཏོང་ཨེ་ཐུབ་སྙམ་ནས་གཉེར་བ་ཡིན་མོད། འོན་ཀྱང་དྲ་བ་འདི་གཉེར་བ་པོར་བོད་ཁུལ་ཡོངས་ཀྱི་གླིང་གེ་སར་དོན་དངོས་ལོ་རྒྱུས་དང་ཉེ་བའི་དཔྱད་གཞི་ལ་ཐོས་མཐོང་གི་རྒྱ་ཆུང་བས། གླིང་གེ་སར་རིག་གནས་ལ་སྤྲོ་སྣང་ལྡན་པའི་རྒྱ་ཆེའི་གྲོགས་པོ་དག་གིས་དྲ་བ་འདིའི་ས་བཅད་སོ་སོའི་ཁྱབ་ཁོངས་ལ་དཔྱད་གཞི་བསྡུ་རུབ་དང་། གླིང་གེ་སར་དཔྱད་རྩོམ། གླིང་གེ་སར་སྒྱུ་རྩལ་རི་མོ། གླིང་གེ་སར་དོན་དངོས་ལོ་རྒྱུས།གླིང་གེ་སར་དང་འབྲེལ་བའི་བོད་ཡུལ་སྟོད་སྨད་བར་གསུམ་གྱི་ཡུལ་སྲོལ། གླིང་གེ་སར་འཁྲབ་གཞུང་། གླིང་གེ་སར་ལོ་རྒྱུས་སམ་བསྟོད་སྒྲུང་གསར་རྙིང་དང་རྩོམ་པ་པོ་དང་འབྲེལ་ཡོད་མི་སྣ་ངོ་སྤྲོད་སོགས་མཁོ་སྤྲོད་གནང་སྦྱིན་གྱི་བཀའ་དྲིན་སྐྱོང་རྒྱུ། མདོར་ན་བོད་རང་གི་དཔའ་བོའི་ལོ་རྒྱུས་ལ་གཅེས་སྐྱོང་གི་འདུ་ཤེས་ལྡན་པའི་སྒོ་ནས་ཕྱོགས་ཡོངས་ལ་མཛུབ་སྟོན་རྒྱབ་སྐྱོར་གནང་རྒྱུ་བཀའ་དྲིན་ཆེ་ཞུ་བ་དང་། ནོར་འཁྲུལ་དང་རིག་གནས་ཀྱིས་མ་འཇོན་ས་ཡོད་ན་རྒྱ་ཆེའི་ཀློག་པ་པོ་རྣམ་པར་གུས་བཤགས་བྱེད་ངེས་ཡིན། དེ་དང་ལྷན་བོད་ཀྱི་མེས་པོ་གླིང་རྗེ་སར་སྐྱེས་བུའི་རྣམ་ཐར་ལོ་རྒྱུས་རིང་མོའི་མཛད་འཕྲིན་འཛམ་གླིང་རིག་གནས་བང་མཛོད་ཀྱི་སྙིང་བཅུད་འདོད་འབྱུང་གི་ཡིད་བཞིན་ནོར་བུ་ལྟ་བུར་འགྱུར་ཐུབ་པའི་སྨོན་འདུན་ཡང་ཡང་ཞུ་བ་ལགས་སོ། ། ཞོར་དུ་དྲ་བ་འདིའི་གཞི་གྲངས་མཛོད་དང་ལོ་རེའི་དྲྭ་གནས་དོ་དམ་གྱི་ཁྲལ་སོགས་ཀྱི་ཐད་ནས་རོགས་སྐྱོར་གནང་མཁན་སྤྲུལ་ཀློང་ཡངས་དང་མི་ཉག་པ་འཇམ་དབྱངས་འོད་ཟེར། ཇོ་ཁྲི་འཇམ་དབྱངས་བསྟན་པའི་རྒྱལ་མཚན།དྲེལ་དཀར་སྤྲུལ་སྐུ་བསོད་བློ་སོགས་སྔ་རྗེས་སུ་ཐུགས་ཁུར་རྒྱབ་སྐྱོར་གནང་མཁན་རྣམ་པར་བཀའ་དྲིན་ཞུ་བཞིན་ཡོད།                              ཅེས་བོད་རབ་བྱུང༡༧པའི་ལྕགས་མོ་ཡོས་ལོའི་ལོ་སར་ལ་གླིང་དྲྭ་འདིའི་གཙོ་བདག་སྨིན་དབུས་པོས་ཕུལ་བཀྲ་ཤིས་པར་གྱུར་ཅི

 

 

ནེའུ་ཆུང་འབོད་སྐུལ་དབང་གི་ཞགས་པ།



            ནེའུ་ཆུང་འབོད་སྐུལ་དབང་གི་ཞགས་པ།

རྒྱལ་ཡུམ་ཆེན་མོ་འཇིགས་བརྒྱད་གཡུལ་སྒྲོལ་མའི། །

མཁྱེན་བརྩེའི་ཡེ་ཤེས་འགྲོ་ལ་རྗེས་ཆགས་ཏེ། །

གླིང་དཀར་སྟོད་དུ་མཚན་དཔེའི་གར་བསྒྱུར་པ། །

ནེའུ་ཆུང་དབྱིངས་ཕྱུག་རྒྱལ་མོ་བརྩེ་ལྡན་མ། །

 

གདུང་གཙང་སྒ་ཡི་རིགས་ཀྱི་སྐྱེད་ཚལ་དུ། །

མཚར་སྡུག་ཀུན་ནས་རྫོགས་པའི་ཨུཏྤ་ལ། །

དབང་གི་མཁའ་འགྲོའི་ཐོད་རྒྱན་ཐོགས་པ་ཡི། །

ནེའུ་ཆུང་ལྷ་ཡི་མེ་ཏོག་ཡིད་འོང་མ། །

 

ཇི་ལྟར་བྱང་ཆུབ་སེམས་དཔའ་བློ་ལྡན་དག །

རིགས་ནི་མཚན་མ་དག་ལས་ཤེས་གསུངས་ལྟར། །

ཆུང་བའི་དུས་ནས་ཞི་དུལ་ངང་བཟང་ཞིང་། །

ཀུན་ཤེས་ཀུན་བཟང་མི་མོའི་ཁྱུ་མཆོག་མ། །


ཤེས་རབ་ཆེ་ཞིང་རྣམ་དཀར་ལས་ལ་མོས། །

ཀུན་ལ་བརྩེ་ཞིང་དམན་ལ་ལྷག་པར་བྱམས། །

ལེགས་ཉེས་འབྱེད་ལ་མངོན་ཤེས་སྤྱན་དང་ལྡན། །

སར་གནས་སེམས་མའི་དེ་ཉིད་ཀུན་ལྡན་མ། །

 

དཀྱེལ་ཡངས་ལྷོད་ཆགས་ཡ་རབས་ལས་ལ་དགྱེས། །

སྐྱེས་སྦྱང་ཡོན་ཏན་མ་ལུས་འབུར་དུ་ཐོན། །

ངག་རྩལ་གཏམ་ལ་ཁ་དགེ་བཀྲ་ཤིས་པའི། །

མི་ཡི་བུ་མོ་བདེན་ཚིག་ཀུན་གྲུབ་མ། །


རླངས་སྟོན་ཐུགས་རྗེ་ཟླ་བའི་བསིལ་ཟེར་ལས། །

གདམ་ཟབ་ག་བུར་རྒྱུན་བཟང་བདུད་རྩིའི་ཆབ། །

ཐུགས་ཀྱི་ཟེའུ་འབྲུར་ལྷུང་བའི་ཉེར་ལྡོག་གིས། །

གཏན་བདེའི་ལམ་སྣ་བདག་གིར་བཞེས་མཛད་མ། །


ལྟ་བ་སྟོང་ཉིད་སྙིང་རྗེའི་ཉམས་རྩལ་རྒྱས། །

སྒོམ་པ་འོད་གསལ་དགོངས་པའི་རང་ས་ཟིན། །

སྤྱོད་པ་ཀུན་བཟང་གྲོ་བའི་སྣང་སེམས་སྡུད། །

གཉིས་དོན་ལྷུན་གྱིས་གྲུབ་པའི་རྣལ་འབྱོར་མ། །


སྐུ་ལུས་སྣང་སྟོང་ཚངས་པའི་མེ་ཏོག་མཛེས། །

གསུང་དབྱངས་དོན་ལྡན་ཅོ་གའི་དྲུག་འགྱུར་འཇེབས། །

ཐུགས་མཆོག་བདེ་ཆེན་སྟོང་པའི་ཡེ་ཤེས་རྒྱས། །

ལྷན་སྐྱེས་མཁའ་འགྲོ་ལུ་གུའི་ཚར་ཡག་མ། །


སེང་ཆེན་སྐྱེས་བུས་འགོག་མོའི་ཇོ་རུ་ཞེས། །

རེ་ཞིག་སྦས་ཚུལ་བརྟུལ་ཞུགས་སྐྱོང་བའི་སྐབས། །

དགྲ་བླའི་རྒྱལ་པོའི་ནང་གི་དེ་ཉིད་ཀུན། །

དག་གཟིགས་སྤྱན་ལྡན་སྔོ་ལོའི་སྲས་གཅིག་མ། །

 

སྨུག་པོ་ལྡོང་གི་ཕུ་ནུ་ཚོགས་པ་ཡིས། །

གླིང་སྲིད་འདོ་བའི་བང་གི་དཀྱུས་ཐག་ལ། །

དབང་བའི་དགའ་སྟོན་སྒོ་འཕར་ཕྱེ་བའི་ཉིན། །

རྟེན་འབྲེལ་བདེན་ཚིག་བརྡ་གླུས་བསྒྲིགས་མཛད་མ། །


སྣང་སྟོང་སྐུ་ལུས་རྡོ་རྗེའི་གྲོང་ཁྱེར་དུ། །

མི་རྗེ་སེང་ཆེན་ལྷ་ཡི་ཉི་མ་ཆེའི། །

ཐབས་མཆོག་འོད་དཀར་ཟེར་མདངས་འཕྲོས་དང་ལྷན། །

བདེ་སྟོང་སྒྱུ་རྩལ་སྟོབ་མཁས་མཚན་ལྡན་མ། །


དང་པོ་ཉིད་ནས་འཁོར་བའི་ཕུན་ཚོགས་ལ། །

སྐྱོ་ཤས་ངེས་འབྱུང་ཐུགས་རྩལ་རྫོགས་ན་ཡང་ ། །

དོན་འགྲུབ་སྐྱེས་བུས་འགྲོ་དོན་སྐྱོང་བ་ལ། །

ཐུགས་དམ་ལྷོད་པ་མེད་པའི་ཐབས་གྲོགས་མ།


གླིང་རྗེ་རྒྱལ་བློན་སྲས་དང་བཅས་པ་ཡི། །

སྐུ་ལ་གཟི་དཔལ་གསུང་ལ་བདེན་ཚིག་དང་། །

ཐུགས་ལ་དགྱེས་པ་ཕྲིན་ལས་རྣོ་སོ་ཀུན། །

བསྐྱེད་ལ་དབང་ཐོབ་གསང་འཛིན་ཌཱ་ཀི་མ། །


ངང་བཟང་ཕྱི་ཐག་ནང་ནས་རིང་བ་དང་། །

ཁྲེལ་དང་བག་ཡོད་དད་དང་དམ་ཚིག་གཙང་། །

དགྱེས་བསྐྱེད་ཉམས་བརྒྱའི་སྟངས་ཀ་ཁོང་ནས་རྫོགས། །

མི་མིན་ཡེ་ཤེས་སྒྱུ་མའི་རང་རྩལ་མ། །


སེང་ཆེན་རྗེ་དང་འདན་མ་ཡབ་སྲས་སོགས། །

གྲུབ་རིགས་དཔའ་བརྟུལ་དྭངས་སྨན་མཐའ་དག་གི །

སྣ་ཚོགས་མཛད་པ་རྒྱ་མཚོའི་རྣམ་ཐར་ཀུན། །

བཀའ་རྒྱས་འདེབས་མཁས་གླིང་དཀར་བསྟན་སྐྱོང་མ། །


གང་ཞིག་དཀར་པོ་གླིང་གི་མཛད་འཕྲིན་ལ། །

སྔོན་སྨོན་ལས་འབྲེལ་ཅན་གྱི་སྙིང་ཁམས་སུ། །

སེང་ཆེན་བཀའ་ཡི་གཏད་རྒྱ་མ་རལ་བའི། །

བརྡ་གསང་རྡོ་རྗེའི་གླུ་སྒོ་འབྱེད་མཛད་མ། །


མཁའ་སྤྱོད་འོག་མིན་མཁའ་འགྲོའི་གྲོང་ཁྱེར་ནས། །

ཀུན་ཁྱབ་བརྩེ་ཆེན་ཐུགས་རྗེའི་འཕྲུལ་ཐབས་ཀྱིས། །

མོས་ལྡན་སྙིང་ལ་ཀུན་དགའ་གསར་བའི་སྐྱེས། །

སྩོལ་ལ་གཡེལ་མེད་ལས་ཀྱི་གཉེར་འཛིན་མ། །

 

མཚན་ཙམ་དྲན་ཡང་རྟེན་འབྲེལ་དཀར་པོ་ཡི། །

དཔལ་རབ་སྩོལ་ལ་སྨོན་ལམ་མཐུ་གྲུབ་པའི། །

འོད་ཀྱི་སྐུ་ལ་ཡེ་ཤེས་སྙིང་པོ་ཅན། །

དྲན་པ་དོན་ལྡན་ནེའུ་ཆུང་བདེ་སྐྱོང་མ། །


སྙིགས་ལྔའི་མུན་པ་སྙིང་ལ་ཆེར་བབས་ཏེ། །

ཕྱི་ནང་ཉེར་འཚེས་རྟག་པར་གདུང་བའི་དུས། །

སེང་ཆེན་ཐུགས་གསང་འཛིན་པའི་མཚན་ལྡན་མ། །

ཁྱེད་ལ་རེ་ལྟོས་འཆའ་འོ་ཐུགས་རྗེས་གཟིགས། །


ཕྱི་ཡི་ནད་གདོད་བར་ཆད་ཁྱེད་ཀྱིས་སྲུངས། །

ནང་གི་དུག་ལྔའི་གཡོ་འཕྲུལ་ཁྱེད་ཀྱིས་ཆོམས། །

གསང་བའི་རྟེན་འབྲེལ་ཉེས་ཚོགས་ཁྱེད་ཀྱིས་ཟློག །

མདོར་ན་བདག་གི་ཡོད་ཚད་ཁྱེད་ལ་བཅོལ། །


གང་བརྩམས་ཕྱོགས་ལྷུང་གདོན་གྱིས་མི་བརླམ་པར། །

རྣམ་པ་དཀར་པོའི་རྩིས་ཀྱིས་ཟིན་པ་དང་། །

ནམ་ཞིག་ཚེ་ཡི་འདུ་བྱེད་རྫོགས་པའི་དུས། །

ཁྱེད་ཐུགས་དགོངས་པའི་བཙན་ས་ཟིན་པར་ཤོག །


 འདི་གོ་སྨིན་དབུས་ཨ་དཀར་པོའི། །ནང་གི་སེམས་ཁམས་རི་སྐྱེས་བུ། །

དུས་རྐྱེན་ཤ་བ་རིས་གཙེས་སྐབས། །དྲན་སྐུལ་དབྱིངས་སུ་སྤུར་བ་དགེ། །



ཀློག་གྲངས།:[5865]
གླིང་གེ་སར་རིག་གནས་དྲྭ་ཚིགས།
དྲ་ཚིགས་འདིའི་པར་དབང་ཡོད་ཚད་གླིང་གེ་སར་རིག་གནས་དྲྭ་བར་དབང་བས།
འདི་ནས་རྩོམ་ཡིག་དང་བརྙན་རིས་དག་དྲྭ་བདག་ལ་འབྲེལ་གཏུགས་མ་བྱས་པར་མི་བཀོལ་བར་ཞུ།
འབྲེལ་ཡོད་རྩོམ་ཡིག་སྐུར་གནས།   382740503@qq.com